[1] Khadaaba eti atin isoochiiro, a ani Baawulohi ergaanee. Weel enenyete hila ergaano ikorche mele, ommos weel enenyete isooergate mele. I'daasenyi Yeesso Kiriisto ichoow Waakkhi Aabbaheenenye, Yeessó omoot kasookahche ka a liisooergate.
[2] Ani ichoow 'doo'di Kiriisto rummeeste inta ka ileejiro tuumman a atin soobariitinne. 'Doo'di an khadaaba isoochiiro a ururre Kiriistoti boroofenhi Galaatiya kijirto.
[3] Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.
[4] Yeesso Kiriisto ichoow wihi Waakkheenki Aabbaheene 'doono a israahaan. I'da ka jeenteti uskeeleen u a issoobahche yumuyye 'dee 'darriti uskeele wey'da inno kariba.
[5] Waakh koolinno jirtuu tuummamba! Aamiin.
[6] Ani a atin kagirmeesda! Atin saggoh Waakkhi haag Kiriistoki buurenye inno imunneynan ka atin wahe dowwa on ikaguurteene, woroo addane haaggane atin laabche iraahteen?
[7] Rumanka Wori Haaggan koo addan ma jiro. I'daasenyi 'doo'doo atin waraariya, toro Wori Haaggane Kiriisto miinsan baabulin 'doona.
[8] Chirri nah ommos herti Waakhe serey kijirto kichekoo laka, Wori Haaggane goorat nah atin icheekne on menye, koo addan atin icheeko, Waakh ba etaas jirtuu tuumman fala!
[9] I'di goorat nah nidah u, toro toolla a adeehe, chirri etoo Wori Haaggane goorat atin khaatatteen on menye, woroo addan atin idowe, Waakh ba etaas jirtuu tuumman fala!
[10] An weeli enenyete kahamaadin 'doona? Mele! An Waakhe kahamaadin 'doona. Cha'an uliba enenyet kahamaadin 'doono, an toolla bow'da Kiriisto mee.
[11] 'Doo'd Kiriistokaaw, Wora Haaggane an maantaas atin abche ki weeli enenyet kasoouummame mee.
[12] Wora et an ka'hele mele, ommos weeli enenyete iabche mele. Yeesso Kiriisto rubeytiissa ka'hele, usu isoobabbakkaahiche.
[13] Maanti an hugummeti Ya'huud raahe, saggi an ijire a daagteen. An ururi Waakh sina omhiche toro baabiin 'doone.
[14] An weyti hugumme aacchinyeteenyo isibahche, boorreeyki Ya'huud ka, an rumanka oreye raahe.
[15] I'daasenyi, Waakh geeddi an idelan on isoobahsate, toro haaggiiski buure on ka iwahe, wihi us gooche,
[16] eti Weeliis yahe isoobabbakkaahiche. I'dane yeele 'dee anna Wori Haaggane Yeesso miinsan, yaafohi Ya'huud ieheynan icheeka. Maanti wahaas iyitaaheen, weeli enenyete wihi an yeelo worsade ma jirin.
[17] Toro la, an ergaanoti ilkerengeetti weene Yeerusaleem kijirto, orteey ergaano titah laka ma iiran. I'daasenyi chirraas on ili Araabo irde, yomboka ilkerengeetti weene Damaasko isoonokhde.
[18] Inkoo gu'h seyyahe kutte, iche ilkerengeetti weene Yeerusaleem ikore, Beetero aban 'doonaa. Ibeen tomon ichoow chan iche leefiddiye.
[19] Ergaanoti addan koo an arge mele, Yaakoobohi Yeessohi Kamure walaaliise kaldaye on menye.
[20] Waakh a idaagaa, yeeda an atin isoochiiro a rum!
[21] Saahka boroofenhi Siiriya ichoow boroofenhi Kiliikiya irde.
[22] Maantaas la urur Kiriistoki boroofenhi Ya'huudiya kijiro, et injire iarge mele.
[23] I'daasenyi wihi kaldaye leessi icho daddaagaan a mehe ya, “Eti goorat sina inno omhicho, Wori Haaggane us goorat baabiin 'doono, iche toolla cheeka.”
[24] Icho la wihi ani ikayitah ka Waakh koolicheen.