[1] وَكِتْ عِيسَى كَمَّلْ كَلَامَهْ دَا، هُو قَالْ لِتَلَامِيذَهْ:
[2] تَعَرْفُوا بَعَدْ يَوْمَيْن عِيدْ الْفِصْحَةْ بَجِي وَ يَسَلُّمُوا إِبْن الْإِنْسَانْ لِلْكُبَارَاتْ أَشَانْ يَكْتُلُوهْ فِي الصَّلِيبْ.
[3] وَ فِي الْوَكِتْ دَا، كُبَارَاتْ رُجَالْ الدِّينْ وَ الشُّيُوخْ لَمَّوْا فِي بَيْت قَيَافَا وَ هُو كَبِيرْ رُجَالْ الدِّينْ.
[4] وَ رَكَنَوْا كِكَّيْف يَكُرْبُوا عِيسَى بِالعَشِيرْ وَ يَكْتُلُوهْ.
[5] وَ قَالَوْا أَمْبَيْنَاتْهُمْ: مَا نَكُرْبُوهْ فِي أَيَّامْ الْعِيدْ أَشَانْ أَكُونْ فِتْنَةْ تَبْقَى أَمْبَيْنَاتْ النَّاسْ.
[6] عِيسَى قَاعِدْ فِي حِلَّةْ أُسُمْهَا بَيْت عَنْيَا فِي بَيْت سِمْعَانْ الْمُبَرِّصْ.
[7] وَ مَرَةْ وَاحِدَةْ جَاتْ لَيَّهْ وَ جَابَتْ قَزَازَةْ هَنَا عِطِر غَالِي بِلْحَيْن وَ صَبَّتَهْ كُلَّ كَيْ فِي رَاسْ عِيسَى وَكِتْ هُو قَاعِدْ يِنْجَمَّ.
[8] وَ وَكِتْ التَّلَامِيذْ شَافَوْا الشَّيْء الْهِي تِسَوِّيهْ، زِعِلَوْا وَ قَالَوْا: مَالَا تَلَّفَتْ الْمَالْ مِثِلْ دَا؟
[9] كَانْ بِعْنَا الْعِطِرْ دَا، نَلْقَوْا قُرُسْ كَتِيرْ أَشَانْ نَنْطُوهْ لِلْمَسَاكِينْ.
[10] وَ عِيسَى عِرِفْ كَلَامْهُمْ وَ قَالْ لَيْهُمْ: مَالَا تِبَشْتُنُوا الْمَرَةْ دِي؟ هِي سَوَّتْ لَيِّ شَيْء سَمَحْ.
[11] الْمَسَاكِينْ قَاعِدِينْ مَعَاكُو دَايْماً وَ لَاكِنْ أَنَا كَمَانْ مَا نَقْعُدْ مَعَاكُو دَايْماً.
[12] هِي صَبَّتْ الْعِطِرْ فِي جِلْدِي وَ مِثِلْ كَيْ جَهَّزَتْنِي لِلْقَبُرْ.
[13] نُقُولْ لَيْكُو الْحَقّ، فِي أَيِّ بَكَانْ فِي الدُّنْيَا الْيِبَلُّغُوا فَوْقَهْ الْبِشَارَةْ، يِحَجُّوا فِي الشَّيْء الْهِي سَوَّتَهْ وَ يِذَكُّرُوهَا.
[14] وَ فِي الْبَكَانْ دَا، وَاحِدْ مِنْ التَّلَامِيذْ الْأَتْنَا عَشَرْ أُسْمَهْ يَهُوذَا الْإِسْخَرِيَوْطِي مَشَى لِكُبَارَاتْ رُجَالْ الدِّينْ.
[15] وَ قَالْ لَيْهُمْ: تَنْطُونِي كَمْ أَشَانْ نِسَلِّمْ لَيْكُو عِيسَى؟ وَ حَسَبَوْا لَيَّهْ تَلَاتِينْ رِيَالْ فُضَّةْ.
[16] وَ مِنْ الْوَكِتْ دَاكْ، يَهُوذَا قَاعِدْ يِفَتِّشْ فُرْصَةْ أَشَانْ يِسَلِّمْ لَيْهُمْ عِيسَى.
[17] وَ أَوَّلْ يَوْم مِنْ أَيَّامْ عِيدْ الْخُبْزَةْ الْمَا عِنْدَهَا تَوَّارَةْ، تَلَامِيذْ عِيسَى جَوْا لَيَّهْ وَ قَالَوْا: تِدَوْر أَنِحْنَ نَمْشُوا وَيْن أَشَانْ نِحَصُّلُوا لَيْك عَشَاءْ هَنَا الْفِصْحَةْ؟
[18] وَ رَدَّ لَيْهُمْ وَ قَالْ: أَدْخُلُوا فِي الْمَدِينَةْ وَ أَمْشُوا فِي بَيْت فِيلَانْ وَ قُولُوا لَيَّهْ «الْمُعَلِّمْ يُقُولْ لَيْك وَكْتِي قَرَّبْ خَلَاصْ وَ نَاكُلْ الْعَشَاءْ مَعَ تَلَامِيذِي فِي بَيْتَكْ».
[19] وَ التَّلَامِيذْ سَوَّوْا كُلَّ شَيْء مِثِلْ هُو قَالَهْ لَيْهُمْ وَ حَصَّلَوْا عَشَاءْ هَنَا عِيدْ الْفِصْحَةْ.
[20] وَ فِي الْمَغَرِبْ عِيسَى قَاعِدْ يِنْجَمَّ مَعَ الْأَتْنَا عَشَرْ.
[21] وَ وَكِتْ قَاعِدِينْ يَاكُلُوا، هُو قَالْ: نُقُولْ لَيْكُو الْحَقّ، نَادُمْ وَاحِدْ مِنْكُو يُخُونِّي.
[22] وَ حِزْنَوْا بِلْحَيْن. وَ أَيِّ نَادُمْ مِنْهُمْ سَأَلَهْ وَ قَالْ: يَا سَيِّدْنَا، أَنَا وَلَّا؟
[23] وَ رَدَّ لَيْهُمْ وَ قَالْ: النَّادُمْ الْيِدِسّ إِيدَهْ مَعَايِ فِي الْمَاعُونْ، هُو بَسْ الْيُخُونِّي.
[24] لَابُدَّ إِبْن الْإِنْسَانْ يُمُوتْ مِثِلْ مَكْتُوبْ لَيَّهْ فِي الْكِتَابْ وَ لَاكِنْ الْعَذَابْ يَرْجَى الرَّاجِلْ الْيُخُونْ إِبْن الْإِنْسَانْ. أَخَيْر لِلرَّاجِلْ دَا كَانْ مَا وِلْدَوْه.
[25] وَ يَهُوذَا الْخَانَهْ سَأَلَهْ وَ قَالْ: يَا مُعَلِّمْ، أَنَا وَلَّا؟ وَ عِيسَى رَدَّ لَيَّهْ: إِنْتَ بَسْ قُلْتَهْ.
[26] وَ وَكِتْ قَاعِدِينْ يِلْعَشَّوْا، عِيسَى شَالْ خُبْزَةْ وَاحِدَةْ وَ شَكَرْ اللّٰهْ وَ كَسَرْهَا وَ أَنْطَاهَا لِتَلَامِيذَهْ وَ قَالْ: شِيلُوهْ وَ آكُلُوهْ. دَا جِسْمِي.
[27] وَ شَالْ كَاسْ وَ شَكَرْ اللّٰهْ وَ أَنْطَاهْ لَيْهُمْ وَ قَالْ: أَشَرْبَوْا مِنَّهْ كُلِّ وَاحِدْ مِنْكُو.
[28] الْفِي الْكَاسْ دَا يِوَصِّفْ دَمِّي الْهُو هَنَا الْمُعَاهَدَةْ الْجَدِيدَةْ. وَ دَمِّي يِدَفِّقْ فِي شَانْ نَاسْ كَتِيرِينْ أَشَانْ اللّٰهْ يَغْفِرْ لَيْهُمْ ذُنُوبْهُمْ.
[29] وَ نُقُولْ لَيْكُو، مِنْ الْيَوْم مَا نَشْرَبْ بَتَّانْ مِنْ عَصِيرْ الْعِنَبْ لَحَدِّي الْيَوْم النَّشَرْبَهْ مِنْ جَدِيدْ مَعَاكُو فِي مَمْلَكَةْ أَبُوِي.
[30] وَ مَدَحَوْا بِالزَّبُورْ وَ مَرَقَوْا مِنْ الْمَدِينَةْ وَ مَشَوْا فِي جَبَلْ الزَّيْتُونْ.
[31] وَ عِيسَى قَالْ لَيْهُمْ: اللَّيْلَةْ دِي كُلُّكُو تَخَافَوْا وَ تِخَلُّونِي أَشَانْ مَكْتُوبْ فِي الْكِتَابْ ‹نَضْرُبْ الرَّاعِي وَ الْغَنَمْ يِشَتُّتُوا›.
[32] وَ لَاكِنْ بَعَدْ أَنَا بَعَثْت، نَمْشِي قِدَّامْكُو فِي دَارْ الْجَلِيلْ.
[33] وَ بُطْرُسْ رَدَّ لَيَّهْ وَ قَالْ: كَانْ كُلَّ الْآخَرِينْ يِخَلُّوكْ كُلَ، أَنَا مَا نِخَلِّيكْ.
[34] عِيسَى رَدَّ لَيَّهْ وَ قَالْ: نُقُولْ لَيْك الْحَقّ، اللَّيْلَةْ دِي قُبَّالْ الدِّيكْ مَا يِعَوْعِي، إِنْتَ تَنْكُرْنِي تَلَاتَةْ مَرَّاتْ.
[35] وَ بُطْرُسْ قَالْ: أَنَا كَانْ نُمُوتْ مَعَاكْ كُلَ، أَبَداً مَا نَنْكُرَكْ. وَ كُلَّ التَّلَامِيذْ قَالَوْا نَفْس الشَّيْء.
[36] وَ خَلَاصْ عِيسَى وَ تَلَامِيذَهْ مَشَوْا فِي بَكَانْ أُسْمَهْ جَثْسِي مَانِي وَ قَالْ لَيْهُمْ: أَقْعُدُوا هِنِي وَ أَنَا نَمْشِي قِدَّامْ أَشَانْ نِصَلِّي.
[37] وَ شَالْ مَعَايَهْ بُطْرُسْ وَ أَوْلَادْ زَبَدِي الْإِتْنَيْن وَ بِقِي حَزْنَانْ وَ بَدَأْ يَتْعَبْ بِلْحَيْن.
[38] وَ قَالْ لَيْهُمْ: قَلْبِي بِقِي حَزْنَانْ مَرَّةْ وَاحِدْ لَحَدِّي نِدَوْر الْمَوْت. أَقْعُدُوا هِنِي وَاعِيِينْ مَعَايِ.
[39] وَ مَشَى قِدَّامْ مِنْهُمْ شِيَّةْ وَ سَجَدْ فِي الْأَرْض وَ سَأَلْ اللّٰهْ وَ قَالْ: يَا أَبُوِي، خَلِّي كَاسْ التَّعَبْ دَا يُفُوتْ مِنِّي بَعِيدْ، كَانْ دَا مُمْكِنْ. وَ لَاكِنْ خَلِّي يَبْقَى مِثِلْ إِنْتَ تِدَوْرَهْ وَ مَا مِثِلْ أَنَا نِدَوْرَهْ.
[40] وَ قَبَّلْ لِلتَّلَامِيذْ وَ لِقِيهُمْ نَايْمِينْ وَ قَالْ لِبُطْرُسْ: سَاعَةْ وَاحِدَةْ كُلَ مَا قِدِرْتُوا تَقْعُدُوا مَعَايِ وَاعِيِينْ؟
[41] أَقْعُدُوا وَاعِيِينْ وَ أَسْأَلَوْا اللّٰهْ أَشَانْ التَّعَبْ مَا يِجَرِّبْ إِيمَانْكُو وَ يِتَلِّفَهْ. أَشَانْ الْإِنْسَانْ عِنْدَهْ نِيَّةْ لَاكِنْ مَا عِنْدَهْ قُدْرَةْ.
[42] وَ مَرَّةْ تَانِيَةْ مَشَى سَأَلْ اللّٰهْ وَ قَالْ: يَا أَبُوِي، كَانْ مَا مُمْكِنْ كَاسْ التَّعَبْ يُفُوتْ مِنِّي إِلَّا نَشَرْبَهْ، خَلَاصْ خَلِّي يَبْقَى مِثِلْ إِنْتَ تِدَوْرَهْ.
[43] وَ قَبَّلْ لِلتَّلَامِيذْ وَ بَتَّانْ لِقِيهُمْ نَايِمِينْ أَشَانْ النَّوْم شَالَاهُمْ.
[44] وَ خَلَاهُمْ وَ مَشَى سَأَلْ اللّٰهْ تَالِتْ مَرَّةْ وَ قَالْ نَفْس الشَّيْء مِثِلْ قِبَيْل.
[45] وَ بَعَدَيْن قَبَّلْ لِتَلَامِيذَهْ وَ قَالْ: إِنْتُو نَايْمِينْ وَلَّا؟ تِدَوْرُوا تِنْجَمَّوْا؟ خَلَاصْ الْوَكِتْ تَمَّ. إِبْن الْإِنْسَانْ خَانَوْه خَلَاصْ وَ يِسَلُّمُوهْ لِلْمُذْنِبِينْ.
[46] قُمُّوا نَمْشُوا. شِيفُوا الْيُخُونِّي جَايِ.
[47] وَ عِيسَى لِسَّاعْ مَا كَمَّلْ الْكَلَامْ دَا وَ يَهُوذَا جَاءْ. هُو وَاحِدْ مِنْ التَّلَامِيذْ الْأَتْنَا عَشَرْ وَ جَابْ مَعَايَهْ نَاسْ كَتِيرِينْ عِنْدُهُمْ سُيُوفْ وَ عِصَايْ. كُبَارَاتْ رُجَالْ الدِّينْ وَ الشُّيُوخْ رَسَّلَوْهُمْ.
[48] وَ الْخَايِنْ أَنْطَاهُمْ عَلَامَةْ مِنْ أَوَّلْ وَ قَالْ: النَّادُمْ النِّحِبَّهْ، دَا بَسْ هُو. أَكُرْبُوهْ.
[49] وَ عَجَلَةْ كَيْ مَشَى لِعِيسَى وَ قَالْ: يَا سَيِّدْنَا، السَّلَامْ عَلَيْك. وَ حَبَّاهْ.
[50] وَ عِيسَى قَالْ لَيَّهْ: يَا رَفِيقِي، مَالَا إِنْتَ جِيتْ؟ وَ جَوْا كَرَبَوْا عِيسَى.
[51] وَ وَاحِدْ مِنْ النَّاسْ الْقَاعِدِينْ مَعَ عِيسَى مَدَّ إِيدَهْ وَ سَلَّ سَيْفَهْ وَ ضَرَبْ عَبِدْ هَنَا كَبِيرْ رُجَالْ الدِّينْ وَ قَطَعْ أَدَانَهْ.
[52] وَ عِيسَى قَالْ لَيَّهْ: دَخِّلْ سَيْفَكْ فِي بَيْتَهْ أَشَانْ أَيِّ نَادُمْ الْيِسِلّ السَّيْف يُمُوتْ بِالسَّيْف.
[53] وَ فِكِرْكُو شُنُو؟ مَا نَقْدَرْ نَسْأَلْ مُسَاعَدَةْ مِنْ أَبُوِي أَشَانْ يِرَسِّلْ لَيِّ أُلُوفْ مِنْ الْمَلَائِكَةْ وَ يِدَاوُسُوا لَيِّ وَلَّا؟
[54] وَ لَاكِنْ كَانْ سَوَّيْت كَيْ، كِكَّيْف الْكَلَامْ الْمَكْتُوبْ فِي الْكِتَابْ يَبْقَى؟ الْكِتَابْ بُقُولْ الشَّيْء الْقَاعِدْ يَبْقَى هِنِي لَابُدَّ يَبْقَى.
[55] وَ عِيسَى حَجَّى لِلنَّاسْ وَ قَالْ: كِكَّيْف؟ إِنْتُو جِيتُوا تَكُرْبُونِي بِسَيْف وَ عَصَاءْ. أَنَا مُجْرِمْ وَلَّا؟ كُلِّ يَوْم أَنَا قَاعِدْ فِي حَوْش بَيْت اللّٰهْ وَ قَاعِدْ نِعَلِّمْ النَّاسْ وَ إِنْتُو مَا كَرَبْتُونِي.
[56] وَ لَاكِنْ بِقِي مِثِلْ دَا أَشَانْ كُلَّ شَيْء الْأَنْبِيَاءْ كَتَبَوْه يَبْقَى. وَ خَلَاصْ كُلَّ تَلَامِيذَهْ خَلَّوْه وَ جَرَوْا.
[57] وَ النَّاسْ الْكَرَبَوْا عِيسَى وَدَّوْه فِي بَيْت قَيَافَا كَبِيرْ رُجَالْ الدِّينْ. الْعُلَمَاء وَ الشُّيُوخْ لَمَّوْا فِي بَيْتَهْ وَ قَاعِدِينْ يَرْجَوْهُمْ.
[58] وَ بُطْرُسْ تَابَعَهْ مِنْ بَعِيدْ لَحَدِّي بَيْت هَنَا كَبِيرْ رُجَالْ الدِّينْ وَ أَنْدَسَّ وَ قَعَدْ تِحِتْ بَيْن الْعَسْكَرْ أَشَانْ يِشِيفْ الشَّيْء الْيَبْقَى.
[59] وَ كُبَارَاتْ رُجَالْ الدِّينْ وَ كُلَّ نَاسْ هَنَا الْمَجْلِسْ الْكَبِيرْ لَمَّوْا وَ أَشَّاوَرَوْا. وَ فَتَّشَوْا شُهُودْ كَدَّابِينْ أَشَانْ يَحْكُمُوا عِيسَى بِالْمَوْت.
[60] وَ شُهُودْ كَدَّابِينْ كَتِيرِينْ جَوْا وَ لَاكِنْ مَا لِقَوْا نَاسْ إِتْنَيْن الْكَلَامْهُمْ وَاحِدْ. وَ بَعَدْ وَكِتْ طَوِيلْ، نَاسَيْن قَمَّوْا
[61] وَ قَالَوْا: النَّادُمْ دَا قَالْ «أَنَا نَقْدَرْ نِكَسِّرْ بَيْت اللّٰهْ وَ فِي تَلَاتَةْ يَوْم نَبْنِيهْ بَتَّانْ».
[62] وَ كَبِيرْ رُجَالْ الدِّينْ قَمَّ وَ سَأَلْ عِيسَى قَالْ: مَا تُرُدّ لِشَهَادِتْهُمْ فَوْقَكْ وَلَّا؟
[63] وَ لَاكِنْ عِيسَى قَاعِدْ سَاكِتْ بَسْ. وَ كَبِيرْ رُجَالْ الدِّينْ سَأَلَهْ بَتَّانْ وَ قَالْ: نِحَلَّفَكْ بِأُسُمْ اللّٰهْ الْحَيّ. قُولْ لَيْنَا إِنْتَ الْمَسِيحْ إِبْن اللّٰهْ وَلَّا؟
[64] وَ عِيسَى رَدَّ لَيَّهْ وَ قَالْ: مِثِلْ إِنْتَ قُلْتَهْ. وَ نُقُولْ لَيْكُو يَوْم وَاحِدْ بَجِي تِشِيفُوا إِبْن الْإِنْسَانْ فِي كُرْسِي جَنْب اللّٰهْ الْقَادِرْ فِي نُصَّهْ الزَّيْنَايْ وَ تِشِيفُوهْ رَاكِبْ فِي السَّحَابْ جَايِ مِنْ السَّمَاءْ.
[65] وَ كَبِيرْ رُجَالْ الدِّينْ قَمَّ شَقَّ خَلَقَهْ مِنْ الزَّعَلْ وَ قَالْ: خَلَاصْ. هُو أَشْرَكْ. وَ بَتَّانْ مَا نِدَوْرُوا شَاهِدْ آخَرْ. إِنْتُو ذَاتْكُو سِمِعْتُوا كَلَامْ الْمُشْرِكْ دَا.
[66] قَرَارْكُو شُنُو؟ وَ رَدَّوْا لَيَّهْ وَ قَالَوْا: هُو خَاطِي وَ وَاجِبْ لَيَّهْ الْمَوْت.
[67] وَ بَزَّقَوْا فِي وِجْهَهْ وَ ضَرَبَوْه وَ وَاحِدِينْ شَدَّقَوْه
[68] وَ قَالَوْا: يَا الْمَسِيحْ، حَجِّي لَيْنَا كَلَامْ نَازِلْ مِنْ اللّٰهْ وَ قُولْ لَيْنَا يَاتُو الضَّرَبَكْ.
[69] وَ فِي الْوَكِتْ دَاكْ، بُطْرُسْ قَاعِدْ فِي الْحَوْش. وَ خَدَّامَةْ وَاحِدَةْ جَاتْ لَيَّهْ وَ قَالَتْ: إِنْتَ مَعَ عِيسَى الْجَلِيلِي دَا.
[70] وَ قِدَّامْ كُلَّ النَّاسْ بُطْرُسْ نَكَرَهْ وَ قَالْ: كَلَامْكِ دَا مَا نَعَرْفَهْ.
[71] وَ مَشَى فِي خَشُمْ الْحَوْش وَ خَدَّامَةْ آخَرَةْ كُلَ شَافَتَهْ وَ عِرِفَتَهْ وَ حَجَّتْ لِلنَّاسْ الْقَاعِدِينْ هِنَاكْ وَ قَالَتْ: النَّادُمْ دَا كُلَ مَعَ عِيسَى الْمِنْ النَّاصِرَةْ.
[72] وَ تَانِي مَرَّةْ بُطْرُسْ نَكَرْ الْكَلَامْ وَ حَلَفْ وَ قَالْ: أَنَا مَا نَعَرِفْ الرَّاجِلْ دَا.
[73] وَ بَعَدْ شِيَّةْ، النَّاسْ الْوَاقْفِينْ هِنَاكْ جَوْا لَيَّهْ وَ قَالَوْا: صَحِيحْ، إِنْتَ وَاحِدْ مِنْهُمْ. نَعَرْفُوكْ أَشَانْ لِسَانَكْ مِثِلْ لِسَانْهُمْ.
[74] وَ بُطْرُسْ قَمَّ يَحْلِفْ وَ قَالْ: خَلِّي اللّٰهْ يَنْعَلْنِي كَانْ كَلَامِي مَا صَحِيحْ. أَبَداً مَا نَعَرِفْ الرَّاجِلْ دَا. وَ عَجَلَةْ كَيْ الدِّيكْ عَوْعَى.
[75] وَ بُطْرُسْ فَكَّرْ فِي الْكَلَامْ الْعِيسَى قَالَهْ «قُبَّالْ الدِّيكْ مَا يِعَوْعِي، تَنْكُرْنِي تَلَاتَةْ مَرَّاتْ». وَ بُطْرُسْ مَرَقْ مِنْ الْبَيْت وَ بَكَى بَكِي شَدِيدْ مَرَّةْ وَاحِدْ.