[1] وَ فِي الْوَكِتْ دَاكْ، هِرُودُسْ مُحَافِظْ دَارْ الْجَلِيلْ سِمِعْ خَبَرْ هَنَا عِيسَى.
[2] وَ قَالْ لِخَدَّامِينَهْ: دَا يَحْيَى الْمُغَطِّسْ. هُو بَعَثْ مِنْ الْمَيْتِينْ. أَشَانْ دَا بَسْ، الْقُدْرَةْ الْعَجِيبَةْ دِي قَاعِدَةْ فَوْقَهْ.
[3] وَ أَوَّلْ هِرُودُسْ كَرَبْ يَحْيَى فِي السِّجِنْ وَ رَبَطَهْ بِجَنَازِيرْ فِي شَانْ زَوْجِتَهْ هِرُودِيَّةْ. أَوَّلْ هِي مَرَةْ فِلِبُّسْ أَخُوهْ لِهِرُودُسْ
[4] وَ يَحْيَى قَالْ لَيَّهْ: مَا حَلَالْ لَيْك تَاخُدْهَا.
[5] وَ هِرُودُسْ دَوَّرْ يَكْتُلْ يَحْيَى لَاكِنْ هُو خَايِفْ مِنْ زَعَلْ النَّاسْ أَشَانْ فِي فِكِرْهُمْ يَحْيَى نَبِي.
[6] وَ لَاكِنْ يَوْم حَوْل مَوْلِدْ هِرُودُسْ، قَاعِدِينْ يِعَيُّدُوا وَ بِنَيَّةْ هِرُودِيَّةْ لِعِبَتْ قِدَّامْهُمْ وَ هِرُودُسْ فَرْحَانْ بِلْحَيْن مِنْهَا.
[7] وَ حَلَفْ بَنْطِيهَا أَيِّ شَيْء التِّدَوْرَهْ.
[8] وَ الْبِنَيَّةْ أَوَّلْ شَاوَرَتْ أَمَّهَا وَ بَعَدْ دَا قَالَتْ: أَنْطِينِي رَاسْ يَحْيَى الْمُغَطِّسْ وَ جِيبَهْ لَيِّ هِنِي فِي سُفْرَةْ.
[9] وَ الْمَلِكْ نِدِمْ لِكَلَامَهْ وَ لَاكِنْ أَمَرَهْ لِعَسْكَرَهْ يِجِيبُوا رَاسْ يَحْيَى عَجَلَةْ أَشَانْ حَلَفْ قِدَّامْ كُلَّ ضِيفَانَهْ.
[10] وَ رَسَّلْ عَسْكَرْ فِي السِّجِنْ وَ قَطَعَوْا رَاسْ يَحْيَى.
[11] وَ جَابَوْا الرَّاسْ فِي سُفْرَةْ وَ أَنْطَوْه لِلْبِنَيَّةْ وَ هِي وَدَّتَهْ لِأَمَّهَا.
[12] وَ تَلَامِيذْ يَحْيَى جَوْا وَ شَالَوْا جَنَازْتَهْ وَ دَفَنَوْه وَ خَلَاصْ مَشَوْا أَوْرَوْا عِيسَى.
[13] وَ عِيسَى سِمِعْ الْخَبَرْ دَا وَ رِكِبْ فِي الْمَرْكَبَةْ وَ مَشَى وِحَيْدَهْ فِي بَكَانْ مَا فَوْقَهْ ناس. وَ لَاكِنْ نَاسْ كَتِيرِينْ سِمْعَوْا هُو مَشَى هِنَاكْ وَ مَرَقَوْا مِنْ حِلَّالْهُمْ وَ مَشَوْا وَرَايَهْ بِرِجِلَيْنهُمْ.
[14] وَكِتْ عِيسَى دَلَّى مِنْ الْمَرْكَبَةْ فِي خَشُمْ الْبَحَرْ، هُو شَافْ نَاسْ كَتِيرِينْ بِلْحَيْن قَاعِدِينْ يَرْجَوْه وَ حَنَّ فَوْقهُمْ وَ دَاوَى الْمَرْضَانِينْ الْمَعَاهُمْ.
[15] وَ وَكِتْ الْعَشِيَّةْ بِقَتْ، التَّلَامِيذْ جَوْا لَيَّهْ وَ قَالَوْا: الْبَكَانْ دَا خَلَاءْ وَ الْوَكِتْ أَخَّرْ. خَلَاصْ خَلِّي النَّاسْ يَمْشُوا فِي الْحِلَّالْ وَ يِبِيعُوا شَيْء يَاكُلُوهْ.
[16] وَ عِيسَى قَالْ لِتَلَامِيذَهْ: مَا وَاجِبْ ليْهُمْ يَمْشُوا. إِنْتُو بَسْ أَنْطُوهُمْ أَكِلْ.
[17] وَ قَالَوْا: مَا عِنْدِنَا شَيْء إِلَّا خَمْسَةْ خُبْزَةْ وَ حُوتْ إِتْنَيْن.
[18] وَ عِيسَى قَالْ لَيْهُمْ: جِيبُوهُمْ لَيِّ هِنِي.
[19] وَ حَجَّى لِكُلَّ النَّاسْ وَ قَالْ: أَقْعُدُوا تِحِتْ فِي الْقَشّ. وَ شَالْ الْخُبْزَاتْ الْخَمْسَةْ وَ الْحُوتْ الْإِتْنَيْن وَ رَفَعْ رَاسَهْ لِلسَّمَاءْ وَ شَكَرْ اللّٰهْ وَ كَسَّرْ الْخُبْزَاتْ وَ أَنْطَاهُمْ لِتَلَامِيذَهْ وَ قَسَّمَوْهُمْ لِلنَّاسْ.
[20] وَ كُلَّ النَّاسْ أَكَلَوْا. وَ شِبْعَوْا لَحَدِّي فَضَّلَوْا. وَ التَّلَامِيذْ لَمَّوْا الْأَكِلْ الْفَضَّلْ وَ مَلَوْا بَيَّهْ أَتْنَا عَشَرْ قُفَّةْ.
[21] وَ عَدَّدْ النَّاسْ الْأَكَلَوْا تَمَّ مِثِلْ خَمْسَةْ أَلِفْ رُجَالْ. وَ عَوِينْ وَ عِيَالْ كُلَ أَكَلَوْا.
[22] وَ عِيسَى أَمَرَاهُمْ لِتَلَامِيذَهْ يَرْكَبَوْا فِي الْمَرْكَبَةْ أَشَانْ يَقْطَعَوْا الْبَحَرْ قِدَّامَهْ. وَ هُو قَاعِدْ فِي خَشُمْ الْبَحَرْ أَشَانْ يِدَوْر يُقُولْ لِلنَّاسْ خَلِّي يَمْشُوا.
[23] وَ وَكِتْ النَّاسْ مَشَوْا خَلَاصْ، عِيسَى طَلَعْ فِي رَاسْ الْحَجَرْ أَشَانْ يِصَلِّي وِحَيْدَهْ. وَ بَعَدْ الْمَغَرِبْ، هُو قَاعِدْ هِنَاكْ وِحَيْدَهْ.
[24] وَ مَرْكَبَةْ التَّلَامِيذْ لِحْقَتْ أُسْط الْبَحَرْ وَ الرِّيحْ قَاعِدَةْ تُسُوقْ مِنْ قِدَّامْهُمْ وَ الْأَلْمِي قَاعِدْ بِبَرْجِلْ الْمَرْكَبَةْ.
[25] وَ بِوَرَدَّيْ، عِيسَى جَاءْ لَيْهُمْ رَايِغْ فِي رَاسْ الْأَلْمِي.
[26] وَ وَكِتْ التَّلَامِيذْ شَافَوْا عِيسَى رَايِغْ فِي رَاسْ الْأَلْمِي، خَافَوْا بِلْحَيْن وَ قَالَوْا: دَا دُلّ. وَ خَافَوْا وَ صَرَخَوْا.
[27] وَ عَجَلَةْ كَيْ عِيسَى حَجَّى لَيْهُمْ وَ قَالْ: شِدُّوا حَيْلكُو، دَا أَنَا. مَا تَخَافَوْا.
[28] وَ بُطْرُسْ قَالْ لَيَّهْ: سَيِّدْنَا! كَانْ صَحِيحْ دَاهُوكْ إِنْتَ، خَلَاصْ نَادِينِي أَشَانْ نَجِي لَيْك رَايِغْ فِي رَاسْ الْأَلْمِي.
[29] وَ عِيسَى قَالْ لَيَّهْ: تَعَالْ. وَ بُطْرُسْ دَلَّى مِنْ الْمَرْكَبَةْ وَ بَدَأْ يَمْشِي لِعِيسَى رَايِغْ فِي رَاسْ الْأَلْمِي.
[30] وَ لَاكِنْ وَكِتْ بُطْرُسْ حَسَّ قُدْرَةْ الرِّيحْ، هُو خَافْ بِلْحَيْن وَ بَدَأْ يَطْمُسْ. وَ صَرَخْ وَ قَالْ: سَيِّدْنَا! نَجِّينِي!
[31] وَ عِيسَى مَدَّ إِيدَهْ عَجَلَةْ وَ كَرَبَهْ وَ قَالْ: إِيمَانَكْ لِسَّاعْ ضَعِيفْ. مَالَا شَكَّكْت؟
[32] وَ وَكِتْ رِكْبَوْا فِي الْمَرْكَبَةْ خَلَاصْ، الرِّيحْ وِقْفَتْ.
[33] وَ فِي الْمَرْكَبَةْ التَّلَامِيذْ جَوْا سَجَدَوْا لَيَّهْ وَ قَالَوْا: صَحِيحْ إِنْتَ إِبْن اللّٰهْ.
[34] وَ وَكِتْ قَطَعَوْا الْبَحَرْ خَلَاصْ، نَزَلَوْا فِي دَارْ جِنِّسَارَتْ.
[35] وَ نَاسْ الْبَكَانْ دَاكْ عِرِفَوْه وَ بَلَّغَوْا الْخَبَرْ فِي كُلَّ حِلَّالْهُمْ وَ جَابَوْا لَيَّهْ كُلَّ الْمَرْضَانِينْ.
[36] وَ شَحَدَوْه لِعِيسَى أَشَانْ يَلْمَسَوْا طَرَفْ خَلَقَهْ وَ كُلَّ نَادُمْ اللِّمِسَهْ لِقِي الْعَافَيْ.