[1] “Taqi khitinakatix umat pharjatäpkta ukanakax umt'ir jutapxam; jan qullqininakax jutapxam, manq'añatak trigo inak mayisipxam, vinompi, lechempi inak mayisipxam.
[2] ¿Kunatsa qullqinakam kunatix jan t'ant'äki ukar inamay churasipkta? ¿Kunatsa qullqinakam kunatix jan askïki ukar inamay tukjasipkta? Sum ist'apxita, ukat suma manq'anak manq'apxäta, suma muxsa manq'anak manq'apxäta.
[3] Nayan ukar jutapxam, ukatsti ist'apxita, ist'apxita, ukatsti jakasipkätawa. Nayaw jumanakampix wiñay arust'äwi lurä, ukhamat kuntix Davidarux munasiñampi arskta uk phuqharakï.
[4] Nayaw juparux markanakat arsuri uskta, markanakatak mä jilïr yatichirirak uskta.
[5] Jan uñt'at markanakaruw jumax jawsäta; kawkïri markanakatix jan uñt'apkäyätam ukanakaw juman ukarux jalanipxani, naya, juman Tatituma, Israelan Qullana Diosapaw jumarux jach'añchsma.
[6] “Tatitur thaqtapxam jikxatañjamäkipana, jak'ankkipan jawsapxam.
[7] Qhuru jaqix sarnaqäwip apanukpan, ñanqha amtañan jaqisti uka amtañanakap apanukpan; ukatsti Tatitun ukar kuttanxapxam, jupasti jumanakat khuyapayasipxätamwa; Diosasar makhatxapxam, jupasti juchanak pampachañatakix jank'akiwa.
[8] Tatitux akham siwa: Nayan amtatanakaxasti janiw jumanakan amtatanakamjamäkiti, luräwinakaxas janirakiw jumanakan luräwinakamjamäkiti. Kunjämatix alaxpachax akapachat wali alayankixa, ukhamarakiw amtatanakaxasa, luräwinakaxasa, jumanakan amtatanakamata, luräwinakamat sipansa wali alayankaraki.” Tatituw uk arsu.
[10] “Kunjämatix jallus, khunus alaxpachat saraqanixa, ukatsti janiw kutkatkxiti, jan ukasti uraqiruw chullunti, uraqxa suma jasak tukuyi, alinaksa mistuyanirakiwa, yapuchañatakix jatha achuyi, t'ant'as manq'añatakix utjarakiwa,
[11] ukhamarakiw lakaxat mistkis uka arunakaxa, nayan ukarux janiw jan kun lurasax kuttankiti, jan ukasti kuntix nayax munkta uk luri, kuntix nayax siskta uk phuqharaki.
[12] “Jumanakax Babiloniat kusisitaw mistunxapxäta, markamarusti sumakiw kuttanxapxäta. Jumanakar uñjasinsti jach'a qullunakasa, jisk'a qullunakas kusisiñat wal q'uchupxani, pampankir quqanakasti t'axllisipxaniwa.
[13] Ch'aphi alinak lantisti pinonakaw jilantani, itapallunak lantisti suma panqaranakaw jilantani. Taqi aka uraqpachaw Tatiturux yupaychani, uka luräwinakaw Tatitun jach'a muspharkañap wiñayatak uñacht'ayani”.