<متى 9

[1] وَ خَلَاصْ عِيسَى رِكِبْ فِي الْمَرْكَبَةْ وَ قَطَعْ الْبَحَرْ وَ قَبَّلْ فِي حِلِّتَهْ كَفَرْ نَاحُومْ.

[2] وَ نَاسْ وَاحِدِينْ جَابَوْا لَيَّهْ رَاجِلْ مُكَرْسَحْ رَاقِدْ فِي سَرِيرَهْ. وَ عِيسَى شَافْ إِيمَانْهُمْ وَ قَالْ لِلرَّاجِلْ الْمَعْدُورْ: يَا وِلَيْدِي، شِدّ حَيْلَكْ. أَنَا غَفَرْت لَيْك ذُنُوبَكْ.

[3] وَ وَاحِدِينْ مِنْ الْعُلَمَاء قَالَوْا فِي قُلُوبْهُمْ: كَلَامْ النَّادُمْ دَا كَلَامْ مُشْرِكْ.

[4] وَ عِيسَى عِرِفْ فِكِرْهُمْ. وَ سَأَلَاهُمْ وَ قَالْ: مَالَا تُقُولُوا شَيْء فَسِلْ فِي قُلُوبْكُو؟

[5] وَيْنُو الْهَيِّنْ نُقُولَهْ مِنْ الْكَلَامْ الْإِتْنَيْن دَوْل؟ نُقُولْ «غَفَرْت لَيْك ذُنُوبَكْ» وَلَّا نُقُولْ «قُمّ وَ رُوغْ»؟

[6] أَنَا نِدَوْر إِنْتُو تَعَرْفُوا كَدَرْ أَنَا إِبْن الْإِنْسَانْ عِنْدِي قُدْرَةْ فِي الْأَرْض لِنَغْفِرْ الذُّنُوبْ لِلنَّاسْ. وَ حَجَّى لِلْمَعْدُورْ وَ قَالْ: قُمّ، شِيلْ سَرِيرَكْ وَ أَمْشِي بَيْتَكْ.

[7] وَ خَلَاصْ النَّادُمْ قَمَّ وَ مَشَى بَيْتَهْ.

[8] وَكِتْ النَّاسْ شَافَوْه، خَافَوْا بِلْحَيْن وَ شَكَرَوْا اللّٰهْ أَشَانْ هُو أَنْطَى قُدْرَةْ مِثِلْ دِي لِلنَّاسْ.

[9] وَ عِيسَى مَاشِي جَنْب مَكْتَبْ الْجَمَارِكْ وَ شَافْ نَادُمْ وَاحِدْ قَاعِدْ بَخْدِمْ فَوْقَهْ وَ أُسْمَهْ مَتَّى. وَ عِيسَى قَالْ لَيَّهْ: تَعَالْ تَابِعْنِي. وَ خَلَاصْ قَمَّ فَوْق وَ تَابَعَهْ.

[10] وَ عِيسَى عَشَّى فِي بَيْت مَتَّى وَ نَاسْ كَتِيرِينْ جَوْا مِنْ نَاسْ الْجَمَارِكْ وَ مُذْنِبِينْ آخَرِينْ مِثِلْهُمْ. وَ جَوْا قَعَدَوْا مَعَ عِيسَى وَ تَلَامِيذَهْ.

[11] وَ وَاحِدِينْ مِنْ الْفَرِيسِيِّينْ شَافَوْهُمْ وَ سَأَلَوْا تَلَامِيذَهْ وَ قَالَوْا: مَالَا سَيِّدْكُو يَاكُلْ مَعَ نَاسْ الْجَمَارِكْ وَ الْمُذْنِبِينْ؟

[12] وَ عِيسَى سِمِعْ كَلَامْهُمْ وَ قَالْ: نَاسْ طَيِّبِينْ مَا حَوْجَانِينْ دَكْتَوْر، إِلَّا الْمَرْضَانِينْ بَسْ الْحَوْجَانِينْ.

[13] أَمْشُوا أَقْرُوا كَلَامْ اللّٰهْ الْبُقُولْ ‹سَوُّوا الْخَيْر. دَا بَسْ النِّدَوْرَهْ مِنْكُو، مَا الضَّحِيَّةْ› وَ فَكُّرُوا فِي مَعَنَاتَهْ. وَ خَلَاصْ، أَنَا مَا جِيتْ أَشَانْ نِنَادِي الصَّالِحِينْ لِلتَّوْبَةْ لَاكِنْ جِيتْ أَشَانْ نِنَادِي الْمُذْنِبِينْ.

[14] وَاحِدِينْ مِنْ تَلَامِيذْ يَحْيَى جَوْا لِعِيسَى وَ سَأَلَوْه وَ قَالَوْا: أَنِحْنَ نُصُومُوا وَ الْفَرِيسِيِّينْ كُلَ بُصُومُوا. مَالَا تَلَامِيذَكْ مَا بُصُومُوا؟

[15] وَ عِيسَى رَدَّ لَيْهُمْ وَ قَالْ: كَانْ نَاسْ قَاعِدِينْ فِي عِرِسْ وَ الْعَرِيسْ مَعَاهُمْ، يَحَزْنَوْا وَلَّا؟ وَ لَاكِنْ يَوْم وَاحِدْ بَجِي وَ الْعَرِيسْ بَشِيلُوهْ مِنْهُمْ وَ فِي الْوَكِتْ دَاكْ، بُصُومُوا.

[16] مَا فِي نَادُمْ الْيَرْقَعْ قِطْعَةْ جَدِيدَةْ فِي خَلَقْ قَدِيمْ أَشَانْ الرُّقْعَةْ الْجَدِيدَةْ تِشَرِّطْ الْخَلَقْ الْقَدِيمْ وَ الْقَدّ يَبْقَى زِيَادَةْ مِنْ أَوَّلْ.

[17] وَ النَّاسْ مَا بُصُبُّوا خَمَرْ جَدِيدْ فِي قِرْبَةْ قَدِيمَةْ أَشَانْ كَانْ سَوَّوْا مِثِلْ دَا، الْقِرْبَةْ تِنْشَقَّ. وَ مِثِلْ دَا، الْخَمَرْ بِدَفِّقْ وَ الْقِرْبَةْ تَتْلَفْ. وَ لَاكِنْ بُصُبُّوا الْخَمَرْ الْجَدِيدْ فِي قِرْبَةْ جَدِيدَةْ وَ مِثِلْ دَا، يَحْفَضَوْا الْخَمَرْ مَعَ الْقِرْبَةْ سَوَا.

[18] وَ وَكِتْ عِيسَى قَاعِدْ يِحَجِّي فِي الْكَلَامْ دَا، نَادُمْ وَاحِدْ مَسْؤُولْ فِي بَيْت الصَّلَاةْ جَاءْ وَ سَجَدْ قِدَّامَهْ وَ قَالْ:

[19] بِنَيْتِي دَهَابْهَا مَاتَتْ وَ لَاكِنْ تَعَالْ أَلْمَسْهَا بِإِيدَكْ وَ هِي تَحْيَى. وَ عِيسَى قَمَّ وَ مَشَى مَعَايَهْ وَ تَلَامِيذَهْ كُلَ مَشَوْا مَعَايَهْ سَوَا.

[20] وَ مَرَةْ وَاحِدَةْ قَرَّبَتْ لِعِيسَى مِنْ وَرَايَهْ وَ هِي تَعْبَانَةْ. دَمَّهَا بِدَفِّقْ مِنْ أَتْنَا عَشَرْ سَنَةْ. وَ جَاتْ لِمْسَتْ طَرَفْ خَلَقَهْ

[21] وَ قَالَتْ فِي قَلِبْهَا: كَانْ لِمِسْت خُلْقَانَهْ نَلْقَى الْعَافَيْ.

[22] وَ عِيسَى أَنْلَفَتْ وَ شَافَاهَا وَ قَالْ: يَا بِنَيْتِي، شِدِّي حَيْلكِ. إِيمَانْكِ بَيِّ نَجَّاكِ. وَ خَلَاصْ مِنْ الْوَكِتْ دَا بَسْ، هِي لِقَتْ الْعَافَيْ.

[23] وَ عِيسَى دَخَلْ فِي بَيْت الْمَسْؤُولْ وَ شَافْ ضَرَّابِينْ الْكَيْتَةْ هَنَا الْمَوْت وَ نَاسْ قَاعِدِينْ يَبْكُوا كَتِيرْ.

[24] وَ عِيسَى قَالْ لَيْهُمْ: يَلَّا أَمْشُوا. الْبِنَيَّةْ مَا مَاتَتْ. هِي نَايْمَةْ بَسْ. وَ ضِحِكَوْا لَيَّهْ.

[25] وَ وَكِتْ كُلَّ النَّاسْ مَرَقَوْا، عِيسَى دَخَلْ فِي لُبّ الْبَيْت وَ كَرَبْ إِيدْ الْبِنَيَّةْ وَ هِي قَمَّتْ.

[26] وَ الْخَبَرْ دَا أَنْسَمَعْ فِي كُلَّ الْبَلَدْ دِي.

[27] وَ عِيسَى مَاشِي قِدَّامْ وَ عَمْيَانِينْ إِتْنَيْن تَابَعَوْه. وَ قَاعِدِينْ يَصَرْخَوْا وَ قَالَوْا: يَا إِبْن دَاوُدْ أَرْحَمْنَا.

[28] وَ وَكِتْ عِيسَى دَخَلْ فِي الْبَيْت، هُمَّنْ جَوْا لَيَّهْ وَ هُو سَأَلَاهُمْ وَ قَالْ: صَحِيحْ إِنْتُو تِآمُنُوا كَدَرْ عِنْدِي قُدْرَةْ نِدَاوِيكُو وَلَّا؟ وَ رَدَّوْا لَيَّهْ وَ قَالَوْا: أَيْوَى، سَيِّدْنَا.

[29] وَ عِيسَى لِمِسْ عُيُونْهُمْ وَ قَالْ: خَلِّي يَبْقَى لَيْكُو مِثِلْ آمَنْتُوا بَيَّهْ.

[30] وَ خَلَاصْ عُيُونْهُمْ أَنْفَتَحَوْا وَ شَافَوْا. وَ عِيسَى أَمَرَاهُمْ وَ قَالْ: أَنْقَرْعُوا. مَا تِأَوْرُوا بَيَّهْ نَادُمْ وَاحِدْ.

[31] وَ لَاكِنْ مَشَوْا وَ شَتَّتَوْا الْخَبَرْ دَا وَ أُسْمَهْ طَلَعْ فِي كُلَّ الْبَلَدْ دِي.

[32] وَ وَكِتْ الرُّجَالْ دَوْل مَارْقِينْ مِنْ الْبَيْت، نَاسْ وَاحِدِينْ جَابَوْا نَادُمْ أَبْكَمْ وَ هُو مُشَوْطِنْ.

[33] وَ عِيسَى طَرَدْ شَيطَانَهْ وَ الْأَبْكَمْ قَمَّ بِحَجِّي. وَ النَّاسْ عَجَّبَوْا بِلْحَيْن وَ قَالَوْا: شَيْء عَجِيبْ مِثِلْ دَا أَبَداً مَا شِفْنَا فِي دَارْ إِسْرَائِيلْ.

[34] وَ لَاكِنْ الْفَرِيسِيِّينْ قَالَوْا: النَّادُمْ دَا يَطْرُدْ الشَّوَاطِينْ بِقُدْرَةْ كَبِيرْ الشَّوَاطِينْ.

[35] عِيسَى قَاعِدْ يُرُوغْ فِي أَيِّ مَدِينَةْ وَ أَيِّ حِلَّةْ وَ يِعَلِّمْ النَّاسْ فِي بُيُوتْ الصَّلَاةْ وَ يِبَلِّغْ بِشَارَةْ الْمَمْلَكَةْ وَ يِدَاوِي كُلَّ نَادُمْ الْعِنْدَهْ أَيِّ مَرَضْ.

[36] وَ عِيسَى شَافْ نَاسْ كَتِيرِينْ بِلْحَيْن جَايِينْ لَيَّهْ وَ حَنَّ فَوْقهُمْ أَشَانْ هُمَّنْ تَعْبَانِينْ وَ مُشَتَّتِينْ مِثِلْ غَنَمْ الْمَا عِنْدُهُمْ رَاعِي.

[37] وَ قَالْ لِتَلَامِيذَهْ: النَّاسْ دَوْل مِثِلْ زَرَعْ كَبِيرْ وَ غَلِّتَهْ نِجْضَتْ خَلَاصْ وَ لَاكِنْ النَّاسْ الْيَخْدُمُوا شِيَّةْ.

[38] أَشَانْ دا، أَطْلُبُوا مِنْ سِيدْ الزَّرَعْ هُو يِرَسِّلْ خَدَّامِينَهْ يِلِمُّوا غَلِّتَهْ.