[1] Wawqe-panantin hina munanakuyllapipuni kashaychis.
[2] Qorpachakuq kayninkupin wakinkunapas, mana yachaspalla angelkunata qorpacharqanku. Chayrayku, qorpachakuq kaytaqa, amapuni qonqaychischu.
[3] Presokunamanta, paykunawan kuskapas kadenawan watasqa kashawaqchis hinata yuyarikuychis. Ñak'arichisqakunamantapas, qankuna kikiykichispas kuerpopi ñak'arishawaqchis hinata yuyarikullaychispuni.
[4] Llapa runaq allinpaq qhawarisqan kasarakuyqa kachun. Kasarasqakunaq puñunankupas, ama qhellichasqallaraq kachun. Qhellipi puriqkunatawan, wasanchaqkunatawanmi ichaqa, Diosña chaninchanqa.
[5] Kikin Señormi nirqan: ‘Manan hayk'aqpas saqerparisaykichu, nitaq hayk'aqpas wikch'urparisaykichu,’ nispan. (Deut. 31:6) Chayrayku imapas ruwasqaykichisqa, ama qolqe sonqo kayllawan kachun. Hinaspa, kunan imachus kapusqasunkichiswan, kusisqallapuni kashaychis.
[6] Chay hinapin, sonqo churaywan kaytaqa niyta atisunman: ‘Señormi yanapaykuqniyqa. Runaña imata ruwawaqtinpas manan manchakusaqchu,’ nispanchis. (Sal. 118:6-7)
[7] Iñiq t'aqa michiqniykichiskunamanta yuyarikuychispuni. Paykunan, Diospa siminta rimaykurqasunkichis. Imakunachus kawsayninkuq chawpinta pasarqan, chayta qhawarispaykichis, iñiyninkutapas qatichikuychis.
[8] Qaynapas, kunanpas, wiñaywiñaypaqpas Jesucristoqa kaqllapunin kashan.
[9] Imaymananiraq, hinallataq mana reqsisqa yachachikuykunawanqa amapuni kayman haqayman apachikuychischu. Allinpaq qokuypi sonqonchis allin takyachisqa kayninmi, mikhunamantapas aswan allinqa. Mikhunamanta kamachikuykunaqa, chayllapi yuyaymanaqkunapaqqa manan anchatachu balen.
[10] Huk altarqa kapuwanchismi. Chay altarmanta Diospaq ruwasqa karpapi serbiqkunaqa manan mikhuyta atinkumanchu.
[11] Umalliq saserdoteqa, animalkunaq yawarnintan hucha pampachaypaq, T'aqasqa cheqasman apaykurqan. Chay animalkunaq kuerpontaqmi ichaqa, kampamentomanta hawapi ruphachisqa karqan.
[12] Chayraykun Jesuspas, kikinpa yawarninpa chawpinta, runakunata ch'uyanchananpaq, hatun llaqtaq punkun hawapi ñak'arirqan.
[13] Chay hinaqa, Jesuspa p'enqay ñak'ariyninta apaspa, kampamentomanta hawaman lloqsisun. Hinaspataq payman hakuchis.
[14] Kaypiqa manan wiñaypaq takyaq llaqtanchisqa kanchu. Aswanpas hamuq kaq llaqtatan maskhashanchis.
[15] Chay hinaqa, Jesuspa chawpinta, Diosman yupaychay sakrifisiota haywasunchispuni. Huk niypiqa, sutinmanta willakuq simikunawan yupaychaykunata haywasunchis.
[16] Allin kaq ruwaytapas, kaqniykichiskunamanta haywariytapas amapuni qonqaychischu. Chay hina sakrifisiokunawanmi Diosqa kusikun.
[17] Iñiq t'aqa michiqniykichiskunata kasukuychis, hinallataq paykunata qatikuychis. Paykunaqa, kuentata qoqkuna hinan, almaykichiskunata kuidashanku. Chay hinapin, kuentata qoqtinku, mana kihakuspa, aswanpas kusisqa kuentata qonqaku. Sichus kihakuspa kuentata qonkuman chayqa, qankunapaqmi mana allinchu kanman.
[18] Allin konsiensiayoq kasqaykupi sonqo churayniyoqmi kayku. Hinallataq tukuypipas allintapuni puriytan munashayku. Chayrayku, ñoqaykupaq Diosman parlapuwayku.
[19] Aswantaraqqa, qankunaman usqhaylla Dios kutichimuwananpaq, Diosman parlapuwanaykichispaqmi balikuykichis.
[20] Thak kay Diostaqmi, wiñaypaq rimanakuy yawarpa chawpinta, Señorninchis Jesucristota wañusqakunapuramanta kawsarichimpurqan. Obehakunaq hatun michiqninqa paymi.
[21] Diospa munayninta ruwanaykichispaq, tukuy allin kaq ruwaypi ruwaqkuna hinapuni kanaykichispaq payllapuni ruwachun. Hinaqa, payllataq, imachus paypa ñawpaqenpi sonqon kusichiqqa kasqantapas, Jesucristoq chawpinta ruwachun. Payllamanpuni, wiñaymanta-wiñaykama yupaychaypas kachun. Ahinapuni kachun.
[22] Wawqe-panallaykuna, pisi simillapin qelqamurqaykichis. Chay hinaqa, kay kallpachaykuyniyta pasiensiaykuwanaykichispaqmi balikuykichis.
[23] Wawqenchis Timoteoq kacharipusqaña kasqanta yachaychis. Sichus usqhaylla hamusunkichis chayqa, ñoqapas paywan kuskan rikuykuqniykichis hamusaq.
[24] Llapallan iñiq t'aqa michiqniykichiskunatawan, llapallan t'aqasqakunatawan napaykuychis. Italia suyumanta kaqkunapas napaykamullasunkichistaqmi.
[25] Allinpaq qokuy llapallaykichiswanpuni kachun. Ahinapuni kachun.