[1] Mä kutixa, Asiriankir Sargón reyix mä jach'a jilïriruw Asdod markar sarañapatak khithäna, ukatsti uka markar nuwantasaw atipjäna.
[2] Ukapachaw Tatitux Amós chachan Isaías yuqaparux parläna, akham sasa: “Uka chhankha isim apsusim, wiskhunakamsa apsusirakim” sasa. Isaías profetasti ukham luräna, jan wiskhuni, niya q'alalpachaw jikxatasïna.
[3] Ukapachaw Tatitux sarakïna: “Isaías uywataxax q'ara kayuki, niya q'alalpacha, ukhamaw kimsa mara sarnaqi, ukasti Egipto markatakixa, Etiopía markatakisa mä unañchäwiwa.
[4] Ukham Asiriankir reyix egipcionakaru, etiopenakarus katuntat apani, awkinakäskpasa, waynanakäskpasa, jupanakarux q'alalpacha, q'ara kayuki, ch'inas q'arpach mä p'inqa aparakini.
[5] Yaqha markanakax Etiopía markaruw alkatasipxäna, Egipto markatsa jach'a jach'aw tukupxäna, uka urusti, ukham lurapxatapat p'inqasxapxaniwa, walrak axsarapxani.
[6] Uka urunakansti taqi quta iraman jakirinakax sapxarakiniwa: ‘Uñtapxam, Egipto markasa, Etiopía markas jan walt'añarurakis purxapxixä, jupanakay Asiria markankir reyit arxatchistani sayätanwa. ¿Jichhasti khitirak arxatt'istanisti?’ ” sasa.