<متى 24

[1] وَ عِيسَى مَرَقْ مِنْ بَيْت اللّٰهْ وَ مَشَى قِدَّامْ شِيَّةْ وَ تَلَامِيذَهْ جَوْا وَ وَصَّفَوْا لَيَّهْ بُنَاءْ هَنَا بَيْت اللّٰهْ.

[2] وَ عِيسَى قَالْ لَيْهُمْ: شِفْتُوا كُلَّ الْبُيُوتْ دَوْل؟ نُقُولْ لَيْكُو الْحَقّ، مَا يِخَلُّوا حَجَرْ يَقْعُدْ فَوْق حَجَرْ. يَرْمُوهُمْ كُلَّ كَيْ.

[3] وَكِتْ عِيسَى قَاعِدْ فِي جَبَلْ الزَّيْتُونْ، تَلَامِيذَهْ جَوْا لَيَّهْ وِحَيْدهُمْ وَ قَالَوْا: أَوْرِينَا مَتَى دَا يَبْقَى. وَيْنِي الْعَلَامَةْ التِّوَصِّفْنَا إِنْتَ تِقَبِّلْ قَرِيبْ وَ كُمَالَةْ الدُّنْيَا تِدَوْر تَبْقَى؟

[4] وَ عِيسَى رَدَّ لَيْهُمْ وَ قَالْ: أَوْعُوا بَالْكُو. مَا تِخَلُّوا نَادُمْ يَغُشُّكُو.

[5] أَشَانْ نَاسْ كَتِيرِينْ بَجُوا بِأُسْمِي وَ بِحَجُّوا بِنُفُوسْهُمْ وَ بُقُولُوا هُمَّنْ الْمَسِيحْ. وَ يَغُشُّوا نَاسْ كَتِيرِينْ.

[6] وَ تَسْمَعَوْا خَبَرْ هَنَا دُوَاسْ قَرِيبْ وَ دُوَاسْ بَعِيدْ. خُطُّوا بَالْكُو أَشَانْ مَا تِبَرْجُلُوا. دَا كُلَّ كَيْ لَابُدَّ يَبْقَى وَ لَاكِنْ دَا لِسَّاعْ مَا كُمَالَةْ الدُّنْيَا.

[7] نَاسْ هَنَا بَلَدْ وَاحِدَةْ يَهْجُمُوا نَاسْ هَنَا بَلَدْ آخَرَةْ وَ مَمْلَكَةْ تَهْجِمْ مَمْلَكَةْ وَ جُوعْ شَدِيدْ يَنْزِلْ وَ فِي دِيَارْ كَتِيرِينْ يُكُونْ زِلْزَالْ.

[8] وَ لَاكِنْ التَّعَبْ دَا الْبِدَايَةْ بَسْ. هُو مِثِلْ الطَّلَقَةْ الْأَوَّلَانِيَّةْ لِلْمَرَةْ الْغَلْبَانَةْ.

[9] وَ فِي الْوَكِتْ دَاكْ، يِسَلُّمُوكُو لِلنَّاسْ الْيِعَذُّبُوكُو وَ يَكْتُلُوكُو وَ كُلَّ الْأُمَمْ يَكْرَهَوْكُو أَشَانْ إِنْتُو نَاسِي.

[10] وَ مُؤْمِنِينْ كَتِيرِينْ يِخَلُّوا الْإِيمَانْ وَ يَكْرَهَوْا أَخْوَانْهُمْ وَ يُخُونُوهُمْ.

[11] وَ نَاسْ كَتِيرِينْ يِسَوُّوا نُفُوسْهُمْ أَنْبِيَاءْ وَ يَغُشُّوا نَاسْ كَتِيرِينْ.

[12] الْفَسَالَةْ تِزِيدْ وَ تَبْقَى عَامَةْ وَ الْمَحَبَّةْ تَبْقَى ضَعِيفَةْ فِي قُلُوبْ نَاسْ كَتِيرِينْ.

[13] وَ لَاكِنْ النَّادُمْ الْقَاعِدْ ثَابِتْ لَحَدِّي كُمَالَةْ كُلَّ شَيْء، يَنْجَى.

[14] وَ يِبَلُّغُوا بِشَارَةْ مَمْلَكَةْ اللّٰهْ فِي كُلَّ الدُّنْيَا وَ يَشْهَدَوْا لَيْهَا لِكُلَّ الْأُمَمْ وَ بَعَدْ دَا بَسْ، كُمَالَةْ الدُّنْيَا.

[15] وَ وَكِتْ تِشِيفُوا الشَّيْء الْحَرَامْ الْبِجِيبْ الْخَرَابْ وَاقِفْ فِي بَيْت اللّٰهْ وَ دَا الشَّيْء النَّبِي دَنْيَالْ حَجَّى فَوْقَهْ (خَلِّي النَّادُمْ الْيَقْرِي الْكَلَامْ دَا يَفْهَمَهْ)،

[16] فِي الْوَكِتْ دَاكْ، خَلِّي النَّاسْ الْقَاعِدِينْ فِي دَارْ الْيَهُودِيَّةْ يَجْرُوا فِي الْحُجَارْ.

[17] وَ أَيِّ نَادُمْ الْقَاعِدْ يِنْجَمَّ فِي رَاسْ بَيْتَهْ، خَلِّي يَجْرِي وَ مَا يِدَلِّي يِشِيلْ خُمَامَهْ مِنْ الْبَيْت.

[18] وَ أَيِّ نَادُمْ الْقَاعِدْ فِي الزَّرَعْ، خَلِّي يَجْرِي وَ مَا يِقَبِّلْ يِشِيلْ خَلَقَهْ.

[19] فِي الْوَكِتْ دَاكْ يَبْقَى قَاسِي مَرَّةْ وَاحِدْ لِلْعَوِينْ الْغَلْبَانَاتْ وَ الْعَوِينْ الْبِرَضِّعَنْ.

[20] أَسْأَلَوْا اللّٰهْ أَشَانْ مَا لَازِمْ تَجْرُوا فِي الشِّتَاءْ وَ لَا فِي يَوْم السَّبِتْ.

[21] فِي الْوَكِتْ دَاكْ، التَّعَبْ يَبْقَى شَدِيدْ بِلْحَيْن. وَ مَا فِي تَعَبْ مِثْلَهْ مِنْ اللّٰهْ خَلَقْ الْأَرْض لَحَدِّي الْيَوْم. وَ تَعَبْ شَدِيدْ مِثِلْ دَا أَبَداً مَا يَبْقَى بَتَّانْ.

[22] وَ كَانْ اللّٰهْ مَا نَقَصْ عَدَدْ أَيَّامْ التَّعَبْ دَا، نَادُمْ وَاحِدْ مَا يَنْجَى. وَ لَاكِنْ اللّٰهْ فَكَّرْ فِي النَّاسْ الْإِخْتَارَاهُمْ وَ فِي شَانْهُمْ هُو نَقَصْ عَدَدْ أَيَّامْ التَّعَبْ دَا.

[23] وَ فِي الْوَكِتْ دَاكْ، كَانْ نَادُمْ بُقُولْ لَيْكُو «شِيفُوا الْمَسِيحْ هِنِي» وَلَّا «شِيفُوا الْمَسِيحْ هِنَاكْ»، مَا تِصَدُّقُوا كَلَامَهْ.

[24] أَشَانْ نَاسْ كَتِيرِينْ بَجُوا وَ بُقُولُوا هُمَّنْ الْمَسِيحْ وَلَّا بُقُولُوا بِكِدِبْ هُمَّنْ أَنْبِيَاءْ. وَ يِسَوُّوا عَلَامَاتْ كُبَارْ وَ عَجَايِبْ أَشَانْ يُغُشُّوهُمْ، كَانْ دَا مُمْكِنْ، لِلنَّاسْ الْاللّٰهْ إِخْتَارَاهُمْ كُلَ.

[25] أَيْوَى، أَنَا أَوْرَيْتكُو بِالْكَلَامْ دَا قُبَّالْ مَا بِقِي.

[26] وَ كَانْ بُقُولُوا لَيْكُو «الْمَسِيحْ جَاءْ وَ قَاعِدْ فِي الْكَدَادَةْ»، مَا تَمْشُوا. وَلَّا كَانْ بُقُولُوا «الْمَسِيحْ جَاءْ وَ قَاعِدْ فِي الْبَيْت دَاخَلْ»، مَا تِصَدُّقُوا كَلَامْهُمْ.

[27] أَكِيدْ الْبَرَّاقَةْ تَبْرُقْ فِي الصَّبَاحْ وَ تِنْشَافْ فِي الْغَرِبْ وَ جَيَّةْ إِبْن الْإِنْسَانْ تَبْقَى مِثِلْ دَا كُلَ.

[28] الرِّمَّةْ تِنَادِي الصُّقُورَةْ.

[29] وَ عَجَلَةْ بَعَدْ تَعَبْ هَنَا الْوَكِتْ دَاكْ، الْحَرَّايْ تَبْقَى زَرْقَاءْ وَ الْقَمَرْ مَا يِضَاوِي وَ النُّجُومْ يَقَعَوْا مِنْ السَّمَاءْ وَ قُوَّاتْ السَّمَاوَاتْ يِنْهَزَّوْا.

[30] وَ فِي الْوَكِتْ دَاكْ، عَلَامَةْ إِبْن الْإِنْسَانْ تِنْشَافْ فِي السَّمَاءْ وَ كُلَّ الْأُمَمْ يَبْكُوا. وَ يِشِيفُوا إِبْن الْإِنْسَانْ رَاكِبْ فِي سَحَابْ السَّمَاءْ بِقُدْرَةْ عَظِيمَةْ وَ مَجِيدَةْ.

[31] وَ حِسّ الْبُرُونْجِي الْعَظِيمْ يِنْسَمِعْ وَ هُو يِرَسِّلْ مَلَائِكَتَهْ فِي أَيِّ جِيهَةْ أَشَانْ يِلِمُّوا النَّاسْ الْإِخْتَارَاهُمْ مِنْ أَيِّ بَكَانْ فِي الْأَرْض.

[32] وَ فَكُّرُوا فِي شَدَرَةْ التِّينْ وَ شِيلُوا الْمَثَلْ. كَانْ فُرُوعْهَا يِدَوْرُوا يِخَضُّرُوا وَ الْوَرْشَالْ الْأَوَّلَانِي يَمْرُقْ، تَعَرْفُوا الْوَكِتْ التَّلْدَ فَوْقَهْ قَرَّبْ.

[33] وَ سَوَا سَوَا مِثِلْ دَا، وَكِتْ تِشِيفُوا كُلَّ شَيْء الْأَوْرَيْتكُو بَيَّهْ، تَعَرْفُوا هُو يِدَوْر يَجِي قَرِيبْ.

[34] وَ نُقُولْ لَيْكُو الْحَقّ. نَاسْ هَنَا الْوَكِتْ دَا مَا يِكَمُّلُوا قُبَّالْ كُلَّ الْكَلَامْ دَا مَا يِتِمّ.

[35] السَّمَاءْ وَ الْأَرْض يَبْقَوْا مَا فِيهُمْ وَ لَاكِنْ كَلَامِي يَقْعُدْ دَايْماً.

[36] وَ الشَّيْء الْيَبْقَى بَعَدَيْن دَا، نَادُمْ وَاحِدْ مَا يَعَرِفْ يَوْمَهْ وَ سَاعَتَهْ. الْمَلَائِكَةْ فِي السَّمَاوَاتْ كُلَ مَا بَعَرْفُوهْ وَ إِبْن اللّٰهْ مَا بَعَرْفَهْ، إِلَّا أَبُوهْ وِحَيْدَهْ بَعَرْفَهْ.

[37] وَ حَالَةْ النَّاسْ فِي يَوْم جَيَّةْ إِبْن الْإِنْسَانْ تَبْقَى سَوَا مِثِلْ حَالَةْ النَّاسْ فِي زَمَنْ نُوحْ.

[38] وَ فِي الْأَيَّامْ قُبَّالْ الْأَلْمِي مَا يَجِي يَاكُلْهُمْ، هُمَّنْ قَاعِدِينْ يَاكُلُوا وَ يَشَرْبَوْا وَ الرُّجَالْ قَاعِدِينْ يَاخُدُوا عَوِينْ وَ الْعَوِينْ قَاعِدَاتْ يَاخُدَنْ رُجَالْ لَحَدِّي الْيَوْم النُّوحْ دَخَلْ فِي السَّفِينَةْ.

[39] وَ أَلْمِي صَبَّ وَ النَّاسْ مَا فِهْمَوْا الشَّيْء الْيَبْقَى وَ الْأَلْمِي أَكَلَاهُمْ كُلُّهُمْ. وَ يَبْقَى سَوَا سَوَا مِثِلْ دَا فِي يَوْم جَيَّةْ إِبْن الْإِنْسَانْ.

[40] وَ فِي الْوَكِتْ دَاكْ، رُجَالْ إِتْنَيْن يَقْعُدُوا فِي زَرَعْ وَ وَاحِدْ مِنْهُمْ يِنْرَفِعْ وَ الْآخَرْ مَا يِنْرَفِعْ.

[41] وَ عَوِينْ إِتْنَيْن قَاعِدَاتْ يَرْحَكَنْ غَلَّةْ وَ الْوَاحِدَةْ تِنْرَفِعْ وَ الْآخَرَةْ ما تِنْرَفِعْ.

[42] وَ خَلَاصْ، أَقْعُدُوا وَاعِيِينْ أَشَانْ إِنْتُو مَا تَعَرْفُوا يَوْم هَنَا جَيَّةْ رَبُّكُو.

[43] وَ أَفْهَمَوْا الْمَثَلْ دَا. كَانْ أَوَّلْ سِيدْ الْبَيْت عِرِفْ فِي السَّاعَةْ كَمْ السَّرَّاقْ بَجِي فِي اللَّيْل، هُو يَقْعُدْ وَاعِي وَ مَا يِخَلِّي السَّرَّاقْ يَدْخُلْ فِي بَيْتَهْ.

[44] وَ خَلَاصْ، إِنْتُو كُلَ أَقْعُدُوا جَاهِزِينْ أَشَانْ إِبْن الْإِنْسَانْ يِقَبِّلْ فِي يَوْم وَاحِدْ الْمَا تَرْجَوْه فَوْقَهْ.

[45] يَاتُو مِنْكُو يَبْقَى مِثِلْ الْعَبِدْ الْأَمِينْ وَ الْفَاهِمْ؟ سِيدَهْ كَلَّفَهْ فِي كُلَّ عَبِيدَهْ أَشَانْ يَنْطِيهُمْ الْأَكِلْ فِي الْوَكِتْ الْوَاجِبْ.

[46] مَبْرُوكْ لِلْعَبِدْ دَا كَانْ سِيدَهْ يَجِي مِنْ السَّفَرْ وَ يَلْقَاهْ يَخْدِمْ فِي خِدِمْتَهْ.

[47] بِالصَّحِيحْ نُقُولْ لَيْكُو هُو يِدَرِّجْ الْعَبِدْ دَا مَسْؤُولْ فِي كُلَّ شَيْء الْعِنْدَهْ.

[48] وَ لَاكِنْ كَانْ الْعَبِدْ فَسِلْ، هُو بُقُولْ فِي قَلْبَهْ «سِيدِي يِطَوِّلْ وَ مَا يَجِي عَجَلَةْ»

[49] وَ يُقُمّ يُدُقّ أَخْوَانَهْ الْعَبِيدْ وَ يَاكُلْ وَ يَشْرَبْ مَعَ السَّكَّارَى،

[50] أَكِيدْ سِيدْ الْعَبِدْ دَا يَجِي فِي يَوْم وَاحِدْ الْعَبِدْ مَا جَاهِزْ لِيِلَاقِيهْ فَوْقَهْ وَ فِي سَاعَةْ هُو مَا يَعَرِفْهَا.

[51] وَ سِيدَهْ يِعَاقِبْ الْعَبِدْ دَا وَ يُخُطَّهْ فِي بَكَانْ الْمُنَافِقِينْ. هِنَاكْ يَبْكُوا وَ يِعَضُّوا أَصَابِعْهُمْ مِنْ الْعَذَابْ.