[1] Maantaka aalasseeyki an weyti 'doono, Waakh wahaas tuumman a inno iayyiche gone, wihi tuummane sarteen ichoow rubeyteen bi'dirroocho iskadikhno. Jeenteti inno Waakh ikaroorruu la, orey isohda 'doo'di tuum munyee ateeha.
[2] Saggi atin nah i'doontaan nah tusa gi'de. Nah et nah ikhufne mele ommos et nah jiti us Waakh kakhuufo ka baabiinne mele ommos et nah kakharaawne mele.
[3] Jeenteti an uskeel atin ikagoocho mee waha ieldi. A mehe 'hor a atin iidahye uur atin kakhabna, omoote jirteey ommos jiro jirteey ka ba a isleejirra.
[4] An weyti roorro laan atin leeyyeeda, toro la jeentetiin u a eylaja. Weyti uur liimiigooche. Sinayyohi buurenye inno khabno ka laka, hamaadeey weyti buuryahe.
[5] A mehe maanti nah boroofenhi Makedooniya nimiy sarteenyo ma nasin. I'daasenyi 'dolloheenyo tuumman sina kijirte. Khareenyo jaakhe kijire goyteenyo la roorro kijirte.
[6] I'daasenyi Waakkhi 'doo'di rubeye jebte uur khoboocho, emeet Tiito ka uur a nah khobooche.
[7] Emeettiis kalday uur ma nah khoboonne, wihi uur nah khobooche a saggi atin usu uur ikhoboosseen. Us saggi atin iargin i'doontaan ichoow saggi jeenteti atin ani sina itusseen u iooyteen ichoow saggi atin ani weyti aw ikakhabtaan laka a nah isoocheeke. Jeentetuu an weyti hamaade.
[8] A mehe chi' khadaabi an 'hor atin isoochiire oytim atin ikeene laka, jeenteti an isoochiiruu ejer ma istowo. Rumanka geeddoo rucchul on ka khadaabeeykaas ka ejer istowe.
[9] I'daasenyi toolla an a hamaada. Jeenteti atin iooyteen menye, jeenteti atin oytintaas ka uskeel ikasoonokhatteene ihamaada. I'di tahe oytintaas a saggi Waakh i'doone, 'dee wihi nah yeelle ka wohoo rucchule sina atin ikeeno ma jiraan.
[10] A mehe oytinti enenyet saggi Waakh i'doono iooyo wihi iche desso a uskeeli lakasoonokhti ribnaanki Waakh enenyet ribo iwoyo. Wahaas ka la et ejer istowo mele. I'daasenyi oytinti saggi 'doo'di harrata liiooyo omoot on dessa.
[11] Bal wihi oytintaas saggi Waakh i'doono liiooyo atin ikeento yeya. Saggi atin uskeel iyeeline tusseene, wihi yitah ka hollowteene, wihi soosohti ka la roorro atin gesse. Atinhi iagartaane 'doonteen, atinhi ani igessaane etaas uskeel yeele hukkuntaan iche 'doonteen. Wahaas tuumman ka saggi atin wihi yitah ka eloo rucchul laka ikhabine tusseen.
[12] 'Deerka cha'an khadaab atin isoochiire laka, jeenteti eti khuf yeele ommos eti liikhufe menye, a jeenteti Waakh ortiis ka saggi atin uur nah ikakhabtaan an atin ikasoobabbakkaahicho.
[13] Maantaka waha weyti uur nah khoboocheen. Uur kalday ma nah khoboonne, wihi kach ka nah kahamaadiche a hamaadi Tiito khabe jeenteti atin tuumman wa'dwaa'di us khabe ibihisseen.
[14] A mehe cha'an ortiis ka bihin atin kagu'dde laka, an lakhaanyo ma argo. Saggi nah walah tuumman rum ka atin isoocheeknuu, bihinti nah Tiito ortiis ka atin kagu'dubne laka runtiche a atin tusne.
[15] Ulla 'dooninti us uuriis ka atin 'doono weyti buuraatta, geeddi us saggi atin aytiis idaagteene toro atin usu roorro ichoow inkaanyit ka imartiisatteen kasoo'helo.
[16] Maantaka an weyti hamaada a mehe walah tuumman ka a atin kakhuufaa.