[1] Hinaqa, ñawpaq kaq rimanakuyqa, imaynatachus Diosta yupaychanamanta kamachikuyniyoq, hinallataq kay pachapi t'aqasqa cheqasniyoqmi karqan.
[2] Diospaq ruwasqa karpaqa, kay hina wakichisqan kasharqan: Ñawpaq kaq partinmi T'aqasqa Cheqas nispa sutiyasqa karqan. Chay cheqaspitaqmi lamparakuna churanapas, hinallataq Diospa ñawpaqenman t'antata churana mesapas kasharqan.
[3] Chay Diospaq ruwasqa karpaq iskay kaq kortinanpa qhepanpitaqmi, Ch'uya T'aqasqa Cheqas nispa, sutiyasqa huk cheqas karqan.
[4] Chaypin, qorimanta ruwasqa insienso churana, hinallataq tukuy muyuriqninmanta qoriwan llut'asqa rimanakuna arkapas kasharqan. Chay arkapin, qorimanta huk qeropi maná t'antaqa waqaychasqa kasharqan. Hinallataq q'omerman tukuq Aaronpa tawnanpas, rimanakuna p'alta rumikunapas kasharqan.
[5] Chay arkaq patanpitaqmi, Diospa hunt'asqapi yanapaykunan tiyanaqa kasharqan. Chay cheqasta llanthuykuspanmi, k'ancharishaq kirubinkunaqa kasharqanku. Llapan chaykunamantaqa, manan kunanqa sut'i rimayta atisunmanchu.
[6] Chaykuna, chay hina wakichisqa kashaqtinkutaqmi, saserdotekunaqa Diospaq ruwasqa karpaq ñawpaq kaq cheqasman haykunallankupuni karqan. Huñunakuyta ruwanankupaqmi paykunaqa haykunallankupuni karqan.
[7] Diospaq ruwasqa karpaq iskay kaq cheqasninmantaqmi ichaqa, hatun umalliq saserdotella haykunan karqan. Payqa, yawarta apaykukuspanmi watapi huk kutillata haykunan karqan. Hinan chay yawarta, pay kikinpa huchanmanta, hinallataq llaqta runaq mana yachaspa hucha- llikusqankumantawan haywanan karqan.
[8] Chaywantaqmi, chay Ch'uya T'aqasqa Cheqasman ñanqa manaraq reqsichisqachu kasqanta Santo Espirituqa yuyayninchisman churan. Chayqa, Diospaq ruwasqa ñawpaq kaq karpaq kashanankaman karqan.
[9] Chayqa, kunan tiempopaq rikch'anachiyllan karqan. Chay rikch'anachiyman hinaña ofrendakunata, hinallataq sakrifisiokunata, haywakun chaypas, huñunakuyta ruwaq runakunaq konsiensiantaqa, manapunin k'apakyachiyta atirqanchu.
[10] Chay kamachikuykunaqa, mikhunakunallamanta, ukyanakunallamanta, imaymana ch'uyanchakuykunallamanta, hinallataq aycha kaqman hina kamachikuykunallamantan karqan. Chaykunaqa, mosoqyachina tiempokamallan churasqa karqanku.
[11] Hamuq allin kaqkunawan saminchaq hatun umalliq saserdote Criston ichaqa, ña hamunña. Paypa serbisqan Diospaq ruwasqa karpaqa, aswan hatun, hinallataq k'apakmi. Chay karpaqa, manan runakunaq ruwasqanchu karqan. Huk niypiqa, manan kay pachamantachu karqan.
[12] Payqa, manan orqo kabrakunaq, nitaq torillukunaq yawarninpa chawpintachu Ch'uya T'aqasqa Cheqasmanqa haykurqan. Aswanpas pay kikinpa yawarninpa chawpinta, t'aqasqankunata wiñaypaq rantipapunanpaqmi ch'ulla kutillata wiñay-wiñaypaq haykurqan.
[13] Torokunaq yawarninpas, hinallataq orqo kabrakunaq yawarninpas, mana ch'uya kaqkunataqa ch'uyanchanmanmi. Hinallataq malta wakachaq ruphachisqa usphanpiwan, mana ch'uya kaqkunaman ch'aqchuykusqa kaspan, aycha kuerpo mana qhelliyoqña kananpaqqa ch'uyanchanmanmi.
[14] Sichus chay hina kanman chayqa, Cristoq yawarninmi, kawsaq Diosta serbinanchispaq, mana baleq ruwaykunamanta konsiensianchista aswantaraq ch'uyanchawasunchis. Payqa, mana qhelliyoq kaspanmi, wiñaywiñay Espírituq chawpinta pay kikinta Diosman hap'iykachikurqan.
[15] Chaymi Cristoqa, kay mosoq rimanakuypa allipunachiqninpuni. Chay hinapitaqmi waqyasqa kaqkunaqa, wiñaymantapacharaq prometisqa erensiata chaskiq kanku. Hinaqa wañuyninwanmi, ñawpaq rimanakuypi Kamachikuy Simita p'akiqkunatapas rantipapun.
[16] Huk runa testamentota ruwakun chayqa, chay runa wañukapuqtinraqmi chay testamentoqa, balorniyoq kapun.
[17] Testamento ruwakuq runa kawsashaqtinraqqa, chay ruwakusqan testamentoqa mana balorniyoqraqmi. Maypachachus testamento ruwakuq runa wañukapun chayñan ichaqa, chay testamentoqa balorniyoq kapun.
[18] Chaymi, ñawpaq kaq rimanakuypas yawarwanpuni qallarichisqa karqan.
[19] Moisesqa, Kamachikuy Simiman hinan, llapallan kamachikuykunata llapan Israel llaqta runakunaman rimaykurqan. Hinan torillukunaq, hinallataq orqo kabrakunaq yawarninta unuwan chhaqrurqan. Yawar-puka millmawan k'uyusqa isopowantaq, kikin qelqa k'uyuta, hinallataq llaqtantin runakunata ch'aqchurqan.
[20] Ch'aqchushaspantaq nirqan: ‘Diospa kamachisqasunkichis, rimanakuy yawarqa kaymi,’ nispan. (Exo. 24:8)
[21] Hinallataq Diospaq ruwasqa karpatapas, chaypi kashaq llapan serbisiokunatapas chay yawarwan ch'aqchullarqantaq.
[22] Kamachikuy Simiman hinaqa, yaqapas llapallanmi yawarwanpuni ch'uyanchakun. Manachus yawar hich'akunman chayqa, hucha pampachayqa, manapunin kanmanchu.
[23] Chay hinaqa, hanaq pachapi kaqkunaq rikch'aynin kay hina sakrifisiokunawan ch'uyanchasqa kananqa nesesariopunin karqan. Kikin hanaq pachamanta kaqkunataqmi ichaqa, kay hina sakrifisiokunamantapas, aswan allin sakrifisiokunawanraq ch'uyanchasqa kanan karqan.
[24] Cristoqa, manan cheqaq kaq karpaq rikch'aynin, runaq ruwasqan kaq Ch'uya T'aqasqa Cheqasmanchu haykurqan. Aswanpas kunan ñoqanchispa allinninchispaq, Diospa ñawpaqenpi sayapakuwananchispaqmi, kikin hanaq pachamanpuni haykurqan.
[25] Hatun umalliq saserdoteqa, hukpa yawarninta apaykukuspanmi sapa wata Ch'uya T'aqasqa Cheqasman haykurqan. Criston ichaqa, mana askha kutitachu pay kikinta sakrifisiopi haywakunanpaq hanaq pachaman haykurqan.
[26] Mana hina kaqtinqa, kay pachaq qallariyninmantapacha askha kutita ñak'arinanraqmi nesesariopuniqa kanman karqan. Kunantaq ichaqa, tiempo hunt'akuqtin, ch'ulla kutillata wiñaypaq pay kikin rikhurimurqan. Chay hinapitaqmi, pay kikinta haywakuspa huchata chinkachipurqan.
[27] Chay hinaqa, runakunapaqmi ch'ulla kutillata wañunankupaq kamachisqaña kashan. Chaymantataqmi ichaqa, taripayllaña kanqa.
[28] Chay hinallataqmi, Cristopas, askha runakunaq huchankuta qechunanpaq ch'ulla kutillata sakrifisiopi haywasqa karqan. Iskay kaq kutinpitaqmi, mana huchata pichananpaqñachu rikhurimunqa. Aswanpas suyakuqninkunata qespichinanpaq rikhurimunqa.