[1] I'di tahe wihi inno garanni, chi' sarteenta harratane inno khabno i'di eemee labaabiicho, goobi Waakh ka, minki jirtuu imassanne inno Waakh ka'hello a khabna. Minkaas la ki dahanohi enenyet haaggicheen mee.
[2] Geeddi inno sarta on khabno a ooyna, toro la sarti husube goobi Waakhe i'di dafarti inno gessannuu imoonna.
[3] A mehe maanti i'daasu sarti goobi Waakh inno lakagaade, rubeyoheen sar laan ma fiddiyaan.
[4] I'di tahe geeddi inno sarteenta harratane i'di eemee on khabno a ooyna i'doo hulees inno lakorchuu. Waha jeenteti innohi sarteenti harrata lakaduumicho i'doonno menye, innohi sarteenti husube goobi Waakhe inno lagesso 'dee jiroti jirtuu imassan sarteenta tamuut chakhsatti iche 'doonna.
[5] Toolla Waakh rubeytiis waha a inno itannabiche. Ulla toro Rubeyti Munyeenye inno siiche, 'dee iche ka, saggi inno wihi us inno iabbire tuumman tuum rumanka i'hello inno tuse.
[6] Maantaka nah kol tuumman roorro ma khabno. Wihi inno garanni a mehe ya, geeddi inno sarta harrata on khabno Kamur foga ileejirra.
[7] A mehe jirota nah jirro jeenteti nah usu indo ikaagarro menye jeenteti kakhuufnaanki nah usu ikakhuufno iche ijirra.
[8] Nah roorro ma khabno, nahi sarta nah lakabahcho iranni Kamur leefiddiino 'doonna.
[9] Maantaka sarta ka jiro khabneey ommos ma khabineey ka ba wihi nah 'doonno tuumman, a nahi usu on kahamaadinno.
[10] I'di tahe inno tuumman komborti Kiriisto enenyet kahukkumo orcheeda kasoobahna, 'dee ebba haag ommos suujoonki us geeddi us sartiis khabo yeele ka laguta.
[11] Maantaka nah Kamuri lakarooro wihiis a garanna gone, hole downa weeli enenyet hawwaassanna. Waakh wihi nah nahe khuuf on garta, toro an a khajjeela atin laka rubeyohiinki haag ichoow suujoon seley saaho ka wihi nah nahe khuuf a garattaan.
[12] Nah toro haaggeenyo ma atin isoodowdowno, jiti haaggane atin keeylajjaan on atin siinna. I'da ka la jeenteti wihi uur goya kijiro menye, jeenteti wihi indo lakaarguu, atin 'doo'daas walah ilaabin a tabuu'diin.
[13] Chi' nah sirgo nahe a iroonoti Waakhe, chi' nah sirgo ieheynan la a iroonotiinna.
[14] Saggi Yeesso Kiriisto meessi enenyet tuumman ikayumuy a tissibna. Jeentetuu 'doonin Kiriisto inno dakhatta. Inno tuumman a i'doo inno tuunne, jiroti oraat ma inno dakhatti.
[15] Ulla enenyet tuumman a iyumuyye 'dee eti tuummane jiro uus saggi us awtiis u i'doono ijirine, i'daasenyi saggi Kiriisto i'doono a ijiro. I'di tahe Kiriisto a yumuyye Waakh la iroonotichuu usu omoot kasookahche 'dee icho la jiraan.
[16] 'Deerka uus toolla kakhabatti i'di 'doo'di harratuu, enenyet saggi inno iagarro ma ikhaanno. Chi'inno goorat Kiriisto i'doo us weeli enenyet yahuu i'daas yeelle laka, kola i'daas ma yeello.
[17] Maantaka eti tuummane usu ichoow Kiriisto wohoo kalday yahiin a uumacchotoo husub. Jiroti raagan a kasootabe, too husube jira.
[18] Waha tuumman la Waakhe yeela. Ulla Kiriisto ka weeli enenyet ankiissa keene, toro la hila Waakhe enenyet anki Waakh lakeeno inno korche.
[19] Wihi an eldi a waha, Waakh Kiriisto ka 'doo'di harrata ankiissa keene. Ulla uskeelicho ma ekkaacho. Toro la hili us nah korche a ki nah saggi usu weeli enenyet ankiis ikeeno nah cheekno.
[20] Maantaka nah a 'doo'di meel Kiriisto kijiro. Waha a i'doo Waakh nah ka enenyet hawwaasti. Nah la a atin hawwaassanna iroono Kiriistuu taba keennaanki Waakh ankiis atin keeno raaha.
[21] Waakh Kiriistohi uskeeloo rucchul laka iyeeline meesseen ka eti uskeel leh kayeele, 'dee Kiriisto ka fissanoonki Waakh inno liiekkaacha.