[1] Iñiyqa, imachus suyakushasqanchispa teqsinmi. Hinallataq mana rikusqanchis kaqkunata rikuchiqmi.
[2] Iñiypa chawpintan, ñawpa machulanchiskunaqa, allin kawsayniyoqmanta reqsisqa karqanku.
[3] Teqsimuyuntinpas Diospa rimariyllanwan kamasqa kasqantaqa, iñiypa chawpintan yachanchis. Chay hinapin, rikusqanchis kaqkunaqa, mana ima rikusqa kaqmanta kamasqa karqan.
[4] Iñiyninpa chawpintan Abelqa, Kainmanta aswan allin sakrifisiota Diosman haywarqan. Chaymi, chay iñiyninpa chawpinta, ofrendakuna haywasqan allin kasqanmanta Diosqa willakurqan. Hinan payta Diosqa chaninpaq yuparqan. Chay iñiyninpa chawpintataqmi, Abelqa wañukapunña chaypas, kunankamaraq rimashallanpuni.
[5] Iñiyninpa chawpintan Enokpas, wañuyta manaña rikunanpaq kawsashaqlla apapusqa karqan. Diostaqmi payta apakapurqan. Chaymi manaña tarirqankuñachu. Manaraq apasqachu kashaspantaqmi kawsayninqa Diosta kusichirqan. Chaytan Diosqa willakurqan.
[6] Diosman qayllaykuq runaqa, Diospa kashasqantapunin iñinan. Maskhaqninkunaman Diosqa premiota qopuqpuni kasqantapas iñinallanpunitaqmi. Chayraykun mana iñiyniyoq kaspaqa, manapuni Diosta kusichiyta atisunmanchu.
[7] Iñiyninpa chawpintan Noepas, hatun manchakuyniyoq kasqanrayku, familianta qespichinanpaq huk arkata ruwarqan. Imaymana manaraq rikusqa kaqkunamanta Diospa willasqan kaspanmi, chay arkataqa ruwarqan. Hinallataq, iñiyninpa chawpintan Noeqa kay pachata huchacharqan. Iñiyman hinataqmi, chanin kaq erensiata chaskiq kaymanpas ayparqan.
[8] Iñiyninpa chawpintan Abrahampas, huk cheqasta erensiata chaskiq rinanpaq waqyasqa kaspan, kasukurqan. Hinan mana maymanchus rishasqanta yachaspalla puririrqan.
[9] Iñiyninpa chawpintan, Diospa prometisqan hallp'apipas wak suyumanta runa hina tiyakurqan. Hinan kasqan prometisqan erensiata chaskiqmasinkuna Isaakpiwan, Jakobpiwan karpakunapi tiyakurqanku.
[10] Abrahamqa, teqsiyoq kaq hatun llaqtatan suyakusharqan. Chay hatun llaqtaq wakichiqninpas, hatarichiqninpas kikin Diospunin.
[11] Iñiyninpa chawpintan kikin Sarapas, mana wachakuq, hinallataq yuyaqña kashaspa, huk wawata wiksallikunanpaq, kallpata chaskirqan. Hinan, pichus prometiqnin hunt'aqpuni kasqanta yachasqanrayku, huk wawata wachakurqan.
[12] Chaymi, yaqa wañusqa hinaña kashaqtin, huk runallamanta askhallaña mirayninqa, hanaq pachapi ch'askakuna hinaraq karqan. Hinallataq mirayninqa, qocha kantupi mana yupay atina aqo t'io hinaraq kallarqantaq.
[13] Chay machulanchiskunaqa, llapallankun iñiyninkuman hina, chay promesakunaq hunt'akunanta mana chaskispalla, wañukapurqanku. Aswanmi karullamanta chay promesakunata qhawarispanku, kreespanku, hinallataq napaykuspanku, q'ochukurqanku. Hinan kay hallp'a pachapi wak suyu llaqtayoq, hinallataq mana wasiyoq kasqankuta willakapurqanku.
[14] Chay hinata rimaqkunaqa, huk llaqtayoq kayta maskhashasqankutan sut'itapuni reparachikunku.
[15] Maymantachus lloqsimusqanku llaqtapi yuyaykushallankuman karqan chayqa, kutipunankupaq tiempoqa kashanmanraqmi karqan.
[16] Paykunataqmi ichaqa, huk allin llaqtata, huk niypiqa hanaq pacha llaqtata, ña munasharqankuña. Chaymi Diosqa paykunapaq, huk hatun llaqtata ruwapusqanrayku, paykunaq Diosninmi nispa sutiyakusqanmantaqa manapuni p'enqakunchu.
[17] Iñiyninpa chawpintan Abrahampas, probasqa kaspa, Isaakta sakrifisiopi haywarqan. Hinan Diospa prometisqanta chaskispan, sapallan churinta sakrifisiopi haywarqan.
[18] Paymantan Diosqa nisqa karqan: ‘Isaakpin mirayniyki nispa sutiyasqaqa kanqa,’ nispan. (Gen. 21:12)
[19] Isaakta wañusqanmantapas kawsarichimpunanpaq Diosqa atiyniyoq kasqantan Abrahamqa yuyaykurqan. Chaymi, rikch'anachiypi rimaspaqa, wañusqanmanta kawsarimpuqta hina chaskiykakapurqan.
[20] Iñiyninpa chawpintan Isaakpas, Jakobtawan, Esautawan hamuq qhepa tiempopi imaymanakunamanta samincharqan.
[21] Iñiyninpa chawpintan Jakobpas, wañukapunan patapiña kashaspa, Josepa churinkunata sapankankuta samincharqan. Hinallataq tawnanwan tawnapaykukuspan, Diosta yupaycharqan.
[22] Iñiyninpa chawpintan Josepas, wañukapunan patapiña kashaspa, Israel llaqtaq wawankunaq Egipto suyumanta lloqsimusqanta yuyarirqan. Hinallataq tullunkuna imaynachus kananmantapas kamachikurqan.
[23] Iñiyninpa chawpintan Moisespa tayta-mamanpas, Moisés naseqtin, munay wawa kasqanrayku, kinsa killata pakarqanku. Reypa kamachikusqantapas manataqmi manchakurqankuchu.
[24] Iñiyninpa chawpintan Moisespas, hatunña kaspa, Faraonpa ususinpa wawan nispa sutiyasqa kayta manapuni munarqanchu.
[25] Aswanmi huchallikuypi pisi tiempolla q'ochukunanmantaqa, Diospa llaqtanwan kuska mana allinkuna muchukuyta akllakurqan.
[26] Moisesqa, premiontan qhawashallarqanpuni. Chayrakun payqa Egipto suyupi qhapaq kay huñunanmantaqa, Cristorayku muchukuy aswan allin qhapaq kayqa kasqanta qhawarirqan.
[27] Iñiyninpa chawpintan Moisespas, reypa k'arak phiñakuyninta mana manchakuspa, Egipto suyuta wikch'umpurqan. Mana rikusqan Diospi rikushanmanpas hinataraq yuyaykusqanraykutaqmi chay yuyaykusqanpiqa manapuni kuyurirqanchu.
[28] Iñiyninpa chawpintan payqa, phiwi wawakunata wañuchiq ama phiwi wawakunata tupaykunanpaq, Paskua fiestata ruwaspa, yawarta ch'aqchuchirqan.
[29] Iñiyninkuq chawpintan Israel llaqta runakunapas, puka mama-qochata ch'aki hallp'anta hina chimparqanku. Egipto suyu runakuna chay hinallatataq chimpayta munaqtinkutaqmi ichaqa, qochaq millp'usqan kapurqanku.
[30] Iñiyninkuq chawpintan Israel llaqta runakunaqa, Jerikó llaqtaq perqankunata qanchis p'unchaynintin muyuykurqanku. Hinan chay perqakunaqa thuniykakapurqanku.
[31] Iñiyninpa chawpintan qhellipi puriq Rahab warmipas, llaqta qhawaraq riqkunata thak kaypi chaskiykurqan. Hinan manapuni mana iñiqkunawan kuskaqa wañurqanchu.
[32] ¿Imakunatawanraqtaq niyman? Gedeonmanta, Barakmanta, Sansonmanta, Jeftemanta, Davidmanta, Samuelmanta hinallataq Diospa rantinpi rimaqkunamantawan willanaypaqqa tiemporaqmi mana aypawanchu.
[33] Iñiyllawantaqmi paykunaqa qhapaq suyukunatapas atiparqanku. Chanin kaqtapas ruwarqanku. Promesakunamanpas ayparqanku. Hinallataq leonkunaq siminkunatapas wisq'arqanku.
[34] Ninaq sinchi yawrariynintapas thasnurqanku. Espadaq ñawch'inmantapas ayqekurqanku. Pisi-kallpayoq kayninkupipas kallpasapa karqanku. Awqa tinkuypipas atiyniyoq karqanku. Hinallataq wak suyuq ejersitunkunatapas ch'usaqmanraq tukuchirqanku.
[35] Warmikunapas wañukapuqninkuta kawsarimpuypa chawpinta chaskikapurqanku. Wakinkunataqmi ichaqa, aswan allin kawsarimpuyta tarinankupaq, kacharichisqa kayta mana munaspanku, sinchi muchuchisqa karqanku.
[36] Wakinkunañataqmi ichaqa, p'enqay asipayaykunata, hinallataq hasut'iy pruebakunata chaskirqanku. Chaymantapas kadenawan watasqa, hinallataq karselpi wisq'asqa karqanku.
[37] Rumikunawan ch'aqesqa, serruchuwan wit'usqa, pruebaman churasqa, hinallataq ñawch'iyoq espadawan wañuchisqa, karqanku. Wakcha kaypi, sinchi llakikuypi, hinallataq sinchi ñak'ariypi karqanku. Obehaq, hinallataq kabraq qaranwan p'istuykukuspankun, huk cheqasmanta wak cheqasman purirqanku.
[38] Kay pachaqa, manan paykunaq tiyanankupaq hinachu karqan. Chaymi ch'in cheqaskunapi, orqokunapi, mach'aykunapi, hinallataq kay hallp'a pacha t'oqokunapi purikuq karqanku.
[39] Paykunaqa, llapankupas iñiyninkuq chawpintan, allin kawsayniyoqmanta reqsisqa kayman ayparqanku. Chaywanpas, promesaq hunt'akuyninmanqa manapunin ayparqankuchu.
[40] Ñoqanchispaqmi Diosqa aswan allin kaqta wakichipuwasqanchis karqan. Chaymi paykunaqa, ñoqallanchiswanpuni k'apakchasqa kaymanqa aypanqaku.