[1] Waha a koli seyyahnaatteete an atin iamiit. I'di Chiirnaanneti Waakh ka chiiran u, “Ayti etoo lakacheekti, garti et lamma ommos seyyah laabto ka a larummaacho.”
[2] Koli lammaatteete goorat an atin leejire a atin tootooche. Toolla an atin ileejirin la a inokhda. Maanti an soonokhdi 'doo'di 'hor uskeel yeele ichoow ki addan tuumman sirbiti an gesso ka koo kaldaye an 'diicho mele.
[3] I'dane yeela, a mehe atin runti saggi Kiriisto afeey ka atin ileeyyeedo tusso marantaan. Kiriisto wihi us atin iyeelo ka ma 'darane, i'daasenyi goytiin ka miig a khaba.
[4] I'di tahe maanti usu lakaahe rumanka i'di weeli enenyet u a 'darneet. I'daasenyi us miigti Waakh ka a jira. Saggaas on u, nahi Kiriisto ka wohoo kaldaye 'darritiis a leegisanna, i'daasenyi miigti Waakh ka, usu a leejirra.
[5] Mujjum isfiiricha usu atin rumanka kakhuufnaanki Kiriisto lakakhuufo khabtaan yeya. Ebba a iskajo. Saggi Yeesso Kiriisto goytiin ikajiro kasoo'hela. Chi'iche i'daas ieheynan, kajmeti atin lakajo ka a kufteen.
[6] Genneyte atin saggi nah kajmeti nah lakajo ka ikunne kassaan.
[7] Toolla la Waakhe wahanna uus 'dee atin suujoon yeeline. Jeenteti nah iwahanni, jeenteti nah 'doo'di kajme ka kute iyoognahe menye, atinhi haag yeessaane 'doonna, chi' nah 'doo'doo ka 'doo'di kajme ka kufe iyoognahe laka.
[8] A mehe nah wihi runti Wori Haaggan buusan yeelin ma nabuu'd, i'daasenyi wihi runtaas orey iwoyto on yeella.
[9] Chirbaaw nah 'darannahe atin la miigtahiin, nah a hamaana. Weysiheenyo la a Waakkhi tuum atin isoobuuhicho.
[10] Jeentetaas u geeddi an atin ileejirin khadaaba a atin isoochiira, 'dee cha'an imiy sag ani antoheeyki miige ka atin idakhdi mele. Antohaas an atin kadakhdi Kamure isiiche, 'dee 'doo'd Kiriisto ma jejjebcho, disa.
[11] 'Doo'd Kiriistokaaw wihi yomboot, taba weyti hamaada, 'doo'di buuho ateeha, uur ismiigoocha, maloo kalday khaba, nebey iskaleefiddiya. I'da ka Waakkhi 'doonin ichoow nebey tuumman leh a atin leejira.
[12] Taba 'doonin Kiriisto iskabariiticha.
[13] 'Doo'di Waakhe inta kajiro tuumman a atin soobariitiche.
[14] Haag Yeesso Kiriistohi Kamure ichoow 'dooninti Waakh ichoow kulanki Rubeyti Munyee ba atin tuumman atin leejiraan.