[1] Mä reyiw utjani, jupasti chiqaparuw apnaqani, marka apnaqirinakasti chiqa uñjäwimpiw apnaqapxarakini.
[2] Uñisirinakapar arxatañatakiw sayt'asipxani, jan wali urunakat imañataki, ñanqha luräwinakat imañataki.
[3] Nayranakapampisti walpun uñatatasipxani, taqi kunsa suma amuyumpiw ist'apxani;
[4] taqi kunsa wal amuyt'asisaw lurapxani, parlatanakapasa chiqaparakïniwa.
[5] Jan wali jaqinakaxa, sallqjirinakasa, jisk'achjataw uñjasipxani.
[6] Mä jaqix arsutapampiw maynirux chuymap ust'ayi, chuymapansti jan wali amtäwinakak amtaski, jaqi jiwayañak munaski, manq'at awtjat jaqirux jan kunan khithanuku, umat pharjatarus janiw um waxt'kiti. Tatiturus k'arintarakiwa.
[7] Sallqa jaqix k'arikamak kuns parli, jan walinak lurañatakiw amtaraki; k'arintasaw jan kunaninakar aynacht'ayi, khitinakatix chiqapar uñjäwi mayipki ukanakaruxa.
[8] Aski jaqisti, askinak lurañ amti, uka aski amtatanakapan sayt'asiraki.
[9] Jan kunat llakt'asir warminaka, kuntix sapkäma uk ist'apxam. Jan yäqasir warminaka, arunakax ist'apxam.
[10] Amuyatax jichhax taqi kunas walikjamakïskiwa, akat mä mararusti, t'ant'ana, vinon jan utjkxatapatxa, axsarañat wal khathatipxäta.
[11] Jumanaka, jan yäqasir warminaka, jan kunat llakt'asir warminaka, jichhax khathatiñ qalltapxam. Uka isinakam apsusipxam, chhankha isinakamp isthapisipxam, ukhamat t'aqhisipxatanakam uñacht'ayapxäta.
[12] Ayqt'asis sarnaqapxam, ukkha suma uraqinakata, suma achur uva yapunakatsa.
[13] Markaxansti ch'aphinakampi quranakampikiw jilxani, taqi kusisiñ utanak taypin uka ch'aphinakax jilantxani.
[14] Reyin utapax apanukutäxaniwa; walja jaqin markasti jan jaqiniw tukuni; uka suma thuru pirqanakasti wiñayatak apanukutäniwa; ukansti monte asnonakax k'uchikiw jakasipxani, uywanakas ukan manq'asipxarakini.
[15] Ukampisa Tatitun ch'amapax wasitat jiwasxar jutani, ch'usa wasar uraqisti suma yapuchasiñ uraqiruw tukxani, yapuchasiñ uraqisti juk'ampi suma achuri yapuruw tukxani.
[16] Chiqa kankañampi, chiqa uñjäwimpiw taqi aka markan utjarakini.
[17] Chiqa uñjäwisti sumankañ utjayani, wiñayatakiw suman sarnaqasiña, jan axsarañ utjayani.
[18] Markaxasti mä suma samarañ chiqan jakani, suma utanakana, samarañas utjki uka utanakana,
[19] chhijchhisay ch'umirux q'al tukjaskpan, markaxasay jisk'achjat uñjasiskpan.
[20] Jumanakax k'uchikiw jakasxapxäta, yapunakamatakis uma qarpax waljaw utjani, asnotakisa, vacatakis chhuxllax jilarkirïniwa.