[1] Bal cha'an geeddoor saggi 'dalam iyeyyeedo iika'harina. I'daasenyi ma ika'hartaan ba.
[2] A mehe an inaafi Waakh kayamiite atin ikhaba. A mehe i'di inanti laalkumuu an etoo a atin siiche, kaas la a Kiriisto. I'da ka i'di inanti ladisti mi'dab itahuu Kiriisto atin ikeena.
[3] I'daasenyi wihi an karooro a mehe ya, saggi goorat toof kharatiis ka Haawwo iekkeestuu a geeddi maliin labaabulo 'dee raahnaanki el ikhabine atin tuum Kiriisto raahtaan ka jit atin labuucho.
[4] A mehe chi' etoo yamiite Yeessohoo addan cheeko, ommos cha'atin rubeytoo addane Rubeyti Munyeenye atin 'hesseen kayeere 'hessaane, ommos woroo Wori Haaggane atin khaatatteen kayeere khaatattaan, atin i'daanu wahaas khaatattaan.
[5] A mehe maleey ka reera, “ergaanoti weyti khukkhumman,” layadeeh an i'daaru laka ma karucchul.
[6] Kolossoo an eti af kaatah mee. Eheetteey laka an wori Waakh a garda, 'dow ka la, jitat tuumman ichoow walah tuumman ka wahaas a atin tuse.
[7] Chirri an isnuglaache 'dee atin laweynaacho jeenteti an Wori Haaggane Waakh i'daanu icheekuu, an uskeeloo a yeele?
[8] An a i'doo an ururre Kiriistotoo hate cha'an geeddi an atin ihilo icho chilimme ka'hele.
[9] Maanti an atin leejire, chirri an walah waaye, et an hulees korche mele. I'di tahe 'doo'd Kiriistoki boroofenhi Makedooniya kayimiy wihi ikaankhan a isoobuuhiche. An hulees injire ma atin korinne, toro la uliba laka orey on isohda i'da yeela.
[10] Saggi rum Kiriisto goyteey ikajirtuu, et waha an ili Akhaaya ka keeylajo an 'doo'd hulees ikorin toollicho mele.
[11] An a i'doh eylajeeyka orey ikaleesohda? Jeenteti an atin i'doonine waha iyeela? Waakh saggi an atin i'doono a garta.
[12] Wihi toolla an yeelo toro oreye ileesohda 'dee 'doo'di jiti liifuro 'doono 'dee eylajo, hilicho ichoow keenyo ba a ekka essi luhlo goocha.
[13] A mehe 'doo'daas ergaano iskaayyeela. Hili icho haaggichaan ka enenyet a ekkeestaane soonyoy ka ergaano Kiriisto iskaayyeelaan.
[14] Waha la girmo mee, a mehe Seytaan rubeytiis soonyoy ka herti Waakhe ababto iskayeela.
[15] 'Deerka girmo mee chi' ilbooyyetiis laka ilbooyyeti Waakkhi rumanka fissan iskaayyeesso. Inti icho kamassataan a Waakkhi wihi icho yeeleen ka sina tuso.
[16] Toro a inokhda adeehe, uus etoo kalday laka 'dalam ikoogeynan. I'daasenyi cha'atin 'dalam ikoogtahiin, saggi eti 'dalame on ikhaata 'dee i'daaru a eylajo.
[17] Chirri an roorro laan eylajo, wihi Kamur i'doono an adeeh mee, an i'di 'dalame iyeyyeeda.
[18] 'Doo'di buure saggi 'doo'di harratane ieylaja gone, annaka a eylaja.
[19] I'di tahe atin weyti a kharayyo, 'doo'di 'dalammee laka hamaad ka a igarrahsattaan.
[20] I'di tahe chi' etoo bow'da atin kayeesse ommos wihiin tuumman 'dabbaacho ommos ekkeysi ka wihiin atin kakhaato ommos atin 'darraawo ommos fodoorre laka atin jaho a garrahsattaan on.
[21] Aa! Nah rumanka a 'darneete i'daas la ma yeelin! A lakhaanyeesdaay? An uliba saggi 'dalame iyeyyeedaa, walahbaaw etoo roorro laan keeylajo, ani laka wahaas roorro laan a keeylaja.
[22] Icho a 'doo'di Ibiraaniya? Ani laka. Icho saggi 'doo'di Issiraayele Waakh iwahtaan? Ani laka. Icho hiiy Aburaahame kayimaateen? Ani laka.
[23] An saggi sirgo iyeyyeeda. Icho a ilbooyye Kiriisto? An ilbooy ka icho a kuta. 'Dirihichooda hili miige haaggiche, 'dirihichooda jeela ka liihide, 'dirihichooda laajja ka liijahe, 'dirihichooda liigaasan leheet laka.
[24] Kol chane Ya'huud laajja tomon seyyah ichoow saagaal igesseen.
[25] Kol seyyah 'doo'di Rooma wulo ka ijahe, maantoo dagah liikachibe. Kol seyyahe koobanhi buurenye an kijire bar waayeen. Maalinkoo goya ween ibeenkiche khabto bey goya on kijire.
[26] Kolassi ittaawenye sohoti deer kijire, hawohi 'dulo ikhaatin leheete, chifta iigaasan leheete 'doo'di Ya'huud ichoow ki yaafohi Ya'huud ieheynan ba iigaasan leheet. Ilkerengeetti ween ichoow hidaad ka ichoow beyohi burbuure ka liigaasan leheet. 'Doo'd Kiriistoki beenaat laka iigaasan leheet.
[27] An weyti hol dowe, sinayyo laka iyumheene, ibeenneti ittaawe ur'dumme laka waaye, raarahde, subgaade, kolassi ittaawe golol laan fiddiye. A roffoode toro gaaddi iyaakhto laka waaye.
[28] Waha tuumman 'dirihicho la, huleesi an kol dakkhan khabo a mali an ururre Kiriisto tuumman ikhabo.
[29] Maanti etoo 'daranyahe ani laka a 'daranahe. Maanti etoo uskeel lakalug'de an hol ka weyti bolkha.
[30] Chi' anihi eylajo rumanka la'doono, wihi an keeylajo a wihi 'darriteey tuso.
[31] Waakkhi Waakh ichoow Aabba Yeessohi Kamure jirtuu tuumman a lakoolicho. Ulla saggi waha tuummane an eldi been ieheynan a garta.
[32] Maanti an ilkerengeetti weene Damaasko kijire, gaafanahi karnati Areeta layadeeh soobahsate ilkerengeete yaakhiche, 'dee ani ikhabtaa.
[33] I'daasenyi enjeloo goya liikalug'de, daddaabohi ilkerengeettaas kamarsan ka 'dohtoo liileekeene liisooyagche, dahantiis kabahsade.