[1] Chay hina kaqtinqa, uyarisqanchis simikunamanqa aswan k'uchillapunin kasukunanchis kashan. Mana hinaqa, karunchakuspan lluskhayapusunman.
[2] Angelkunaq willasqan simikunapas allin takyasqan karqan. Hinallataq, llapan Kamachikuy Simita p'akiqkunapas, mana kasukuqkunapas huchallikusqankuman hinan chanin muchuchiyta chaskirqanku.
[3] Chay hinaqa, ¿sichus ñoqanchispas may hinaniraq hatun qespikuyta pisipaq hap'isunchisman chayri, imaynatataq ayqekusunchisman? Chay hatun qespikuymantan ñawpaqtaqa kikin Señorpuni willarqan. Hinan chayta uyariqkuna ñoqanchismanpas sut'inchawarqanchis.
[4] Chay sut'inchaqkunawan kuskan Diosqa willarqan. Señalkunawan, musphana ruwaykunawan, imaymana atiyniyoq ruwaykunawan, Santo Espírituq ruwana qosqankunawan ima willarqan. Chaykunataqa, Santo Espíritun munayninman hina rakin.
[5] Rimashasqanchis hamuq pachapi kamachikunankupaqqa, manan angelkunamanchu Diosqa qorqan.
[6] Ichaqa huk cheqas Qelqapin willakushan: ‘¿Paymanta yuyarinaykipaq imataq runari? ¿Otaq kuidanaykipaq runaq wawanqa imataqri?
[7] Pisi tiempollapaq angelkunamantapas aswan huch'uyllatan ruwarqanki. K'anchariywan, hinallataq allinpaq qhawariywanmi koronarqanki. Makiykiwan ruwasqaykikunaq patanmanmi churarqanki.
[8] Tukuy imaymanakunatataqmi chakinkunaq pachanman churarqanki,’ nispa. (Sal. 8:4-6) Chay hinaqa, llapallan imaymanakunatapas payman kasukuqta churaspanqa, manan imatapas mana kasuchisqataqa saqerqanchu. Ichaqa manaraqmi kunanqa, tukuy imaymanakunatapas payman kasuchisqatachu rikushanchis.
[9] Chaywanpas, kunanqa Jesustaqa rikushanchismi. Paymi pisi tiempollapaq angelkunamantapas aswan huch'uyllaman tukuchisqa karqan. Ñak'ariypi wañusqanpa chawpintataqmi Diosqa k'anchariywan, hinallataq allinpaq qhawariywan koronarqan. Paymi llapa runarayku, Diospa allinpaq qokuyninwan wañuyman churaykukurqan.
[10] Tukuy imaymanakunatapas Diosqa Jesusraykun, kamarqan. Hinallataq paypa chawpinta lliw askha wawakunata k'anchayman pusaqpas, qespikuyta paqarichiqpas payllapunitaqmi. Jesustan ñak'ariyninpa chawpinta, Diosqa munasqanman hina, k'apakcharqan.
[11] Ch'uyanchaqpas, hinallataq ch'uyanchasqa kaqkunapas llapallankun, ch'ulla Yayallayoq kanku. Chayraykun payqa, wawqe-panaykuna nispa sutiyaytaqa, manapuni p'enqakunchu.
[12] Nillantaqmi: ‘Qanpa sutiykimantan wawqe-panaykunaman willasaq. Huñunakuypa chawpinpin yupaychasayki,’ nispa. (Sal. 22:22)
[13] Wakmantapas nillantaqmi: ‘Ñoqaqa paypi sonqo churayniyoqmi kashasaq,’ nispa. (Isa. 8:17) Yapamantapas nillantaq: ‘Qhawariychis, ñoqapas hinallataq Diospa qowasqan wawakunapas kaypin kashayku,’ nispa. (Isa. 8:18)
[14] Chay hinaqa, imaynan wawakunapas aychayoq yawarniyoq karqanku, chay hinallataqmi Jesuspas karqan. Chay hinapin, wañuyninpa chawpinta Jesusqa, wañuchinanpaq atiyniyoq saqrata mana baleqman tukuchipurqan.
[15] Llapallan wañuyta manchakuqkunaqa, tukuy kawsasqanku p'unchaymi chay manchakuypa kamachin kanku. Jesusmi, chay kamachi kaymanta paykunataqa kacharichirqan.
[16] Cheqapaq, manan payqa angelkunata yanapaykunanpaqchu hamurqan. Aswanpas, Abrahampa mirayninta yanapaykunanpaqmi hamurqan.
[17] Cheqapaqmi Diosqa, Jesusta tukuypi wawqe-panankunaman rikch'akuqta tukuchinanqa nesesariopuni karqan. Chaymi, Diospa ñawpaqenpi yanapaykukuq, hinallataq hunt'aq umalliq saserdote kapurqan. Chay hinapin, llaqtanpa huchankunamanta hunt'asqa pagota pagarqan.
[18] Pay kikinmi wateqasqa kaspa, ñak'arirqan. Chaymi wateqasqa kaqkunata yanapaykunanpaq payqa atiyniyoqpuni.