[1] 'Deerka ani rubeyteey a gooche ma atin iamiit. Anihi toro bolokh atin ikeeno ma 'doono.
[2] I'di tahe chirri an atin bolkhicho, ayyo addane 'dee ikahamaadicha, atin tuumman la a atin bolkhichee?
[3] Jeentetaase khadaabaas atin ikasoochiire, 'dee cha'an amiit atinhi kootte ikahamaadissaan toro ma ikooyissaan. An atin tuumman a atin kakhuufe, 'dee cha'an hamaado, atin tuumman laka a hamaaddaan.
[4] Maanti an khadaabaas atin isoochiire, a bolkhe, weyti mal igele toro la ilmohi buure khube. Atin bolkhin mee 'doono, 'dooninti buurenye an atin ikhabo, iche atinhi garattaan 'doona.
[5] Chirri etoo bolokh keene, ani kalday mee ibolkhiche. Ma kokkorsadi la, us geeddoo ka atin tuummane atin bolkhiche.
[6] Sirbiti buurtiin eta gelisse, a yaakhta.
[7] I'daasenyi kola a atin imasse cha'atin etaas uskeelaas ikakuttaane, toro la uur khoboossaan uus 'dee oytinti buurenye us ooyo ka rubeye jebine.
[8] Maantaka a atin hawwaasde, taba etaas saggi rumanka atin usu i'doontaan toro tusa.
[9] Khadaaba an atin isoochiire ka a atin kaja, 'dee usu atin wihi an yeela atin iidah tuumman yeessaan abda.
[10] Cha'atin etoo uskeel ikakutteen, an laka a ikakute. A mehe wihi an ikakute, chi' rumanka wohoo lakakuto jireen a iroonotiinna, an Kiriisto ortiis ka wahaas a ikakute.
[11] Anna i'dane yeela uus 'dee Seytaan inno kahataatinee. I'di tahe inno luhti Seytaan tuumman weyti garanna.
[12] Maanti an ilkerengeetti Tuurowa imiyye an Wori Haaggane Kiriisto miinsan an cheeke, Kamur jitoo a ifure.
[13] I'daasenyi jeenteti an eteenki koo Kiriisteenye Tiito layadeeh i'helin u, weyti uur isuujowe. 'Deerka 'doo'd a Waakh atin bariisti iidahye, katabe, ilkerengeetti Makedooniya imiy.
[14] I'daasenyi Waakkhi chirrar tuumman gir'daanki soorin Kiriisto ka inno woyo kala'd ilaabno. Waakh nah ka wor Kiriistoki lagarti i'di uyuuggi haaggan u, meel tuummane kataa'hicha.
[15] I'di tahe jiroteen Waakh ka, a uyuug Kiriistoki haaggan. Uyuugga la 'doo'di Waakh ribo ichoow ki baabaa kijiro ba goychooda kijira.
[16] 'Doo'di baabaa kijiro ka, nah a i'di suusakki enenyet bakkicho. 'Doo'di Waakh ribo ka la, nah a i'di uyuuggi jiro lakeelo. Ayyo la hila keley yabuu'd?
[17] A mehe nah i'di 'doo'di buurenye Yeedi Waakh cheeko 'dee chilimme ka'helo mee. I'daasenyi nahi koo Kiriistee, a ergaanoti Waakh sooergate. Wori khollokkhan mee cheekno.