[1] Ukapachasti, Baladán sat jaqin Merodac-baladán yuqapax Babilonia markan reyipänwa, Ezequías reyin usupat k'umaraptxatapat yatisinxa, qillqatanakampi waxt'äwinakampi uka khithanakaparux apayanïna.
[2] Ezequiasax jupanakar uñjasax kusisïnwa, ukatsti qamir kankañapa uñacht'ayäna, qullqi, quri, q'apkiri qullanaka, suma aceite, ukxarusti nuwasiñ yänakan utanakap uñacht'ayäna, kunanakampitix yänak imañ utanakapana, reyin utapana, ukhamarak taqi uka markpachan utjkäna taqi ukanak uñacht'ayäna.
[3] Ukat Isaías profetax Ezequías reyin ukar uñjiriw saräna, juparusti jiskt'arakïnwa: —¿Kawkitsa uka jaqinakax jutapxatayna, kamsapxaraktamsti? —sasa. Ezequiasasti sarakïnwa: —Babilonia uka jaya markat jutapxatayna —sasa.
[4] Isaías profetasti jiskt'askakïnwa: —¿Kunarak reyi utaman uñjapxisti? —sasa. Ezequiasasti sarakïnwa: —Taqi kun uñjapxi, kunanakatix reyi utaxana, yänak imañ utanakaxansa utjki taqi ukanak uñacht'ayta —sasa.
[5] Isaías profetasti Ezequías reyirux sarakïnwa: —Taqi ch'amani Tatitun arunakap ist'am:
[6] ‘Mä uruw purinini, kunatix reyi utaman utjki, kunanaktix nayra awkinakamas imapkän ukanakax Babiloniar apatäniwa. Janirakiw akarux kunas qhiparkxaniti.
[7] Yaqhipanakat pachpa wawanakamaruw Babiloniar apapxani, kapsusinsti, reyin utapan luqtirïpxañapatakiw uskupxani.’
[8] Ezequiasasti jakañapkamaxa, sumankañampi, jan llakisiñampi utjaskañap amuyäna, ukat Isaías profetarux säna: —Tatitutix ukhamäñap munchixa, walikiwa —sasa.