[1] وَ بَتَّانْ عِيسَى حَجَّى لَيْهُمْ بِأَمْثَالْ وَ قَالْ:
[2] مَمْلَكَةْ اللّٰهْ تِشَابِهْ مِثِلْ مَلِكْ وَاحِدْ السَّوَّى عَازُومَةْ فِي عِرِسْ هَنَا وِلَيْدَهْ.
[3] وَ رَسَّلْ عَبِيدَهْ أَشَانْ بِنَادُوا النَّاسْ الْمَعْزُومِينْ فِي الْعَازُومَةْ وَ لَاكِنْ الْمَعْزُومِينْ أَبَوْا مَا يَجُوا.
[4] وَ الْمَلِكْ رَسَّلْ عَبِيدْ آخَرِينْ وَ قَالْ لَيْهُمْ: قُولُوا لِلنَّاسْ الْعَزَمْتُهُمْ «أَسْمَعَوْا، أَنَا جَهَّزْت الْأَكِلْ خَلَاصْ. تِيرَانِي وَ عِجَالِي الْعَدِيلِينْ دَبَحْتُهُمْ وَ كُلَّ شَيْء حَاصِلْ. تَعَالُوا لِلْعَازُومَةْ».
[5] وَ لَاكِنْ النَّاسْ الْعَزَمَاهُمْ أَبَوْا. الْوَاحِدْ مَشَى فِي الزَّرَعْ وَ الْآخَرْ مَشَى يِسَاوِقْ.
[6] وَ الْآخَرِينْ كَرَبَوْا عَبِيدْ الْمَلِكْ وَ عَيَّرَوْهُمْ وَ كَتَلَوْهُمْ.
[7] وَ الْمَلِكْ زِعِلْ بِلْحَيْن وَ رَسَّلْ عَسْكَرَهْ وَ كَتَلَوْا الْكَتَّالِينْ دَوْل وَ تَشَّوْا حِلِّتْهُمْ.
[8] وَ قَالْ لِعَبِيدَهْ: أَكِلْ الْعَازُومَةْ حَاصِلْ وَ لَاكِنْ النَّاسْ الْعَزَمْتُهُمْ مَا وَاجِبْ لَيْهُمْ.
[9] خَلَاصْ، أَمْشُوا فِي كُلِّ مَوْقَفْ وَ أَيِّ نَادُمْ اللِّقِيتُوهْ نَادُوهْ فِي الْعَازُومَةْ.
[10] وَ الْعَبِيدْ مَرَقَوْا وَ مَشَوْا فِي الشَّوَارِعْ وَ لَمَّوْا كُلَّ النَّاسْ اللِّقَوْهُمْ. وَ لَمَّوْا الْفَسْلِينْ مَعَ الْعَدِيلِينْ سَوَا وَ الْبَيْت أَنْمَلَا ضِيفَانْ.
[11] وَ الْمَلِكْ أَنْدَسَّ فِي لُبّ الْبَيْت أَشَانْ يِسَلِّمْ الضِّيفَانْ وَ شَافْ نَادُمْ وَاحِدْ مَا لَابِسْ خَلَقْ هَنَا الْعِرِسْ.
[12] وَ الْمَلِكْ قَالْ: أَخُوِي، كِكَّيْف دَخَلْت وَ مَا لَابِسْ الْخَلَقْ الْأَنْطَيْتَهْ لِلضِّيفَانْ؟ وَ النَّادُمْ دَا مَا رَدَّ لَيَّهْ كَلَامْ.
[13] وَ الْمَلِكْ أَمَرَاهُمْ لِعَبِيدَهْ وَ قَالْ: أَرْبُطُوا رِجِلَيْنَهْ وَ إِيدَيْنَهْ وَ أَزْقُلُوهْ فِي الضَّلَامْ الْبَرَّانِي. هِنَاكْ نَاسْ يَبْكُوا وَ يِعَضُّوا أَصَابِعْهُمْ مِنْ الْعَذَابْ.
[14] أَشَانْ اللّٰهْ يِنَادِي نَاسْ كَتِيرِينْ وَ لَاكِنْ يِخْتَارْ نَاسْ شِيَّةْ.
[15] وَ الْفَرِيسِيِّينْ مَشَوْا أَشَّاوَرَوْا فِي كِكَّيْف بِتْشَاتْشُوا عِيسَى أَشَانْ يَرْمُوهْ بِسُؤَالْ.
[16] وَ رَسَّلَوْا لِعِيسَى وَاحِدِينْ مِنْ تَلَامِيذْهُمْ مَعَ نَاسْ مِنْ حِزِبْ هِرُودُسْ. وَ قَالَوْا لَيَّهْ: يَا مُعَلِّمْ، نَعَرْفُوا كَدَرْ إِنْتَ نَادُمْ زَيْن وَ تِعَلِّمْ دَرِبْ اللّٰهْ لِلنَّاسْ بِكَلَامْ صَحِيحْ وَ إِنْتَ مَا خَايِفْ مِنْ أَيِّ نَادُمْ وَ مَا تَخَافْ مِنْ وِجِهْ النَّاسْ.
[17] خَلَاصْ، قُولْ لَيْنَا فِكْرَكْ شُنُو؟ حَسَبْ التَّوْرَاةْ، وَاجِبْ لَيْنَا نِكَفُّوا الْمِيرِي لِسُلْطَانْ الرَّوْمَانِيِّينْ وَلَّا مَا وَاجِبْ؟
[18] وَ عِيسَى عِرِفْ نِيِّتْهُمْ شَيْنَةْ وَ قَالْ لَيْهُمْ: يَا مُنَافِقِينْ. مَالَا تِدَوْرُوا تِجَرُّبُونِي؟
[19] وَصُّفُونِي رِيَالْ هَنَا الْمِيْرِي. وَ أَنْطَوْه دِينَارْ وَاحِدْ.
[20] وَ سَأَلَاهُمْ وَ قَالْ: الصُّورَةْ وَ الْأُسُمْ الْمَكْتُوبْ فَوْقَهْ دَا هَنَا يَاتُو؟
[21] وَ رَدَّوْا لَيَّهْ وَ قَالَوْا: هَنَا سُلْطَانْ الرَّوْمَانِيِّينْ. وَ قَالْ لَيْهُمْ: خَلَاصْ، هَنَا السُّلْطَانْ، أَنْطُوهْ لِلسُّلْطَانْ وَ هَنَا اللّٰهْ، أَنْطُوهْ لِلّٰهْ.
[22] وَ عَجَّبَوْا بِلْحَيْن فِي كَلَامَهْ وَ فَاتَوْا خَلَّوْه.
[23] وَ فِي الْيَوْم دَا، نَاسْ وَاحِدِينْ مِنْ الصَّدُّوقِيَّةْ جَوْا لِعِيسَى. وَ الصَّدُّوقِيِّينْ مَا مُؤْمِنِينْ بِالْقِيَامَةْ. وَ سَأَلَوْه
[24] وَ قَالَوْا: يَا السَّيِّدْ، فِي التَّوْرَاةْ، مُوسَى قَالْ كَانْ رَاجِلْ مَاتْ وَ مَا عِنْدَهْ عِيَالْ أَخُو الرَّاجِلْ دَا وَاجِبْ يَاخُدْ الْمَرَةْ وَ يَلْدَ مِنْهَا ذُرِّيَّةْ لِأَخُوهْ الْمَرْحُومْ.
[25] زَيْن. أَوَّلْ سَبْعَةْ أَخْوَانْ قَاعِدِينْ أَمْبَيْنَاتْنَا. وَ الْكَبِيرْ مِنْهُمْ أَخَدْ مَرَةْ وَ بَعَدْ وَكِتْ مَاتْ. وَ مَا عِنْدَهْ عِيَالْ وَ أَشَانْ دَا، وَاجِبْ لِأَخُوهْ يَاخُدْهَا.
[26] وَ الْأَخُو التَّانِي أَخَدْ الْمَرَةْ وَ مَاتْ. وَ بَعَدْ دَا، الْأَخُو التَّالِتْ وَ كُلُّهُمْ لَحَدِّي السَّابِعْ أَخَدَوْهَا وَ مَاتَوْا.
[27] وَ بَعَدْ كُلَّ الْأَخْوَانْ مَاتَوْا، الْمَرَةْ كُلَ مَاتَتْ.
[28] وَ خَلَاصْ وَكِتْ الْمَيْتِينْ يَبْعَثَوْا، هِي تَبْقَى مَرَةْ يَاتُو مِنْ الْأَخْوَانْ السَّبْعَةْ؟ كُلُّهُمْ أَخَدَوْهَا.
[29] وَ عِيسَى رَدَّ لَيْهُمْ وَ قَالْ: إِنْتُو مُوَدِّرِينْ أَشَانْ مَا تَعَرْفُوا وَ لَا كِتَابْ اللّٰهْ وَ لَا قُدْرَةْ اللّٰهْ.
[30] أَشَانْ وَكِتْ النَّاسْ يَبْعَثَوْا، الرُّجَالْ مَا يَاخُدُوا عَوِينْ وَ الْعَوِينْ مَا يَاخُدَنْ رُجَالْ وَ يَبْقَوْا مِثِلْ مَلَائِكَةْ اللّٰهْ فِي السَّمَاوَاتْ الْأَمْبَيْنَاتْهُمْ أَخِيدَةْ مَا فِي.
[31] وَ فِي الشَّيْء الْبُخُصّ الْبُعَاثْ، هَلْ نِسِيتُوا الْكَلَامْ الْقَرَيْتُوهْ الْاللّٰهْ قَالَهْ لَيْكُو وَلَّا؟
[32] قَالْ ‹أَنَا اللّٰهْ رَبّ هَنَا إِبْرَاهِيمْ وَ رَبّ إِسْحَاقْ وَ رَبّ يَعْقُوبْ›. وَ هُو رَبّ النَّاسْ الْقَاعِدِينْ حَيِّينْ وَ مَا رَبّ النَّاسْ الْمَا فِيهُمْ.
[33] وَ النَّاسْ سِمْعَوْا تَعْلِيمَهْ وَ عَجَّبَوْا بِلْحَيْن.
[34] وَ وَكِتْ الْفَرِيسِيِّينْ سِمْعَوْا كَدَرْ عِيسَى سَكَّتْ الصَّدُّوقِيِّينْ، خَلَاصْ هُمَّنْ لَمَّوْا مَعَايَهْ أَشَانْ يَسْأَلَوْه.
[35] وَ نَادُمْ وَاحِدْ مِنْهُمْ عَالِمْ فِي التَّوْرَاةْ وَ دَوَّرْ يَسْأَلَهْ أَشَانْ يِجَرِّبَهْ.
[36] وَ سَأَلَهْ وَ قَالْ: يَا السَّيِّدْ، مِنْ كُلَّ الْوَصَايَا الْفِي التَّوْرَاةْ، وَيْنِي الْوَصِيَّةْ الْأَكْبَرْ؟
[37] وَ عِيسَى رَدَّ لَيَّهْ وَ قَالْ: ‹حِبّ رَبَّكْ اللّٰهْ بِكُلَّ قَلْبَكْ وَ بِكُلَّ نَفْسَكْ وَ بِكُلَّ فِكْرَكْ›.
[38] دِي هِي الْوَصِيَّةْ الْأَكْبَرْ وَ مَا فِي وَصِيَّةْ أَكْبَرْ مِنْهَا.
[39] وَ الْوَصِيَّةْ التَّانِيَةْ تَشَابِهَّا وَ دِي هِي ‹حِبّ أَخُوكْ مِثِلْ تِحِبّ نَفْسَكْ›.
[40] وَ الْوَصَايَا الْإِتْنَيْن دَيْل، هُمَّنْ أَمّ التَّوْرَاةْ وَ كُتُبْ النُّبُوَّةْ كُلُّهُمْ.
[41] وَ وَكِتْ الْفَرِيسِيِّينْ قَاعِدِينْ مَعَ عِيسَى، هُو سَأَلَاهُمْ وَ قَالْ:
[42] شُنُو فِكِرْكُو فِي الْمَسِيحْ؟ الْمَسِيحْ يَبْقَى إِبْن يَاتُو؟ وَ رَدَّوْا لَيَّهْ وَ قَالَوْا: الْمَسِيحْ إِبْن دَاوُدْ.
[43] وَ سَأَلَاهُمْ وَ قَالْ: كَانْ كَلَامْكُو صَحِيحْ، كِكَّيْف دَاوُدْ قَالْ الْمَسِيحْ هُو سِيدَهْ وَكِتْ هُو قَاعِدْ يِكَلِّمْ بِقُدْرَةْ الرُّوحْ الْقُدُّوسْ وَ قَالْ
[44] ‹اللّٰهْ كَلَّمْ لِسِيدِي الْمَلِكْ وَ قَالْ: أَقْعُدْ فِي نُصِّي الزَّيْنَايْ لَحَدِّي نُخُطّ عُدْوَانَكْ تِحِتْ رِجِلَيْنَكْ.›؟
[45] كَانْ دَاوُدْ قَالْ الْمَسِيحْ سِيدَهْ، كِكَّيْف الْمَسِيحْ يَبْقَى وِلَيْدَهْ؟
[46] وَ مَا قِدْرَوْا يُرُدُّوا لَيَّهْ كَلَامْ. وَ مِنْ الْيَوْم دَا، نَادُمْ وَاحِدْ مَا جَرَّبَهْ بِأَيِّ سُؤَالْ.