[1] Chay hinaqa, Cristomanta qallariy kaq yachachikuykunata saqespa, k'apakchasqa kayman chayananchiskama ñawpaqman purisun. Amañataq wakmanta teqsitaqa churasunchu. Chay teqsiqa, kaykunan: Mana baleq ruwaykunamanta yuyayman kutirikuy, hinallataq Diospi iñiykuy iman kanku.
[2] Chaymantapas bautismokunamanta yachachikuy, uma pataman makikunata churaykuy, wañusqakunamanta kawsarimpuy, wiñay taripay p'unchaymanta yachachikuy iman kanku.
[3] Sichus Dios munanqa chayqa, ñawpaqllamanpuni purishasun.
[4] Hinaqa, wakinmi k'anchaykusqaña karqanku. Hanaq pacha qokuytapas mallirqankuñan. Hinallataq Santo Espírituq puriqmasinkunan karqanku.
[5] Diospa sumaq simintapas, hinallataq hamuq tiempoq atiyninkunatapas mallirqankuñan.
[6] Chaymantataqmi, sichus qhepaman kutipunkuman chayqa, Diospa Churinta p'enqayman churaspanku, paykuna kikinkupaq wakmanta chakatankuman. Chayraykun yuyayman kutirikuytaqa, manapuniña atinkuñachu.
[7] Sapa kuti paramuqtinmi, hallp'a pachaqa chay parata chaskin. Hinan chakra llank'aqkunaq allinninpaq mikhuyta ruruchin. Chayraykun hallp'a pachaqa, Diospa saminchayninta chaskin.
[8] Kiskakunatawan, kisakunatawan wiñachiq hallp'a pachan ichaqa, wikch'usqaña kapun. Hinallataqmi ñakasqa kayninpas qayllallapiña kashan. Tukukuyninpitaqmi kanaykusqa kanqa.
[9] Qankunan ichaqa munakusqaykuna, chay hinataña rimayku chaypas, qespichisqakuna hinapuni allillan purishasqaykichista allintapuni reparayku.
[10] T'aqasqankunatapas serbirqankichis, hinallataq kunankamapas serbishankichismi. Chayraykun, Diosqa chaninpuni kaspan, paypa sutinrayku ruwasqaykichistapas, munakuywan ruwasqaykichistapas rikuchisqaykichista manapuni qonqanqachu.
[11] Ichaqa, sapanka hukniykichispas suyakuyniykichista amapuni chinkachispa, p'uchukaykama kasqan k'uchillapuni ruwashanaykichistan munayku.
[12] Chay hinapin, mana qellachu kankichis. Aswanpas iñiywan, hinallataq pasiensiawan, prometisqa chaskiqkunata qatichikuqkuna kankichis.
[13] Maypachachus Abrahamman Dios prometirqan chayqa, pay kikinpa sutinpin hurarqan. Chaytaqa, mana wak aswan hatun suti kasqanraykun hurarqan.
[14] Nirqantaq: ‘Cheqaqmantapunin saminchayniywan saminchasqayki, hinallataqmi mirayniykitapas anchatapuni askhayachisaq,’ nispan. (Gen. 22:17)
[15] Chay hinapitaqmi Abrahamqa, ancha pasiensiawan suyakuspa, Diospa prometisqanta chaskirqan.
[16] Runakunaqa, paykunamanta huk aswan allin kaqpipunin huranku. Paykunaq huramentonkuqa, lliw ima rimasqankupas cheqaqpuni kasqantan sut'inchan. Hinan huchatariykunatapas ch'inyachin.
[17] Diosqa, paypa prometisqan erensiata chaskiqkunamanmi, ima yuyaykusqanpipas manapuni t'ikraqchu kasqanta aswantaraq rikuchiyta munarqan. Chayraykun chay prometisqantaqa, huramentowan takyachirqan.
[18] Chay hinapin, Diosqa chay iskayninpipas manapuni t'ikranmanchu. Manapunitaqmi llullakunmanpaschu. Chay hinapin, ñawpaqenchisman churasqa suyakuyman hap'ipakunanchispaq qayllaykunchis. Chaywantaqmi, ancha sonqochasqa kasunchis.
[19] Chay suyakuymi almanchista, huk ankla hina qaqatapuni, hinallataq allintapuni hap'iqqa kapuwanchis. Hinan chay anklaqa, ch'uya t'aqasqa cheqas kortinaq ukhunkamaraq haykun.
[20] Melkisedekpa t'aqanman hinan, Jesusqa hatun umalliq saserdote kayman, wiñaypaq chayarqan. Chaymi payqa, ñoqanchisrayku kortinaq ukhunkamaraq ñawpaqta haykurqan.