[1] 'Doo'd Kiriistokaaw toolla siinti haaggi Waakhe buurenye us ururre Kiriistoti boroofenhi Makedooniya kijirto siiche iche atin isoocheekin 'doonna.
[2] Sinayyohi buurenye lakakaje, i'daasenyi hamaadicho weyti buuraate, miskiinkichoki buuraate ka la icho weyti walah diibin 'dooneen.
[3] I'di tahe wihi an arge an atin isoocheeko, icho geeddi icho yabuu'diine diibeene, toro la 'dirihicho diibeen. Icho awtichuu a goocheene,
[4] weyti nah hawwaasteene, 'dee 'doo'di Waakhe ilkerengeetti Ya'huudiya kijiro haaggi hila khumman leegismaan.
[5] Wihi nah imurre weyti kuteen. Icho kolooraat Kamure isisoobahcheene, toro la saggi Waakh i'doonuu wihi nah yeela inidah laka raaheen.
[6] 'Deerka Tiitohi hilaas chilimme labaayicho sookhabte hawwaassanne, hili wihi atin diibtaan massi inidah.
[7] I'daasenyi atin walah tuumman ka weyti orey jirtaan, i'di maanta kakhuufnaanki atin Waakh kakhuuftaan ichoow Wori Haaggane atin cheektaan, ichoow runti Yeedi Waakhe atin garattaan ichoow wihi tuummane atin aw ikhabtaan. Taba hila 'doonineete atin walah diibtaan ka laka orey jira gi'de.
[8] Amur an atin siicho mele. I'daasenyi 'dooninti atin 'doo'di addan 'doontaan iche rum tahe ichoow usuhuuse kaja, 'dee 'dooninti 'doo'di addan khabo keekkaacha.
[9] I'di tahe haaggi buurenye koo Yeesso Kiriistohi Kamureene a garattaan. Chi' kamurroon tuumman kiis yahe laka, jeentetiin u miskiine yitahye, 'dee miskiinkiis ka kamurrowtaan.
[10] Waansiheeyki ayta miinsan la weyti atin iroonyahiin. Atin 'doo'di oraate gu'hoo kute chilimme baayiche eheete toro la 'doo'di oraate i'daas yeelin 'doone eheet.
[11] Toolla hila walah ladiibo massicha, 'dee ebba i'di goorat atin hili weyti haaggan i'doonteen u a buuhicho. Ebba geeddi us khabo ichoow geeddi us bahcho a israaheen.
[12] I'di tahe chi' etoo wohoo bihin 'doono, khaatannaanki Waakh siintaas khaatti, wihi liikhabin menye, geeddi lakhabo iche raaha.
[13] I'di tahe 'doo'doo mee hulees kayeginno, atin la sina atin korinno, i'daasenyi innohi ekkaawno 'doonna.
[14] Maantá buuhiinná wihi icho laayahiin buuhichá, 'dee maantoo addan toro buuhichoodá wihi atin laatahiin buuhichá. I'daakka la a inno islakeekkaacha.
[15] I'di liichiiruu, “Eti wihi buure soosuune walah kasoo'hade mele, ki wohoo rucchul soosuune laka, walah kaankhate mele.”
[16] Waakkhi awti an atin ikhabo uur Tiito laka goya gesse kala'd ilaabno.
[17] I'di tahe Tiito wihi nah daahne kalday ma khaatanne, i'daasenyi usu awtiis u a gooche usuhi atin iyamiit weyti 'doona.
[18] Etoo addane koo Kiriistee Tiito a kasoo'darra. Eta a etoo ururre Kiriisto tuumman ka saggi us Wori Haaggan icheeko lasaa'do.
[19] Wahaas kaldach on menye, eta toro urur Kiriisto soobahche 'dee nah walhicha baaysiha nah leekhaata. Nah siintane mujjum woywoyna 'dee Kamur lakoolicha toro la saggi inno 'doo'daas weyti gargaar i'doonno laka laarga.
[20] Nah la i'dane yeelle, uus 'dee saggi nah baaysiha buure iwoywoyno ka uskeeloo rucchul laka nah lakacheekanne.
[21] A mehe nah Kamur ortiis ka kalday menye, weeli enenyet ortiis ka laka samacchaare wihi haaggan yeella.
[22] Toro etoo addane koo Kiriisteenye icho ka'darra. Usu jitassi ittaawe ka saggi us rumanka wahanyeyyo Kiriisto uur ikakhabo a tuse. Ulla toolla jeenteti us weyti atin ikakhuufuu weyti gargaar atin 'doona.
[23] Wihi Tiito miinsan la, us a wahalheeyki nah goytiin ka hil isleehaagginno. Wihi 'doo'da lammeenye koo Kiriisteenye usu sooraaho miinsan la, icho a ergattiti ururre Kiriisto, toro la Kiriisto inkaanyit ikeenaan.
[24] Maantaka urur Kiriisto tuumman ortiis ka reeraas 'doonin rumanka tusda, 'dee 'doonintiin ichoow wihi nah atin keeylajno rumanka a laabti.