[1] ¡Ay, kunakïkan jumanakatxa, jan chiqa kamachinak apsurinaka, jan phuqhañjam kamachinak mistuyirinaka,
[2] pisi ch'aman jaqinakarux janiw askirjam uñjapktati, markaxan utjir juk'a yäninakan arsutanakapsa janiw yäqapktati, ijma warminakarux inakiw ch'am apsupxta, wajchanakatsti lunthatjapxaraktawa!
[3] Tatitux luratanakamat wayt'apkätam ukapachax kunak lurapkäta. Tatitux mutuyäwi apayanipkätam ukapachax kamachapkakïta. ¿Khitirus yanapt'a mayipxäta? ¿Kawkharus qamir yänakam imantapxäta?
[4] Jumanakax jisk'achjatäpxätawa, katuntat apatäpxätawa, jiwayatäpxarakïtawa. Tatitun phiñasiñapasti janiw apaqtkaniti, jichhas jupax mayamp ukham lurañ amtaskakiwa.
[5] “Tatitux siwa: Nayax wali q'apisitätwa; ukat Asiriankir reyimpiru, ñanqhachapkitu ukanakampirux mutuyä.
[6] Jichhax aka ñanqha markar nuwantañapatakiw khithä, uka markar q'al lunthatjañapataki, qamir yänakapsa q'al aparañapataki, marka thakhinkir ñiq'ir uñtat taksuñapataki.
[7] Ukampis Asiriankir reyix janiw ukham lup'kiti, janirakiw ukham lurañsa amtkiti. Jupax t'unjañakpun amtaski, walja markanakar chhaqtayañak lup'iski.
[8] Ukatsti sarakiwa: ‘Taqi reyinakax nayan apnaqatkamakiwa.
[9] Nayatakix Calnó, Carquemis uka markanakax kipkakiwa, Hamat markas Arpad markampix kipkakiwa, Samaria markas Damasco markampix kipkakirakiwa.
[10] Walja diosanakan markanakaruw atipjta, Jerusalenankirinakatsa, Samariankirinakat sipansa walja diosanakan markanakaru.
[11] Ukat Jerusalén markarux t'unjarakï, Samaria markar t'unjkta ukhama’ ” sasa.
[12] Tatitux kuntix Sión qullun lurañ amtki, Jerusalén markansa lurañ amtki, ukanak phuqhapuniniwa. Ukham phuqhasasti, Asiriankir reyiruw mutuyani, jach'a jach'a chuymanïtapata, qhurütapat mutuyani.
[13] Asiriankir reyisti sarakiwa: “Nayaw taqi ukanak ch'amaxamp lurjta, wali ch'ikhïtaxät suma luräwinak amtarakta. Nayaw markanakan qurpanakapsa mayjt'ayta, qamir kankañanakapsa katuntasirakta, wali ch'aman chachjamax reyinakarus atipjaraktwa.
[14] Markanakan qamir yänakapsti katuntastwa, taqi uraqpach katuntasirakta, kunjämatix maynix apanukut tapat k'awnanak lunthatki ukhama, ¡janiw khititsa kuns kamskiti, janirakiw khitis arsuskiti!”
[15] Tatitux siwa: Asiriankir reyix pantjasitawa, hachasa, lawa khuchhuñasa janiw apnaqiripat juk'amp askïkiti. ¡Kawkhansa utjatäna mä thujruxa, khititix apnaqki ukar apnaqatapaxa!
[16] Ukatpï jichhax taqi ch'aman Tatituxa, uka lunqhu jaqinakxarux mä usu apayaninixa, reyirusa, reyin ejercitoparusa, uka usux jan ch'aman tukuyani.
[17] Qullan mä sapa Tatitux jiwasan qhanasawa, jupasti mä aqkiri ninaruw tukuni; mä sapa urunak Asirian ejercitoparux nakhantani, kuna ch'aphi ch'uminakäkaspas ukhama.
[18] Suma ch'uminakäpasa, suma achunak yapuchatanakäpasa, q'ala tukjatäniwa. Mä usuta jan ch'aman jaqjam lurjatarakïniwa.
[19] Mä juk'a quqanakakiw uka ch'umin qhiparxani, mä jisk'a wawansa jakt'kañjamakïpxaniwa.
[20] Uka uru purinkan ukkhaxa, mä juk'a israelitanakax qhispiyasipkatayna ukanakaxa, janiw Asiriankirinakar juk'amp alkatkxapxaniti; jan ukasti Israelan Qullan Diosaparuw katuyasxapxani.
[21] Mä qawqha israelitanakakiwa, taqi ch'aman Diosarux kuttanxapxani.
[22] Israel markamax waljanïskpasa, quta iramankir ch'allar uñtatäskpasa, ukampis mä qawqhanikiw kuttanxapxani. T'unjañax niya amtatawa, Diosan aski luräwipasti phuqhasipuniniwa.
[23] Taqi ch'aman Tatitusti t'unjañ amtapuniwa, uksti aka markpachan phuqhani.
[24] Taqi ch'amani Tatitusti siwa: “Sión chiqan jakir markaxay, asirionakarux jan axsaramti, jupanakax jawq'japkchïtamsa, chhuxriñchjapkchïtamsa, kunjämtix egipcio jaqinakax lurapkän ukhama.
[25] Mä juk'a pachatxa jumatakix janiw phiñasitäkxäti, uka phiñasiñaxampix asiriankirinakaruw q'al tukjä.
[26] Naya, Taqi ch'amani Tatituw jupanakarux mutuyä, kunjämtix Madianitanakarux Oreb qarqa jak'an tukjkta ukhama, Asiriatakisti ch'amax uñacht'ayarakï, kunjämtix Egiptotakix uñacht'aykta ukhama.
[27] Naya, Israelan Diosapasti asirionakat qhispiyapxäma, uka jach'a t'aqhisiñanakam apaqapxarakïma.”
[28] Uñisiristi Rimón tuqit juti, Aiat siski uka chiqaruw puri, Migrón siski uka chiq sarakipi, q'ipipsti Micmás siski uka chiqaruw jayti,
[29] k'ullk'u thakhi chiq sarakipanipxi, Gueba siski uka chiqaruw qurpachasipxi, Ramá markankirinakasti mulljasipxiwa, Saúl chachan Guibeá markapan jakirinakasti jaltxapxarakiwa.
[30] Bat-Galim markata, Laisa sat markata, Anatot markatsa, arnaqasitanakapaw ist'asi.
[31] Madmená markankirinakasti jaltxapxiwa, Guebim markan utjirinakasti imantasxapxarakiwa.
[32] Uñisir asirionakasti jichhürpachaw Nob siski uka chiqar sayt'apxi; Sión qullur nuwantañatakiw wakicht'asipxi, kawkïritix Jerusalén markäki ukaru.
[33] Uñtapxam, taqi ch'amani Tatitux axsarkañ ch'amapampiw asirionakarux quqanakarjam tinkurpayi; juk'ampi jach'a quqanakarusti khuchhurpayiwa, uka jach'a quqanakarusti uraqirkamaw liwirtayi.
[34] Tatitusti may ch'amt'asakiwa uka Libanonkir suma quqanakarux tinkurayi.