[1] Maantaka jeenteti Waakh uurnugleeliis on u hila usu liihilo nah ikorchuu, rubeye ma nah jebto.
[2] Wihi dagsane lakhaanyo keeno a 'dii'dne. Nah la enenyet ma ekkeysanni, Yeedi Waakh ma baabullo. Nah runti Yeedi Waakh on babbakkaahinna. Waakh ortiis ka, eti tuummane rubeytiis haag ichoow suujoon seley saahto, haaggi fiddiheenyo a tusna.
[3] Chirri Wori Haaggane nah cheekno dagsanyahe laka, 'doo'di bar latiro on kadagsanyahe.
[4] Seytaanki waakkhi harratee malassi 'doo'di Kiriisto irummeysan a hide, 'dee banayhi Wori Haaggan ma argaan. Banayha la a Wori Haaggane Kiriistohi weynaan leh.
[5] I'di tahe nah kooloheenyo enenyet ma icheekno, Yeesso Kiriistohi Kamurenye cheekna. Toro la jeente Yeessuu, saggi nah ilbooyyetiin inahe cheekna.
[6] I'di tahe Waakkhi, “Mug'di goyaka banay a soobaheen,” yidah rubeytiissa banayhiis uurasseen goya kiifche, 'dee garanti inno ababnaanki Waakh garanni inno siicha. Ababnaankaas fool Kiriisto kasooababa.
[7] I'daasenyi inno a i'doo inno kamurroonka 'diryo goya kijiro sarteen ka khabno, 'dee miigti miig tuumman kussan inno ma inno katamiite, Waakh katamiit.
[8] Amam tuumman ka a nah lamarche, i'daasenyi ma nah laajjebcho. Uurlammaale khabna i'daasenyi ajjibaat ma khaanno.
[9] Sina nah loomhicha, i'daasenyi Waakh ma nah 'diicho. Kolossoo il nah lakagu'dda, i'daasenyi rubey ma nah lakabahcho.
[10] Kol dakkhan sarteenyo ka omoot Yeesso sinna, 'dee jiro Yeesso laka sarteenyo ka lasoobabbakkaahicha.
[11] I'di tahe nahi jiro khabno kol tuumman jeente Yeessuu, ogoose nah lamarma, 'dee jiro Yeesso sarteenyota tamuut lakaarga.
[12] 'Deerka omoote a nah maranta i'daasenyi atin jiro a khabtaan.
[13] Wihi chiiran, “An Waakh a rummeesde, 'deerka yeede.” Nah laka i'daasu Rubeyti Waakh ka Waakh a kakhuufne 'deerka Wori Haaggan a cheekna.
[14] A mehe wihi nah garanni, Waakkhi Yeessohi Kamureene omoot kasookahche, inno laka Kiriisto a inno leesookahcha 'dee inno tuumman Waakh ortiis inno keena.
[15] Sinayyoheeyka tuumman a iroonotiinna, 'dee haaggi Waakhe buurenye inno imunneynan ballaasta 'doo'di buure eleela. I'da ka Waakh a lakoolicha jeenteti 'doo'di Waakh kala'd ilaabo ibuuraatuu.
[16] Maantaka chirri sarteenyo tamuut laka, nah yombuu yombo ma inokhanni rubeyoheenyo kol dakkhan a lamiigoocha.
[17] I'di tahe sinayyohaar 'dabakhe a wihi geeddoor one, wihi icho keenaan la a ababnaanki weyti khummane jirtuu tuumman imassanne sinayyohaas kussan.
[18] 'Deerka nah wihi laargo menye, wihi liiargine mujjum fiirinna. I'di tahe wihi laargo a wihi geeddoor on jiro, i'daasenyi wihi liiargin a wihi jirtuu tuumman imassan.