[1] Tiro markataki profecía arunaka: Tarsisankir barco apnaqirinaka, ayqupxam, barco mistuniñ chiqax q'ala t'unjatawa. Chipre tuqit puriniña uka barco mistuñasti q'ala t'unjatarakiwa.
[2] Tiro markankir jaqinakasa, Sidón markankir alakip jaqinakasa, jan kun kamsasakiw qhiparapxi. Jupanakan barconakapasa nayrax suma aljañanak apanipxirïna.
[3] Egiptot apanit trigo markanakar aljapxirïna, walja qullqirak uñxatapxirïna.
[4] Jichhasti Sidón markankirinaka, p'inqachjatäñampiw phuqhantasipxäta; jumanakax quta taypinjam sum sarnaqañ yatipxtaxa, ukampis lamar qutax janiw qamir yänak churxapxätamti, wawanakamas janirakiw suma yänak jikxatxapxaniti.
[5] Kunapachatix egipcionakar uka yatiyäwix purkani ukkhaxa, Tiro markan ukhamar puritapat taqiniw jachapxani.
[6] Sapxarakiniwa: “Tarsis markar sarxapxam, quta iraman utjirinaka, uka markar purisin jachapxam” sasa.
[7] Tiro markax wali jaya maran markänwa, kusisiñansa phuqt'at markänwa. Jaqinakapax jayanakar sarirïpxänwa, uka chiqanarak jakasipxirïna.
[8] Alakip luririnakapax wali aytat jaqinakäpxänwa; taqi chiqansa wali sum katuqatäpxänwa. Jichhasti, ¿khitirak uka marka t'unjañ amtisti?
[9] Taqi ch'amani Tatituw ukham lurañ amti, jach'a jach'a tukur jaqinakarus jisk'achjañataki jach'a ch'amaninakarus atipjañataki.
[10] Tiro markankirinaka, jichhax yapuchañar uskusxapxam, barconak puriñäwjanakapax q'ala tukjatawa, Tarsis markat jutir barconakas janiw jutkxapxaniti.
[11] Tatituw jach'a qutxar amparap luqxati, markanakarus khathatiyaraki, Tatituw Canaán chiqan utjir jach'a ch'aman markanakarus tukjatäñapatak khitharaki.
[12] Sidón markarusti sarakiwa: “Kusisiñamax tukusxiwa; markaman qamañapas q'ala tukjatawa. Chipre sat wat'arus jaltaskam, ukansa janirakikiw samarañ jikxatkätati.”
[13] Tiro, Sidón markankirinaka, kunarutix Babilonia markax purt'aski uk uñtapxam. Uka markax janiw utjkxiti, Asiria markan ejercitopaw tukjawayxi. Soldadonakax nuwantañatak torrenak lurasipxi, Reyi utanakap q'al tukjawayapxi. Jichhasti wasarankir laq'unakakiw uka taypin jakasxapxi.
[14] Tarsisankir barconak apnaqirinakax llakt'atäpxiwa, barconakan puriñäwjapan tukjatätap layku.
[15] Uka urunakanxa, Tiro markax paqallq tunka maraw apanukutäni, mä reyin jakañapäkis ukkha maranaka. Uka paqallq tunka mara sarakipatatsti Tiro markarux kuna jaylliñatix jan wali sarnaqir warmit utjki uka jaylliñarjamaw purini:
[16] “Yaqha chachanakampi sarnaqir armanukut warmi, arpam apxarusim ukatsti, markpacha muytanim; suma q'uchunak toct'am, walja q'uchunak jayllt'arakim, inach jumat amtasipxani.”
[17] Paqallq tunka mara tukusxani ukapachasti, Tatitux Tiro markan wasitat alakip lurañapatakiw jaysani, ukatsti, aka uraqin taqi markanakampiw alakip lurarakini.
[18] Ukampis Tiro markax janiw uka jikxatatanakapat kusiskaniti, jan ukasti, Tatituruw luqtani, ukampisti khitinakatix Tatitur yupaychapki ukanakatakiw walja manq'añanaka, suma isinak alapxani.