[1] Diosmi askha kutita, hinallataq askha imaymananmanta, paypa rantinpi rimaqkunaq chawpinta machulanchiskunaman ñawpa tiempopi rimaykurqan.
[2] Kunan qhepa p'unchaykunapitaqmi ichaqa, Churinpa chawpinta rimaykuwanchis. Paytan, llapan erensianta chaskiqpaq churarqan. Paypa chawpillantataqmi, teqsimuyuntintapas kamarqan.
[3] Diospa k'anchariyninpa lliphllikiyninqa paymi. Hinallataq imaynachus Diospa kayninta sut'ita rikuchiqpas paypunin. Tukuy imaymanakunatapas, payllataqmi siminpa atiyninwan takyachishan. Hinan pay kikillantaq huchanchiskunatapas ch'uyanchawarqanchis. Chaymantataqmi hanaq pacha cheqaskunapi, Hatun Atiywan Kamachikuqpa paña ladonpi tiyaykurqan.
[4] Churiqa, angelkunamantapas, aswan hatunpaq qhawarisqa kaymanmi chayarqan. Payllataqmi, angelkunamantapas aswan allin kaq sutitaqa chaskirqan.
[5] Diosqa, manan hayk'aqpas mayqen angeltapas nirqanchu: ‘Qanmi Churiy kanki. Kunan p'unchaymi ñoqa churiyarqayki,’ nispaqa. (Sal. 2:7) Nitaqmi mayqen angelmantapas nirqanchu: ‘Ñoqan paypaq Yayan kasaq. Paytaqmi, ñoqaq Churiy kanqa,’ nispanpas. (II Sam. 7:14 I Cron. 17:13)
[6] Phiwi Churinta kay pachaman qomushaspantaq yapamanta Diosqa nirqan: ‘Diospa angelninkuna llapallaykichis payta yupaychaychis,’ nispa. (Deut. 32:43)
[7] Angelkunamanta rimaspantaq ichaqa nirqan: ‘Paymi angelkunatapas wayra hina kanankupaq ruwan. Hinallataq kamachinkunatapas yawrashaq nina hina kanankupaq ruwan,’ nispa. (Sal. 104:4)
[8] Churimantataqmi Diosqa nin: ‘Qanqa Diosmi kanki. Qanpa kamachikuq tiyanaykiqa, wiñay-wiñaypaqpunin kanqa. Kamachikuq baraykiqa, chanin kaypa baranpunin.
[9] Chanin kaqtan munakurqanki. Mana allin kaqtataqmi ichaqa, cheqnikurqanki. Chayraykun Diosqa, qanpa Diosniykipuni. Hinan payqa, puriqmasiykikunamantapas aswantaraq munakurqasunki. Kusikuy aseitewantaqmi hawirqasunkipas,’ nispan. (Sal. 45:6-7)
[10] Nillarqantaqmi: ‘Señor, qanmi qallariypiqa hallp'a pachata kamarqanki. Hanaq pachakunapas makiykikunaq ruwasqankunan kanku.
[11] Chaykunaqa, tukukapullanqan. Qanmi ichaqa, kashallankipuni. Chaykunaqa, llapallankun p'acha hina thantayapullanqakupuni.
[12] Chaykunataqa, ponchota hinan k'uyupunki. Hinan kambiasqa kanqaku. Qanmi ichaqa, iman kaqllapuni kanki. Manataqmi hayk'aqpas wataykikunaqa tukukunqachu,’ nispa. (Sal. 102:25-27)
[13] Diosqa manallataqmi hayk'aqpas mayqen angelkunatapas nirqanchu: ‘Awqaykikunata chakiykiq pachanman churanaykama, paña ladoypi tiyaykuy,’ nispaqa. (Sal. 110:1)
[14] ¿Imaynataq angelkunari kanku? Paykunaqa, llapallankun serbiq espiritukuna kanku. Qespikuy erensiata chaskiqkunatapas serbinankupaqmi Diosqa paykunata kachamun.