[1] Orey on isohda eylaja. I'daasenyi indigir iche khabto mele. Eheetteey laka inti an eylajeey ka eleelo a wahanyeyyohi Kamur ituse i'di maanta fooltabchoyyo ichoow wihi Kamur isoobabbakkaahiche.
[2] An etoo usu ichoow Kiriisto wohoo kalday yahiine gu'h tomon ichoow affar kutte goobi Waakh ka inti seeyyahnaatteet liikorche a garda. Sar kijiryeey ommos sar ma kijirineey ka ba an ma gardi, Waakh on garta.
[3] Eta a garda, i'daasenyi sar kijiryeey ommos ma kijirineey ka ba Waakh on garta.
[4] Eta a lakhabte inti gosi Waakh lageeche, toro la yeedi lagane weeli enenyet af leekeenin ikamalin daage.
[5] Ani eti i'daasenye keeylaja. I'daasenyi wihi 'darriteey tuso kaldach on keeylaja menye, an awteey ma keeylajo.
[6] A mehe cha'an eylajin 'doono laka, an 'dalam mee, i'di tahe an wihi rummaat on cheeka. Toro la 'doo'd usuhi wihi us ikaargo ichoow wihi us ikadaago ka eti rumanka an ahe argo 'doona. I'daasenyi cha'an eylajo 'doo'd etoo deefo iekkaacha, 'deerka an ma eylajo.
[7] Jeenteti wahanyeyyohaas hahhaaggane Waakh itusuu la, sarteey goya kudakkoo lagesse us 'dee an weyti serey isgeenne. Kudakka la a ergattiti Seytaane ijahto.
[8] Kol seyyahe Kamur hawwaasde, waha ikabukkhi iidah.
[9] I'daasenyi mehe isoolaabe ya, “Haaggeeyki buure a kiyaakha. A mehe 'darritaah ka miigteey tuum a lasoobabbakkaahiche.” Maantaka an 'darriteey ka weyti hamaad ka eylaja, 'dee miig Kiriisto goyteey furatta.
[10] Cha'an indigir Kiriistuu 'daranahe, ommos chirri 'doo'doo ileeabaarramo, ommos chirri an sina 'helo, ommos chi' sina liiomhicho ommos walahbaaw miigenye an goya leeamiit ka laka, an a hamaada on. I'di tahe 'darriteey ka, miig a khaba.
[11] An eti 'dalamenye iskayeele, i'daasenyi atine iholissseen. Atine kootte incheenka haaggeey tuumman cheektaan. A mehe an walah an ahe mele. Eheetteey laka chi' ergaanota a khukkhummantahe leessi liikeekkaacho, meel an icho kaankhanahe mele.
[12] Goytiin ka wihi eti ergaanee tuso i'di maanta wahanyeyyohi miigti Waakh tuso ichoow girmo ichoow wihi ittaawenye weeli enenyet yeelin iubaa'dan garrahsihi buure ka a layeele.
[13] Haaggi kaldaye ururre Kiriistoti addan liiyeele atin la atin liikayeelin, a huleesi chilimme an atin ikorin. Khufa ikakuta!
[14] Toolla koli seyyahnaatteet a tannabde goytiinna emeet 'doona. Hulees an atin korcho la mele. A mehe wihiin an 'doono mele, i'daasenyi atine atin 'doona. I'di tahe nyaakhut mee 'doo'di dele walah yahay igesso, i'daasenyi 'doo'di nyaakhut dele iche nyaakhut walah yahay igessa.
[15] Ani 'deerka hamaad ka wihi an khabo tuumman ichoow awteey laka jeentetiin u a diiba. I'daasenyi geeddi 'dooninti an atin 'doono kakhayanto, geeddaase 'dooninti atin i'doontaan nuglaatta.
[16] Atin mehe garattaan ya, a rume hulees an atin korche mele, i'daasenyi an khara ka a atin kakharaawe.
[17] Etoo an atin isooerge ka, an injire a atin kakharaawe?
[18] An Tiito a hawwaasde, toro etoo koo Kiriistee leesooerge. Tiito injire a atin kakharaawe? Lammateenyo rubeytoo kalday ma khabin a? Toro la dabatoo kalday ma raahin a?
[19] Chirraas tuumman kol nah ortiin ka isribno koogtahiin? Nah Waakh ortiis ka saggi 'doo'di icho ichoow Kiriisto wohoo kalday yahiine iyeyyeena. Aalasseeyki an weyti 'doono wihi nah yeello tuumman la a atin miigoochaan.
[20] I'di tahe maanti an goytiin amiit wihi an karooro, saggi kootte an i'doono ma atin i'helo, toro la saggi atin kootte i'doontaan ma i'hessaan. Mehe karoora ya, waha tuumman goytiin ka a 'hela, jaakh ichoow inaaf ichoow holi buure ichoow wihi ebba wihi awtiis kalday on yowti ichoow ham ichoow me'de'ddeel ichoow rannyaat ichoow hugun'darri.
[21] Jeenteti wahuu wihi an karooro maanti toro an atin iamiit Waakkheey ortiin ka a inuglaacha, an la jeenteti 'doo'di buure uskeel iyeele uliba uskeelaas ikasoonokhan u a bolkha. Uskeelaas a wihi bi'dire ichoow 'doo'di isidisanne isleeur'do ichoow soho'ddarriti icho yeeleen.