[1] Nah a 'doo'di Waakh hil leehaaggicho gone, a atin hawwaassanne, taba haaggi Waakhe buure wihi ilmarhaatteet iikhaatina.
[2] I'di tahe wihi us essi kallaayo, “Ibeenki mujjume nabah a atin isude, toro ibeenki an atin ribo a atin gargaare.” Dagansada gi'de ibeenki mujjume a toolla, ibeenki Waakh atin ribo a maanta.
[3] Uus 'dee hili Waakhe nah haagginno wohoo suuje lakaargine, wohoo rucchule enenyet tarraantarricho nah yeello laka ma jiraan.
[4] Wihi nah yeello tuumman ka saggi nah rumanka ilbooyyeti Waakh inahe tusna. Saggane wahaas itusna, 'hool ka ichoow sinayyohi nah loomhicho ka ichoow chirri mal nah gele a garrahsanna on.
[5] A nah lajahe, jeela nah lagesse, ururi il baabiicho nah jahe, hili weyti buure haagginne, ur'dumme waayne, ankaane.
[6] Jiroti eloo rucchul laka ikhabine nah jirre ka, runti Waakhe nah abanne ka, samacchaari nah eheet ka, uuri 'dabakhenye nah khabne ka, Rubeyti Munyeenye goyteenyo kajirto ka, 'dooninti rummaate nah khabne ka, saggi nah ilbooyyeti Waakh inahe a laarge.
[7] Nah rumanka runti Waakh a cheekne, miigti Waakh la a nah leejirte. Jiroteenyoti fissan la i'di birti walah lakayagiis ichoow ti walah islakajeycho eheet.
[8] Toro la enenyet nah kooliyyeey ommos nah 'darraawyeey ka ba, nah lahamayyeey ommos nah lasaayyeey ka ba, nah Waakhe ihilla. 'Doo'di ekkeysi lehe nah liiekkaacha, i'daasenyi rum kalday on cheekna.
[9] Rumanka a nah lagarta i'daasenyi saggi 'doo'di liigaranne nah liiwoywoya. Omoot laka a nah lamarma, i'daasenyi uliba a jirra on. Weyti nah lajahe i'daasenyi ma namuut.
[10] Rubeyoheenyo a bolkhaane i'daasenyi kol dakkhan a hamaana, a miskiino i'daasenyi 'doo'di buurenye kamurroonna. Walah weheenyee mele toro la walah tuumman a khabna.
[11] 'Doo'di Koriintooy! Nah wohoo rucchul laka ma atin kadagsanne, saggi nah weyti atin i'doonno laka a atin tusne.
[12] Nah uureenyo ka 'doonin ma atin karimmanni, i'daasenyi atine ankiin ka nah karimmattaan.
[13] Toolla saggi an nyaakhuteey ileeyyeedo iche atin ileeyyeeda. Taba geeddaas nah weyti atin 'doonno, atin laka nah 'doona.
[14] Taba atin ichoow 'doo'di Kiriisto irummeysan dahoo kalday akararanna. I'di tahe 'doo'di fiffissan ichoow ki hugun'darri kaassohti saggoh isiwalhichaan? Toro la 'doo'di banay kijiro ichoow ki mug'di kijiro ba kulankoo kalday a isleekhabaan?
[15] Ayyintoh Kiriisto ichoow Seytaan ba isikhabaan? Ommos eti Kiriisto rummeeste ichoow ki Kiriisto irummeysan mehe iskakhabaan?
[16] Minki Waakhe buure ichoow iyookkoyyo saggoh isidaagaan? A mehe inno a minki Waakhe buurenye Waakkhi jiro. I'di Waakh yidah u, “An goychooda furda, goycho kaassohda. An Waakkhichooda ateehe, icho la 'doo'daaya yateehiin.”
[17] “Maantaka kaaleya goycho kasoobaha, kasoogowa, iche Kamur essa. Wihi bi'dire a'daarina, anna a atin khaaddaa.”
[18] “An ooyohiinna ateehe, atin la nyaakhutaaya tateehiin,” iche Kamuri Miig Tuumman Leh essa.