[1] Ani Baawulo uur Kiriistoki 'dabakhe ka ichoow samacchaar Kiriisto ka a atin hawwaasda. Waha a anihi cha'an atin leejiro, uure 'dabakhyahe leessi, i'daasenyi cha'an atin ileejirin roorro ma khabo leessi.
[2] 'Doo'doo mehe essa ya, nah saggi 'doo'di harratane ijirra. Maanti an amiit wihi liikasugo a anihi icho roorro laan leeyyeedo. I'daasenyi a atin hawwaasda wihi i'daase iiholinna.
[3] A mehe inno harratane kijirra. Eheetteey laka, dihoti inno kajirro ti weeli enenyet isladiho mee.
[4] A mehe birti inno diho leeiranni ti harrata mee, birteen a miigti Waakhe worassi beenaat jejjebisso.
[5] Wihi inno jejjebinno a iriirti yeedi beenaat liiriiro ichoow rannyaatti noole abanti Waakh laabti jeyisso. Nah toro mal tuummane khabanna 'dee iholinna Kiriisto raahaan.
[6] Maanti atin raahnaanki atin Kiriisto raahtaan atin tuumman tuum kayeesseen, nah walah tuumman ka a tannabanne yeeddaagiwwaayyo tuumman sina tusna.
[7] Atin walah kharicheeda on yeytaan. Chirri etoo saggi us koo Kiriisto iyahe ubo waha toro a kamassi. Saggaas us koo Kiriisto iyahe on nah laka koo Kiriisto inahe.
[8] A mehe antohi Kamur nah siiche wihi atin jejjebcho menye a wihi atin diso. Cha'an antohaas weyti keeylajo laka, an ma uryaawo.
[9] Anihiiyye khadaabbeteey ka etoo roorro atin gesso iyoog ma 'doono.
[10] A mehe 'doo'd gaasoo mehe essa ya, “Khadaabbetiis yeedi huleesenye toro miigenye kijira, i'daasenyi chu'us inno leejiro us a 'daranyahe yeediis laka walah us yahe mele.”
[11] Eti i'daase waha a kamassi. Wihi nah khadaab ka atin isoochiirro iche on maanti nah atin leejirro laka yeella.
[12] Rumanka nah koloo kalday laka 'doo'di haaggiis enenyet icheeko ma kajno ekkatiis ma iskayeello, ommos ma kajno icho ma iskekkaanno. Wihi icho yeelaan a 'dalammoon on. I'di tahe icho haaggicho ka a isrerreegaane toro haaggicho iskeekkaachaan.
[13] Nah la wihi nah keeylajno, geeddi mujjumenye nah liichiire ma kunno. I'daasenyi wihi nah keeylajno ichoow hili Waakh dahanteenyo soogesse a israahaane, atin laka hila goya a kijirtaan.
[14] Nah geeddi Waakh nah ichiire 'dirihiche ma kunno. A mehe nah 'doo'di orey Wori Haaggane Kiriisto miinsan atin sooeleeliche eheet.
[15] Toro la nah hili etoo addan haaggiche ma keeylajno, geeddi nah liichiire 'dirihiche ma kunno. Wihi nah khajjeello, geeddi kakhuufnaanki atin Kamur kakhuuftaan kakhaymo, hili nah goytiin ka haagginno weyti ballaasta.
[16] I'da ka Wori Haaggan ilassi 'dirihiin kijiro laka a kacheekna, toro hili etoo addan intoo addan ka haaggiche ma keeylajno.
[17] I'daasenyi, “Eti eylajo wihi Kamur yeele a keeylajo.”
[18] A mehe eti iskoolicho rumanka koolo ma khabo. I'daasenyi eti Kamur khaatti iche koolohi rummaat khaba.