[1] Rumanka walah hila baaysihi 'doo'di Waakh liiergo an atin isoochiiro liika'doono mele.
[2] I'di tahe saggi atin rumanka gargaar i'doontaan a garda. Anna 'doo'di boroofenhi Makedooniya ka bihin a atin kagu'dde, saggi atinhi boroofenhi Akhaaya kijirtaan baaysi ka gu'hi kute itannabatteen cheeke. Uuriinkaas haaggan la buurche a kululaache ichoowka icho laka gargaar bihine 'doonaan.
[3] I'daasenyi reera koo Kiriistee a atin isooerga, 'dee eylaji wihi aytaas miinsan ka an atin keeylajo uus wihi ilmarhaatteet eheynane, i'di an 'doo'd iidah u, atin laka tannabattaan.
[4] I'di tahe chirri 'doo'doo koo Kiriistee ili Makedooniya ka isooraahe atinhi itannaban atin sooeleele, jeenteti nah atin ikakhuufnuu atin 'diiche nah laka lakhaanyo a nah khaatatta.
[5] Maantaka wihi an kamalde, reera koo Kiriisteenye hawwaasda orteenyo erga, 'dee baaysihiinki buurenye atin ayyisseen mujjummoossaane massissaan. I'da ka baaysihi atin liihosso menye, wihi atin uuri haaggan ka soobihisseene yateehiin.
[6] Ayti an atin ikhabo talla. Eti ilmohoo rucchul taa'hicho, ullaka gurnaankoo rucchule 'hela. Eti ilmohi buure taa'hicho la ullaka gurnaanki buurenye 'hela.
[7] Ebba uus bolokh ka bihinne ommos liiholinne, ebba geeddi us uuriis ka gooche on a bahcho. A mehe Waakh eti uuri haaggan ka walah diibo iche 'doona.
[8] Waakh la haaggiiski buure tuumman ka wihi atin 'doontaan 'dirihicho laka atin siin a yabuu'de, 'dee walah tuumman ka ichoow kolal tuumman ka wihi atin 'doontaan tuumman khabtaane, hili haaggan tuumman la buuhissaan.
[9] I'di liichiiruu, “Us siimohiis a taa'hiche, uuri haaggan ka miskiino siiche. Fissanoonkiis jirtuu a soo'hada.”
[10] Waakkhi eti gos leh ilmohi lataa'hicho siicho, toro makaateti us yaham siicho, ilmo a atin siicha toro atin ikasookhaya, 'dee gurnaanki atin wihi fiffissan yeessaan kakhayma.
[11] Waakh walah tuumman ka a atin kamurroocha 'dee kol tuumman uuri haaggan ka 'doo'di addan gargaartaane, 'dee wihi atin soobaayisseene nah diibno ka 'doo'd Waakh kala'd ilaaba.
[12] A mehe hila 'doo'd lagargaaro atin gessaan 'doo'di Waakh gargaar kalday ma gargaaro, i'daasenyi kala'ddi buurenye Waakh liilaabo laka a dela.
[13] Hila saggi atin rumanka Kiriisto iraahtaane tuse. Wori Haaggane atin kakhuufteen ka, wahanyeyyohi Waakh a raahteen. Toro la wihi atin khabtaan icho ichoow 'doo'di addan a leegisanteen. Jeenteti waha dakkhan u 'doo'd Waakh a koolicha.
[14] Jeenteti haaggi Waakhe buurenye us tuum atin siichuu la, icho weyti atin imoonaan geeddi icho Waakh atin isoowahaan.
[15] Waakh kala'd ilaabno jeenteti siintiisti buurenye inno af ka wihiche cheekin iubaa'dan u.