<متى 23

[1] وَ عِيسَى قَاعِدْ يِحَجِّي لِلنَّاسْ وَ لِتَلَامِيذَهْ

[2] وَ قَالْ: الْعُلَمَاء وَ الْفَرِيسِيِّينْ قَاعِدِينْ يِعَلُّمُوكُو فِي بَدَلْ سَيِّدْنَا مُوسَى.

[3] أَشَانْ دَا، أَسْمَعَوْا كُلَّ الْكَلَامْ الْيِأَوْرُوكُو مِنْ الْكِتَابْ وَ تَابَعَوْه. لَاكِنْ مَا تِسَوُّوا مِثِلْ هُمَّنْ بِسَوُّوا أَشَانْ بُقُولُوا شَيْء وَاحِدْ وَ بَسَوُّوا شَيْء آخَرْ.

[4] وَ يِعَلُّمُوا الدِّينْ لِلنَّاسْ وَ بِسَوُّوا الدِّينْ لَيْهُمْ تَقِيلْ بُفُوتْ رَاسْهُمْ وَ مَا عِنْدُهُمْ نِيَّةْ يِعَاوُنُوهُمْ، حَتَّى بِشَيْء صَغَيَّرْ كُلَ.

[5] وَ كُلَّ شَيْء الْبِسَوُّوهْ، هُمَّنْ بِسَوُّوهْ أَشَانْ بِدَوْرُوا النَّاسْ بِشِيفُوهُمْ. بَلْبَسَوْا لُبَاسْ خَاصّ لِلدِّينْ زِيَادَةْ مِنْ النَّاسْ الْآخَرِينْ.

[6] وَ فِي الْعَازُومَةْ بِرِيدُوا بَقْعُدُوا مَعَ الْكُبَارَاتْ وَ فِي بُيُوتْ الصَّلَاةْ بِرِيدُوا الصَّفّ الْأَوَّلْ.

[7] وَ هُمَّنْ فَرْحَانِينْ وَكِتْ النَّاسْ يِسَلُّمُوهُمْ فِي الشَّوَارِعْ وَ فِي السُّوقْ وَ بِنَادُوهُمْ «يَا سَيِّدْنَا الْمُعَلِّمْ!».

[8] وَ لَاكِنْ إِنْتُو مَا تِخَلُّوا نَادُمْ بِنَادِيكُو «يَا سَيِّدْنَا الْمُعَلِّمْ»، أَشَانْ عِنْدُكُو مُعَلِّمْ وَاحِدْ بَسْ وَ إِنْتُو كُلُّكُو أَخْوَانْ.

[9] وَ مَا تِنَادُوا نَادُمْ وَاحِدْ فِي الْأَرْض أَبُوكُو أَشَانْ عِنْدُكُو أَبُو وَاحِدْ وَ هُو أَبُوكُو اللّٰهْ.

[10] وَ مَا تِخَلُّوا نَادُمْ بِنَادِيكُو «سَيِّدْنَا» أَشَانْ عِنْدُكُو سَيِّدْ وَاحِدْ وَ هُو الْمَسِيحْ.

[11] وَ خَلِّي الْكَبِيرْ مِنْكُو يَخْدِمْ لَيْكُو مِثِلْ خَدَّامْكُو.

[12] أَشَانْ أَيِّ نَادُمْ الْيِسَوِّي نَفْسَهْ كَبِيرْ، اللّٰهْ يِسَوِّيهْ صَغَيَّرْ وَ النَّادُمْ الْيِسَوِّي نَفْسَهْ صَغَيَّرْ، اللّٰهْ يِسَوِّيهْ كَبِيرْ.

[13] وَ لَاكِنْ يَا الْعُلَمَاء وَ الْفَرِيسِيِّينْ الْمُنَافِقِينْ. الْعَذَابْ يَرْجَاكُو أَشَانْ تِسِدُّوا بَابْ مَمْلَكَةْ اللّٰهْ مِنْ النَّاسْ. وَ إِنْتُو ذَاتْكُو مَا تِنْدَسَّوْا وَ النَّاسْ الْبِدَوْرُوا بِنْدَسَّوْا إِنْتُو تَدْحَرَوْهُمْ مِنَّهْ.

[14] يَا الْعُلَمَاء وَ الْفَرِيسِيِّينْ الْمُنَافِقِينْ. الْعَذَابْ يَرْجَاكُو أَشَانْ إِنْتُو قَاعِدِينْ تَاكُلُوا بُيُوتْ الْعَوِينْ الرُّجَالْهِنْ مَيْتِينْ وَ تُقُمُّوا تِصَلُّوا صَلَاةْ طَوِيلَةْ أَشَانْ النَّاسْ يِشِيفُوكُو. أَشَانْ دَا، الْعَذَابْ الْيَنْزِلْ فَوْقكُو يَبْقَى شَدِيدْ زِيَادَةْ.

[15] يَا الْعُلَمَاء وَ الْفَرِيسِيِّينْ الْمُنَافِقِينْ. الْعَذَابْ يَرْجَاكُو أَشَانْ إِنْتُو تِسَافُرُوا بَعِيدْ بِدَرِبْ طَوِيلْ وَ تَقْطَعَوْا الْبَحَرْ أَشَانْ نَادُمْ وَاحِدْ يَدْخُلْ فِي دِينْكُو وَ وَكِتْ هُو دَخَلْ فِي دِينْكُو خَلَاصْ، تِسَوُّوهْ نَادُمْ فَسِلْ زِيَادَةْ مِنْكُو.

[16] يَا الْعُلَمَاء وَ الْفَرِيسِيِّينْ الْمُنَافِقِينْ. الْعَذَابْ يَرْجَاكُو أَشَانْ إِنْتُو قَاعِدِينْ تُقُودُوا النَّاسْ فِي الدَّرِبْ وَ إِنْتُو ذَاتْكُو عَمْيَانِينْ. تُقُولُوا كَانْ نَادُمْ حَلَفْ بِبَيْت اللّٰهْ، حَلِيفْتَهْ بَاطْلَةْ وَ لَاكِنْ كَانْ نَادُمْ حَلَفْ بِدَهَبْ هَنَا بَيْت اللّٰهْ، حَلِيفْتَهْ صَحِيحَةْ.

[17] يَا الْجَاهِلِينْ الْعَمْيَانِينْ. مِنْ الْإِتْنَيْن دَوْل، وَيْنُو الْكَبِيرْ؟ الدَّهَبْ وَلَّا بَيْت اللّٰهْ؟ وَ الدَّهَبْ مَا مُقَدَّسْ إِلَّا كَانْ قَاعِدْ فِي بَيْت اللّٰهْ.

[18] وَ تُقُولُوا كَانْ نَادُمْ حَلَفْ بِمَدْبَحْ هَنَا بَيْت اللّٰهْ، حَلِيفْتَهْ بَاطْلَةْ وَ لَاكِنْ كَانْ نَادُمْ حَلَفْ بِالضَّحِيَّةْ الْقَاعِدَةْ فَوْق الْمَدْبَحْ، حَلِيفْتَهْ صَحِيحَةْ.

[19] يَا الْعَمْيَانِينْ، مِنْ الْإِتْنَيْن دَوْل، وَيْنُو الْكَبِيرْ؟ الضَّحِيَّةْ وَلَّا الْمَدْبَحْ هَنَا بَيْت اللّٰهْ؟ وَ شُغُلْ مَا يَبْقَى ضَحِيَّةْ إِلَّا كَانْ قَاعِدْ فَوْق الْمَدْبَحْ فِي بَيْت اللّٰهْ.

[20] خَلَاصْ كَانْ نَادُمْ حَلَفْ بِمَدْبَحْ هَنَا بَيْت اللّٰهْ، هُو حَلَفْ بِكُلَّ شَيْء الْقَاعِدْ فَوْقَهْ.

[21] وَ كَانْ نَادُمْ حَلَفْ بِبَيْت اللّٰهْ، هُو حَلَفْ بِسِيدَهْ.

[22] وَ كَانْ نَادُمْ حَلَفْ بِالسَّمَاءْ، هُو حَلَفْ بِكُرْسِي اللّٰهْ وَ بِالْقَاعِدْ فَوْقَهْ.

[23] يَا الْعُلَمَاء وَ الْفَرِيسِيِّينْ الْمُنَافِقِينْ. الْعَذَابْ يَرْجَاكُو أَشَانْ إِنْتُو مُنْكَرِبِينْ فِي الْعُشُرْ لَحَدِّي تَنْطُوا لِلّٰهْ مِنْ النَّعْنَاعْ وَ الشَّمَارْ وَ الْكَمُونْ وَ لَاكِنْ إِنْتُو نِسِيتُوا مَا طَبَّقْتُوا الشُّرُوطْ الْكُبَارْ فِي التَّوْرَاةْ مِثِلْ الْعَدَالَةْ وَ الرَّحْمَةْ وَ الْأَمَانَةْ. أَوَّلْ شَيْء وَاجِبْ تِسَوُّوا الْأَشْيَاءْ الْكُبَارْ دَوْل وَ بَتَّانْ مَا تَنْسَوْا كَلَامْ الْعُشُرْ.

[24] يَا إِنْتُو التُّقُودُوا النَّاسْ وَ إِنْتُو ذَاتْكُو عَمْيَانِينْ. إِنْتُو تِصَفُّوا الْأَلْمِي مِنْ الْبَاعُوضَةْ وَ لَاكِنْ تَزُرْطُوا الْجَمَلْ.

[25] يَا الْعُلَمَاء وَ الْفَرِيسِيِّينْ الْمُنَافِقِينْ. الْعَذَابْ يَرْجَاكُو أَشَانْ وَكِتْ تِلْوَضَّوْا دَا يَبْقَى مِثِلْ تِغَسُّلُوا الْكَاسْ وَ الْكَوْرَوْة مِنْ بَرَّا بَسْ. لَاكِنْ فِي دَاخَلْ هُمَّنْ مَلَانِينْ هُمَّنْ مَلَانِينْ تَكْ مِنْ خُمَامْ السِّرْقَةْ وَ مِنْ طَمَعْ.

[26] يَا الْفَرِيسِي الْعَمْيَانْ. أَوَّلْ غَسِّلْ الْكَاسْ مِنْ دَاخَلْ أَشَانْ يَبْقَى طَاهِرْ مِنْ بَرَّا كُلَ.

[27] يَا الْعُلَمَاء وَ يَا الْفَرِيسِيِّينْ الْمُنَافِقِينْ. الْعَذَابْ يَرْجَاكُو أَشَانْ أَيِّ نَادُمْ مِنْكُو بَشَابِهْ مِثِلْ قَبُرْ مَتْلُوسْ أَبْيَضْ وَ مِنْ بَرَّا جَمِيلْ وَ لَاكِنْ دَاخَلْ مَلَانْ بِعُضَامْ الْمَيْتِينْ وَ بِالْعَفَانَةْ.

[28] بِمِثِلْ دَا، كُلَّ النَّاسْ يِشِيفُوكُو وَ يَحْسُبُوكُو عَدِيلِينْ وَ لَاكِنْ فِي قَلِبْكُو إِنْتُو مَلَانِينْ بِالنِّفَاقْ وَ بِالْفَسَالَةْ.

[29] يَا الْعُلَمَاء وَ الْفَرِيسِيِّينْ الْمُنَافِقِينْ. الْعَذَابْ يَرْجَاكُو أَشَانْ إِنْتُو قَاعِدِينْ تَبْنُوا قُبُورْ الْأَنْبِيَاءْ الْمَاتَوْا زَمَانْ وَ تِفَنْدُسُوا قُبُورْ الصَّالِحِينْ.

[30] وَ تُقُولُوا كَانْ أَوَّلْ عِشْنَا فِي زَمَنْ جُدُودْنَا، مَا نِشَارُكُوا مَعَاهُمْ فِي كَتِلْ الْأَنْبِيَاءْ.

[31] وَ مِثِلْ دَا، تَشْهَدَوْا فَوْق نُفُوسْكُو وَ تُقُولُوا إِنْتُو أَوْلَادْ كَتَّالِينْ الْأَنْبِيَاءْ.

[32] خَلَاصْ، كَمُّلُوا الْخِدْمَةْ الْجُدُودْكُو بَدَوْهَا وَ تَمُّمُوهَا مَرَّةْ وَاحِدْ.

[33] يَا دَبَايِبْ. يَا عِيَالْ أَمْ شِدَيْقَاتْ. كِكَّيْف تَنْجَوْا مِنْ عَذَابْ جَهَنَّمْ؟

[34] وَ خَلَاصْ نِرَسِّلْ لَيْكُو أَنْبِيَاءْ وَ عُلَمَاءْ فَاهِمِينْ وَ مُعَلِّمِينْ. وَ وَاحِدِينْ مِنْهُمْ تَكْتُلُوهُمْ فِي صَلِيبْ وَ آخَرِينْ تَفُرْشُوهُمْ فِي بُيُوتْ الصَّلَاةْ وَ تَطُرْدُوهُمْ مِنْ حِلَّةْ وَاحِدَةْ لِحِلَّةْ آخَرَةْ.

[35] وَ كُلَّ النَّاسْ الصَّالِحِينْ الْكَتَلَوْهُمْ فِي الْأَرْض، دِمَّتْهُمْ تَجِي فِي رَاسْكُو مِنْ دِمَّةْ هَابِيلْ الصَّالِحْ لَحَدِّي دِمَّةْ زَكَرِيَّا وِلَيْد بَرَخِيَّا الْكَتَلْتُوهْ بَيْن بَيْت اللّٰهْ وَ الْبَكَانْ الْيِقَدُّمُوا فَوْقَهْ ضَحِيَّةْ لِلّٰهْ.

[36] نُقُولْ لَيْكُو الْحَقّ غَضَبْ اللّٰهْ هَنَا كُلَّ الْكَتِلْ دَا بَنْزِلْ فَوْق نَاسْ هَنَا وَكِتْنَا دَوْل.

[37] يَا مَدِينَةْ الْقُدُسْ، يَا مَدِينَةْ الْقُدُسْ. يَا كَتَّالِينْ الْأَنْبِيَاءْ. إِنْتُو التَّرْجُمُوا النَّاسْ الْاللّٰهْ بِرَسِّلْهُمْ لَيْكُو. كَمْ مَرَّةْ دَوَّرْت نِلِمّ عِيَالْكُو مِثِلْ الْجِدَادَةْ تِلِمّ عِيَالْهَا تِحِتْ جَنَحَيْهَا لَاكِنْ إِنْتُو أَبَيْتُوا.

[38] شِيفُوا يِخَلُّوا بَيْتكُو يَابِسْ مَرَّةْ وَاحِدْ.

[39] وَ خَلَاصْ نُقُولْ لَيْكُو مَا تِشِيفُونِي بَتَّانْ لَحَدِّي تُقُولُوا ‹مَبْرُوكْ لِلْجَايْ بِأُسُمْ اللّٰهْ›.