[1] وِلْدَوْا عِيسَى فِي حِلَّةْ بَيْت لَحَمْ فِي دَارْ الْيَهُودِيَّةْ فِي زَمَنْ الْمَلِكْ هِرُودُسْ. وَ بَعَدْ وِلْدَوْه، مُسَافِرِينْ وَاحِدِينْ جَوْا لِمَدِينَةْ الْقُدُسْ مِنْ الصَّبَاحْ. وَ هُمَّنْ مُنَجِّمِينْ.
[2] وَ سَأَلَوْا النَّاسْ وَ قَالَوْا: وَيْن مَلِكْ الْيَهُودْ الدَّهَابَهْ وِلْدَوْه؟ شِفْنَا نَجْمَتَهْ فِي الصَّبَاحْ وَ جِينَا أَشَانْ نَسْجُدُوا لَيَّهْ.
[3] وَ الْمَلِكْ هِرُودُسْ سِمِعْ الْكَلَامْ دَا وَ بَرْجَلْ. وَ كُلَّ نَاسْ مَدِينَةْ الْقُدُسْ بَرْجَلَوْا مَعَايَهْ.
[4] وَ الْمَلِكْ نَادَى كُبَارَاتْ رُجَالْ الدِّينْ وَ الْعُلَمَاء أَشَانْ يِلِمُّوا قِدَّامَهْ. وَ سَأَلَاهُمْ وَ قَالْ: وَيْن الْبَكَانْ الْيَلْدَوْا فَوْقَهْ الْمَسِيحْ؟
[5] وَ هُمَّنْ رَدَّوْا لَيَّهْ وَ قَالَوْا: يَلْدَوْه فِي بَيْت لَحَمْ فِي دَارْ الْيَهُودِيَّةْ أَشَانْ كَلَامْ النَّبِي الْمَكْتُوبْ فِي الْكِتَابْ بُقُولْ كَيْ
[6] ‹يَا بَيْت لَحَمْ فِي دَارْ بَنِي يَهُوذَا، إِنْتِ مَا حِلَّةْ صَغَيَّرَةْ لِكُبَارَاتْ يَهُوذَا، أَشَانْ نَادُمْ وَاحِدْ يَمْرُقْ مِنْكِ وَ هُو الْحَاكِمْ الْيَبْقَى رَاعِي هَنَا أُمَّتِي بَنِي إِسْرَائِيلْ›.
[7] وَ فِي الْبَكَانْ دَا، هِرُودُسْ نَادَى الْمُنَجِّمِينْ بِعَشِيرْ وَ سَأَلَاهُمْ أَشَانْ يَعَرِفْ مِنْهُمْ الْيَوْم الْأَوَّلْ بَانَتْ بَيَّهْ النَّجْمَةْ.
[8] وَ وَكِتْ سِمِعْ كَلَامْهُمْ رَسَّلَاهُمْ فِي بَيْت لَحَمْ وَ قَالْ لَيْهُمْ: أَمْشُوا وَ فَتُّشُوا عَدِيلْ. وَ وَكِتْ لِقِيتُوا الصَّغِيرْ، تَعَالُوا أَوْرُوْنِي أَشَانْ أَنَا كُلَ نَمْشِي نَسْجُدْ لَيَّهْ.
[9] وَ وَكِتْ سِمْعَوْا كَلَامْ الْمَلِكْ شَالَوْا الدَّرِبْ وَ فَاتَوْا. وَ شَافَوْا النَّجْمَةْ الشَّافَوْهَا أَوَّلْ فِي الصَّبَاحْ وَ هِي تَزْحَفْ قِدَّامْهُمْ لَحَدِّي وِقْفَتْ فِي الْبَكَانْ قَاعِدْ فَوْقَهْ الْوِلَيْد.
[10] وَ وَكِتْ شَافَوْا النَّجْمَةْ بِقَوْا فَرْحَانِينْ مَرَّةْ وَاحِدْ.
[11] وَ دَخَلَوْا فِي لُبّ الْبَيْت وَ لِقَوْا الصَّغِيرْ مَعَ أَمَّهْ مَرِيَمْ وَ سَجَدَوْا لَيَّهْ. وَ جَابَوْا خُمَامْ غَالِي وَ فَكَّوْه وَ قَدَّمَوْه لِعِيسَى. أَنْطَوْه دَهَبْ وَ دُخَّانْ وَ رِيحَةْ مُرَّةْ أُسُمْهَا صِبِرْ.
[12] وَ اللّٰهْ حَجَّى لَيْهُمْ فِي حِلِمْ وَ أَوْرَاهُمْ وَاجِبْ مَا يِقَبُّلُوا لِهِرُودُسْ وَ خَلَاصْ فَاتَوْا فِي دَارْهُمْ بِدَرِبْ آخَرْ.
[13] بَعَدْ الْمُنَجِّمِينْ فَاتَوْا خَلَاصْ، وَاحِدْ مِنْ مَلَائِكَةْ اللّٰهْ جَاءْ لِيُوسُفْ فِي حِلِمْ وَ قَالْ لَيَّهْ: يَلَّا قُمّ. شِيلْ الصَّغِيرْ وَ أَمَّهْ و أَمْشِي بَيْهُمْ فِي مَصِرْ. أَقْعُدْ هِنَاكْ وَ مَا تِقَبِّلْ لَحَدِّي نَنْطِيكْ إِذِنْ. هِرُودُسْ يِفَتِّشْ الصَّغِيرْ وَ يِدَوْر يَكْتُلَهْ.
[14] وَ عَجَلَةْ كَيْ فِي أُسْط اللَّيْل، يُوسُفْ قَمَّ شَالْ الصَّغِيرْ وَ أَمَّهْ وَ جَرَى بَيْهُمْ فِي مَصِرْ.
[15] وَ قَعَدْ هِنَاكْ لَحَدِّي هِرُودُسْ مَاتْ. وَ مِثِلْ دَا، الْكَلَامْ الْاللّٰهْ قَالَهْ زَمَانْ بِخَشُمْ النَّبِي تَمَّ ‹مِنْ مَصِرْ نَادَيْت إِبْنِي›.
[16] وَكِتْ هِرُودُسْ عِرِفْ الْمُنَجِّمِينْ غَشَّوْه، هُو بِقِي زَعْلَانْ بِلْحَيْن. وَ فَكَّرْ فِي الْكَلَامْ الْقَالَوْه لَيَّهْ فِي الْوَكِتْ النَّجْمَةْ بَانَتْ فَوْقَهْ وَ رَسَّلْ عَسْكَرَهْ فِي بَيْت لَحَمْ وَ الْحِلَّالْ الْجَنْبَهَا. وَ أَمَرَاهُمْ أَشَانْ يَكْتُلُوا كُلَّ وِلَيْد الْعُمْرَهْ نَاقِصْ مِنْ سَنَتَيْن.
[17] وَ مِثِلْ دَا، الْكَلَامْ الْاللّٰهْ قَالَهْ زَمَانْ بِخَشُمْ النَّبِي إِرْمِيَّا تَمَّ.
[18] هُو قَالْ ‹سِمْعَوْا كَرَوْرَاكْ فِي حِلَّةْ الرَّامَةْ. بَكِي وَ حِزِنْ شَدِيدْ. رَاحِيلْ أَمّ عِيَالْ يَعْقُوبْ قَاعِدَةْ تَبْكِي لِعِيَالْهَا وَ قَلِبْهَا أَبَى مَا يَرْقُدْ أَشَانْ هُمَّنْ مَاتَوْا خَلَاصْ›.
[19] وَ وَكِتْ هِرُودُسْ مَاتْ، يُوسُفْ قَاعِدْ فِي مَصِرْ وَ وَاحِدْ مِنْ مَلَائِكَةْ اللّٰهْ جَاءْ لَيَّهْ فِي حِلِمْ.
[20] وَ قَالْ: قُمّ، شِيلْ الصَّغِيرْ وَ أَمَّهْ وَ قَبِّلْ بَيْهُمْ فِي دَارْ إِسْرَائِيلْ أَشَانْ النَّاسْ الدَّوَّرَوْا يَكْتُلُوا الصَّغِيرْ مَاتَوْا خَلَاصْ.
[21] وَ يُوسُفْ قَمَّ وَ شَالْ الصَّغِيرْ وَ أَمَّهْ وَ قَبَّلْ بَيْهُمْ فِي دَارْ إِسْرَائِيلْ.
[22] وَ لَاكِنْ أَرْخَلَاوُسْ بِقِي مَلِكْ فِي دَارْ الْيَهُودِيَّةْ فِي بَدَلْ أَبُوهْ هِرُودُسْ وَ مِنْ يُوسُفْ سِمِعْ الْخَبَرْ دَا، خَافْ وَ مَا دَوَّرْ يَمْشِي هِنَاكْ. وَ اللّٰهْ كَلَّمْ لَيَّهْ فِي حِلِمْ وَ هُو شَالْ دَرِبْ هَنَا دَارْ الْجَلِيلْ.
[23] وَ وِصِلْ فِي حِلَّةْ أُسُمْهَا النَّاصِرَةْ وَ قَعَدْ هِنَاكْ. وَ مِثِلْ دَا، الْكَلَامْ النُّبُوَّةْ قَالَوْا تَمَّ. قَالَوْا ‹بِنَادُوهْ نَاصِرِي›.