[1] Waha nah elanni ka, rumanka a inokhanna toro haaggeenyo atin isoocheekna? Rumanka nah i'di 'doo'd gaasoo u, khadaabbeti haaggeenyo cheekto ma atin ka'doonno. Toro la atin ma nah ka'doontaan.
[2] Atin rubeytiin a i'di khadaabeenyoki uurasseenyo goya lakachiire, enenyet tuumman garti, toro la soomo.
[3] Wihi 'dowe, atin a khadaab Kiriistoki hileenyo dele. Waha la wihi ringi ka lachiire menye, Rubeyti Waakkhi jiro lakachiire. Toro wihi daakki hafan lakachiire menye, Rubeyti Waakkhi jiro iche uurassi weeli enenyet goya kachiirte.
[4] Jeenteti nah Kiriisto ka tuum Waakh ikakhuufnuu, nah uurlammaal ma khabno.
[5] Nah awteenyuu walah nah nabuu'd mele, i'daasenyi wihi nah yeelin nabuu'd Waakh on kayamiitiin.
[6] Waakh 'doo'di ayyinti husube us gooche ifalin yabuu'de nah kayeele. Ayyinta husub la amurreti chiiran menye, a wihi Rubeyti Waakh kayimiy. A mehe amurreti lachiire omoote keenta, i'daasenyi Rubeyti Munyee jiro keenta.
[7] Amurreti omoot keente dagah lakakhore, ababnaanki Waakkhi ababo leesoobahte. Ababnaanka fool Muusa ababo samacchaare jite. Eheetteey laka weyti ababneete ichoowka 'doo'di Issiraayel fiirin ma yabuu'd. Maantaka chirri amurreti omoot keento ababnaanki geeddee leesoobahte,
[8] hili Rubeyti Munyee ababnaankiche weyti ma kuto?
[9] Chirri hili enenyet uskeel igoocho ababnaanki geeddee khabe, geeddoo meheenye ababnaanki hili enenyet Waakh ortiis ka ficcho kuta.
[10] I'di tahe jitaas oraate ababo a i'doo us toolla iababin, a mehe ababnaanki jiti toollane weyti kuta.
[11] Toro la chirri ayyinti raagane kutto ababnaan leetimiy, ababnaanki ayyinti husube soo'haddo rumanka geeddoo meheenye kuta?
[12] Maantaka jeenteti nah khajjeelaas ikhabno, iche roorro laan ijirra.
[13] Nah i'di Muusahi goorat dafartoo 'dabakhe fool iskoogooge, 'dee 'doo'di Issiraayele ababnaankaas samacchaar jite fiiricho istirte mee.
[14] I'daasenyi malassicho a ladagahnooche. I'di tahe ichoowka maanta laka chirri icho buuggassi ayyinti raagane Waakh gooche soomaan a i'doo malassicho dafar lakoogooge. Dafarta uliba a jirta. I'di tahe maanti etoo ichoow Kiriisto ba wohoo kalday yitaaheen kalday on dafar lakayegcha.
[15] Ichoowka maalinka laka chi' buuggassi Muusa chiire lasoomo, uurassicho a i'doo dafartaas lakoogooge.
[16] I'daasenyi maambaaw etoo Kamur iurgiye dafartaas a lakayegcha.
[17] Toollaka Kamur a Rubey. Inti Rubeyti Kamur kijirto la enenyet a furanyahe.
[18] Inno tuumman la foolasseenki liiogoogin ka, a i'doo inno ababnaanki Kamur kitaab goyaka bihinno. Geedda inno bihinno la a inno luurgiyicha, samacchaar usu iokkanaanna. Ababnaanka inno ababno la Rubeyti Kamure kayamiite, kakhayma weyti buuraata.