[1] ¡Ay Samaria marka, Israel markan jach'a jach'a tukuñapa, machantat marka; ankuntat panqaranakampiw k'achachasta, uka suma qhirwan utjasiri marka, jaqinakapas vino umañamp atipjatanaka!
[2] Tatitux Asiria ch'aman marka jumanakatakix wakichaski, wali ch'aman chhijchhir uñtata, taqi kun tukjir thayjama, wali umani jallükaspas ukhama, uraq chhaqtayir umjama. Asiria markax munañapampi, ch'amapampiw
[3] Samaria markarux q'al tukjani, uka machir markarux jach'a jach'a tukuñapsa kayupampiw takxatani.
[4] Uka ankuntat panqaranakampi k'achachasitamxa, kawkïritix uka suma qhirwa patan sartki ukaxa, nayraqat achuqiri higonakar uñtatäniwa; maynitix uka achu uñjkani ukkhaxa, mäkiw iraqas manq'antani ukhama.
[5] Uka urunxa taqi ch'amani Tatitux mä k'ajkiri muspharkañ pillüniwa, markapan qhiparirinakatakisti, mä suma k'achachäniwa,
[6] jucha t'aqañ utansti taripirinakarux chiqap amuyu churani, markar arxatir soldadonakarusti ch'am churarakini.
[7] Profetanakasa, sacerdotenakasa, vino umantasaw uksar aksar liwinaqtas sarnaqapxi. Tatitun unañchäwi arunakap katuqañatakix vinompi q'ala machjatäpxiwa, jan walt'añanak taripañatakis machantatäpxiwa.
[8] Mesa patanakapas waq'aqjasitanakapamp phuqhantatawa, janipuniw kawkhas q'umax utjkiti.
[9] Ukatsti, nayxat akham sasaw parlapxi: “¿Kunjämarak Tatitun arunakapat jiwasar yatichir jutapxanisti? ¿Jiwasanakax jisk'a wawanakäksnas ukhamasti?
[10] ¿Jichhas ullañ qillqañ yatiqasksna ukhamasti?” sasa.
[11] Walikiwa, jumanakatix jan ist'asipkätaxa, pachpa Tatituw parlapxätam, ukampis yaqha arunakat parlapxätam, janirakiw uka arunakan kuna satapsa amuyt'apkätati.
[12] Jupasti jumanakarux sapxäyätamwa: “Akax t'akuräwixa, akax samarañasa; qarit jaqix samart'aspan” sasa. Ukampis janiw ist'añ munapktati.
[13] Ukatpï Tatitux jisk'a wawanakarjam parlxayapxätamxa, jichhas ullañ qillqañ yatiqasipkasma ukhama. Wawanakjamaw sarnaqañ yatiqapxäta, jikhanïxat liwisisaw usuchjasipxäta, janirakiw ukat sarthapirjamäpkätati.
[14] Jerusalén marka apnaqirinaka, ñanqha lurir jaqinaka: Tatitun arunakap ist'apxam.
[15] Jumanakax sapxtawa: “Jiwañampix arust'astanwa, jiwatanakan utjäwipampis arust'asiraktanwa, kunapachatix uka jach'a jan walt'añax jutkani ukkhaxa jiwasanakarux janiw katuntkistaniti; k'arisiñanakxaruw imantastanxa, sallqjasiñanakxaruw imantasiraktanxa” sasa.
[16] Ukat Tatitux saraki: “Nayawa Jerusalén markatakix mä suma ajllit jila alan qala tukurakï, jach'a wakiskir qaläyäwa, uta qalltan mä wakiskir qalapjamäyäwa. Khititix nayar katuyasis jakanixa, jakäwipax sumakipunïniwa.
[17] Uka utachäwinsti plomada lantix chiqapar uñjañäniwa, nivel lantisti kunatix chiqapäki ukarakïniwa” sasa. Jumanakax Egipto markaruw arxatayasiñatak katuyasipxtaxa, ukampis wali ch'aman Asiria ejercitow uka arxatirirux q'al tukjawayani.
[18] Jiwañampi arust'asitapasti ina ch'usar tukuyatäniwa, jiwatanakan utjawipampi arust'asitapasti ina ch'usaruw tukuni. Uka axsarkañ jach'a jan walt'añaw jutani, ukasti jumanakarux q'al tukjapxätam.
[19] Sapa kuti jutkan ukkhasti q'al tukjapxarakïtam. Sapa qhantati, sapüru, sapa jayp'urakiw jutani, jutañap yatisakiw jumanakax khathatxapxäta.
[20] Mä jisk'a ikiñarus ikintapkasma ukhamäniwa, mä jisk'a janxatampis janxatasipkasma ukhamaraki.
[21] Tatitusti Perasim qullun lurkän ukham lurani, Gabaón qhirwan lurkän ukham phiñasiñap uñacht'ayani. Tatitux jank'akiw amtatap phuqhani, jan khitir yatiyasaw lurarakini.
[22] Ukatpï, ¡Tatitumpix jan juk'amp phiskaskxapxamti, ukatarak juk'amp jan walinakar mantasipkasma! Taqi ch'amani Tatitun taqi markpachar t'unjañ amtatap ist'arakta.
[23] Ist'apxam kuntix sapkäm uka, wal wal ist'apxam nayan arunakaxa:
[24] Mä yapu lurir jaqix yapuchiriw sari, jupax janiw sapürus qhullik qhullkiti, janirakiw uka qhullit k'uphañaruk uskuskiti.
[25] Nayraqatax uka qhullit sum khuskhachi, ukatsti eneldo jan ukax comino uka jathanak phawanti, trigo jathanaksa phawantaraki, uka yapu thiyanakar muyuntayañatakisti, cebada, centeno ukanak phawanti.
[26] Tatituw juparux yatichi kunjäma lurañapäkitix ukxa.
[27] Eneldo achux janiw jawq'suskiti, comino achurus janirakiw carretampix qatatkipañäkiti; jan ukasti eneldox mä lawampi thalsuñakiwa, cominosti uka kipka thalsuñakirakiwa.
[28] Trigox janiw jan samart'as jawq'suñäkiti; jan ukasti, carretampi qatatkipañakiwa, jan ñut'uchjasaw granox yaqhachaña.
[29] Taqi ukham lurañanak yatxatañax taqi ch'aman Tatitut juti. Jupax muspharkañ amtäwinakaniwa, wali amuyt'ampirakiw uka amtäwinakap phuqhi.