<متى 18

[1] وَ فِي الْوَكِتْ دَا التَّلَامِيذْ جَوْا لِعِيسَى وَ سَأَلَوْه قَالَوْا: يَاتُو يَبْقَى النَّادُمْ الْكَبِيرْ فِي مَمْلَكَةْ اللّٰهْ؟

[2] وَ عِيسَى نَادَى وِلَيْد صَغَيَّرْ وَ خَطَّهْ فِي أُسُطْهُمْ.

[3] وَ عِيسَى قَالْ: نُقُولْ لَيْكُو الْحَقّ، كَانْ إِنْتُو مَا تِبَدُّلُوا فِكِرْكُو وَ كَانْ مَا تَبْقَوْا مِثِلْ عِيَالْ دُقَاقْ، مَا تَدْخُلُوا فِي مَمْلَكَةْ اللّٰهْ.

[4] النَّادُمْ الْيِسَوِّي نَفْسَهْ صَغَيَّرْ و يَبْقَى مِثِلْ الْوِلَيْد دَا، هُو بَسْ الْكَبِيرْ فِي مَمْلَكَةْ اللّٰهْ.

[5] وَ أَيِّ نَادُمْ الْيَقْبَلْ بِأُسْمِي وِلَيْد صَغَيِّرْ مِثِلْ دَا، يَقْبَلْنِي.

[6] وَ أَيِّ نَادُمْ الْيِتَلِّفْ إِيمَانْ هَنَا وَاحِدْ مِنْ الْعِيَالْ الدُّقَاقْ الْمُؤْمِنِينْ بَيِّ دَوْل، الْعَذَابْ الْيَرْجَاهْ شَدِيدْ لَحَدِّي أَخَيْر لِلنَّادُمْ دَاكْ كَانْ رَبَطَوْا مُرْحَاكَةْ كَبِيرَةْ فِي رَقَبْتَهْ وَ يَزْقُلُوهْ فِي لُبّ الْبَحَرْ الطَّوِيلْ.

[7] عَذَابْ يَرْجَى نَاسْ الدُّنْيَا أَشَانْ يسَوُّوا مَشَاكِلْ لِلْمُؤْمِنِينْ. لَابُدَّ أَشْيَاءْ وَاحِدِينْ يَبْقَوْا وَ بِسَبَبْهُمْ نَاسْ وَاحِدِينْ يَمُرْقُوا مِنْ الدَّرِبْ. وَ لَاكِنْ الْعَذَابْ يَرْجَى النَّادُمْ الْيِسَبِّبْ الْأَشْيَاءْ دَوْل.

[8] وَ كَانْ إِيدَكْ وَلَّا رِجِلَكْ تِدَوْر تَمُرْقَكْ مِنْ الدَّرِبْ الْعَدِيلْ، أَقْطَعْهَا وَ أَزْقُلْهَا بَعِيدْ مِنَّكْ. أَخَيْر لَيْك كَانْ بِقِيتْ مَعْدُورْ وَ تَدْخُلْ فِي الْحَيَاةْ الْأَبَدِيَّةْ مِنْ يَزْقُلُوكْ فِي النَّارْ الْأَبَدِيَّةْ وَ عِنْدَكْ إِيدَيْن وَ رِجِلَيْن.

[9] وَ كَانْ عَيْنَكْ تِدَوْر تَمُرْقَكْ مِنْ الدَّرِبْ الْعَدِيلْ، سِلَّهَا وَ أَزْقُلْهَا بَعِيدْ مِنَّكْ. أَخَيْر لَيْك تَدْخُلْ فِي الْحَيَاةْ الْأَبَدِيَّةْ وَ عِنْدَكْ عَيْن وَاحِدَةْ مِنْ يَزْقُلُوكْ فِي نَارْ جَهَنَّمْ وَ فَضَّلْ لَيْك عُيُونْ إِتْنَيْن.

[10] أَنْقَرْعُوا مَا تَحْقُرُوا أَيِّ وَاحِدْ مِنْ الصُّغَارْ دَوْل أَشَانْ نُقُولْ لَيْكُو مَلَائِكَتْهُمْ فِي السَّمَاءْ دَايْماً حَاضِرِينْ مَعَ أَبُوِي اللّٰهْ.

[11] وَ أَنَا، إِبْن الْإِنْسَانْ، جِيتْ أَشَانْ نِنَجِّي النَّاسْ الْهَلْكَانِينْ.

[12] فِكِرْكُو شُنُو؟ نَادُمْ عِنْدَهْ غَنَمْ مِيَةْ وَ غَنَمَايْ وَاحِدَةْ وَدَّرَتْ. مَا يِخَلِّي التِّسْعَةْ وَ تِسْعِينْ فِي الْكَدَادَةْ وَ يَمْشِي يِفَتِّشْ الْمُوَدَّرَةْ وَلَّا؟

[13] وَ نُقُولْ لَيْكُو الْحَقّ، كَانْ يَلْقَاهَا هُو يَبْقَى فَرْحَانْ زِيَادَةْ بِالْوَاحِدَةْ الْوَدَّرَتْ مِنْ بِالتِّسْعَةْ وَ تِسْعِينْ الْمَا وَدَّرَوْا.

[14] وَ سَوَا سَوَا مِثِلْ دَا أَبُوكُو اللّٰهْ كُلَ مَا يِدَوْر وَاحِدْ مِنْ الصُّغَارْ دَوْل يَهْلَكْ.

[15] كَانْ مُؤْمِنْ سَوَّى فَوْقَكْ خَطَأْ، أَمْشِي وِحَيْدَكْ وَ حَجِّي مَعَ أَخُوكْ دَا وِحَيْدكُو وَ وَصِّفْ لَيَّهْ خَطَأْ هَنَايَهْ وَ مَا تِأَوْرِي نَادُمْ آخَرْ. وَ كَانْ يَسْمَعْ كَلَامَكْ، خَلَاصْ إِنْتُو أَخْوَانْ.

[16] وَ كَانْ أَخُوكْ يَابَى مَا يَسْمَعْ كَلَامَكْ، أَمْشِي لَيَّهْ بَتَّانْ وَ شِيلْ مَعَاكْ وَاحِدْ وَلَّا إِتْنَيْن مِنْ الْأَخْوَانْ أَشَانْ ‹شُهُودْ إِتْنَيْن أَوْ تَلَاتَةْ يِثَبُّتُوا أَيِّ كَلَامْ›.

[17] وَ كَانْ هو يَابَى مَا يَسْمَعْ كَلَامْهُمْ، جِيبْ الْكَلَامْ دَا لِمَلَمَّةْ الْمُؤْمِنِينْ. وَ كَانْ أَبَى مَا يَسْمَعْ كَلَامْ مَلَمَّةْ الْمُؤْمِنِينْ كُلَ، أَجْعَلَهْ مِثِلْ نَادُمْ كَافِرْ وَلَّا مِثِلْ نَادُمْ هَنَا الْجَمَارِكْ.

[18] أَشَانْ نُقُولْ لَيْكُو الْحَقّ، أَيِّ شَيْء الْجَعَلتُوهْ حَرَامْ فِي الْأَرْض، اللّٰهْ فِي السَّمَاءْ كُلَ يَجْعَلَهْ حَرَامْ وَ أَيِّ شَيْء الْجَعَلْتُوهْ حَلَالْ فِي الْأَرْض، اللّٰهْ فِي السَّمَاءْ كُلَ يَجْعَلَهْ حَلَالْ.

[19] وَ بَتَّانْ نِأَوْرِيكُو كَانْ نَاسَيْن مِنْكُو فِي الْأَرْض أَتَّفَقَوْا فِي أَيِّ شَيْء الْيِدَوْرُوهْ، أَبُوِي اللّٰهْ الْفِي السَّمَاءْ هُو يِسَوِّيهْ لَيْهُمْ.

[20] وَ فِي أَيِّ بَكَانْ النَّاسْ يِلِمُّوا فَوْقَهْ بِأُسْمِي، كَانْ هُمَّنْ إِتْنَيْن وَلَّا تَلَاتَةْ بَسْ كُلَ، أَنَا ذَاتِي قَاعِدْ فِي أُسُطْهُمْ.

[21] وَ بُطْرُسْ جَاءْ لِعِيسَى وَ سَأَلَهْ وَ قَالْ: سَيِّدْنَا، كَانْ أَخُوِي يِسَوِّي خَطَأْ فَوْقِي كَتِيرْ كَمْ مَرَّةْ نِسَامِحَهْ؟ نِسَامِحَهْ لَحَدِّي سَبْعَةْ مَرَّاتْ وَلَّا؟

[22] وَ عِيسَى رَدَّ لَيَّهْ وَ قَالْ: مَا تِسَامِحَهْ لَحَدِّي سَبْعَةْ مَرَّاتْ بَسْ. لَاكِنْ سَامِحَهْ سَبْعِينْ سَبْعِينْ لَحَدِّي سَبْعَةْ مَرَّاتْ.

[23] أَيْوَى، مَمْلَكَةْ اللّٰهْ تِشَابِهْ مِثِلْ كَيْ. نَادُمْ وَاحِدْ سُلْطَانْ وَ دَوَّرْ يِسَوِّي حِسَابْ مَعَ خَدَّامِينَهْ.

[24] وَ بَدَأْ يِحَاسِبْ مَعَاهُمْ وَ جَابَوْا لَيَّهْ خَدَّامْ وَاحِدْ وَ السُّلْطَانْ عِنْدَهْ عَشَرَةْ أَلِفْ كِيلَوْ هَنَا دَهَبْ فَوْقَهْ.

[25] وَ الْخَدَّامْ مَا عِنْدَهْ الشَّيْء الْيِكَفِّي بَيِّهْ الدِّينْ الْفَوْقَهْ. وَ سَيِّدَهْ السُّلْطَانْ قَالْ وَاجِبْ يِبِيعُوا الْخَدَّامْ مَعَ مَرْتَهْ وَ عِيَالَهْ وَ كُلَّ شَيْء الْعِنْدَهْ فِي سُوقْ الْعَبِيدْ أَشَانْ يِكَفِّي دَيْنَهْ.

[26] وَ لَاكِنْ الْخَدَّامْ وَقَعْ قِدَّامَهْ وَ قَالْ «يَا سَيِّدْنَا، أَصْبُرْنِي وَ نِكَفِّيكْ الْعِنْدَكْ فَوْقِي كُلَّ كَيْ».

[27] وَ سَيِّدْ الْخَدَّامْ دَا حَنَّ فَوْقَهْ وَ عَفَى لَيَّهْ الدَّيْن وَ خَلَّاهْ مَشَى.

[28] وَ فِي الْبَكَانْ دَا، الْخَدَّامْ مَرَقْ مِنْ قِدَّامْ السُّلْطَانْ وَ مَشَى عَجَلَةْ لِنَادُمْ آخَرْ وَ هُو كُلَ مِنْ خَدَّامِينْ السُّلْطَانْ. وَ فَوْق أَخُوهْ دَا عِنْدَهْ دَيْن مِثِلْ كِيلَوْ إِتْنَيْن هَنَا دَهَبْ. وَ كَرَبَهْ وَ بَدَأْ يَخْنِقَهْ وَ قَالْ «كَفِّينِي الْعِنْدِي فَوْقَكْ».

[29] وَ أَخُوهْ الْخَدَّامْ وَقَعْ قِدَّامَهْ وَ شَحَدَهْ وَ قَالْ «أَصْبُرْنِي وَ نِكَفِّيكْ كُلَّ كَيْ».

[30] وَ الْخَدَّامْ أَبَى وَ مَشَى دَسَّهْ فِي السِّجِنْ لَحَدِّي يِكَفِّي الدَّيْن الْعِنْدَهْ فَوْقَهْ.

[31] وَ أَخْوَانَهْ خَدَّامِينْ السُّلْطَانْ شَافَوْا الشَّيْء الْبِقِي دَا وَ بَرْجَلَوْا بِلْحَيْن. وَ مَشَوْا أَوْرَوْا سَيِّدْهُمْ بِكُلَّ شَيْء الْبِقِي.

[32] وَ سِيدْهُمْ نَادَاهْ لِلْخَدَّامْ دَا وَ قَالْ لَيَّهْ «يَا الْخَدَّامْ الْفَسِلْ. إِنْتَ شَحَدْتِنِي وَ أَنَا سَامَحْت لَيْك الدَّيْن الْكَتِيرْ دَا كُلَّ كَيْ.

[33] مَا وَاجِبْ لَيْك تِحِنّ فِي أَخُوكْ مِثِلْ أَنَا حَنَّيْت فَوْقَكْ إِنْتَ وَلَّا؟»

[34] وَ سَيِّدَهْ زِعِلْ فَوْقَهْ بِلْحَيْن وَ سَلَّمَهْ لِلْعَسْكَرْ أَشَانْ يِعَذُّبُوهْ فِي السِّجِنْ لَحَدِّي يِكَفِّي دَيْنَهْ.

[35] وَ أَبُوِي اللّٰهْ يِسَوِّي مِثِلْ دَا كَانْ أَيِّ نَادُمْ مِنْكُو مَا يِسَامِحْ أَخُوهْ مِنْ قَلْبَهْ.