[1] Chay hinaqa, Diospa samakuyniman haykunanchispaq promesa kashaqtinraq, manchakuywanpuni kashasunchis. Chaytaq mayqenniykichispas qhepakuwaqchis.
[2] Imaynan paykunamanpas allin willakuyqa willasqa karqan, chay hinallataqmi ñoqanchismanpas willasqallataq karqan. Wakinkunan ichaqa, iñiywanpuni uyariqkunawan mana kuskachu iñiypi reqsichikurqanku. Chayraykun uyarisqanku simiqa, mana imapaqpas balerqanchu.
[3] Ñoqanchis iñiqkunan ichaqa, Diospa nisqanman hina, chay samakuymanqa haykusunchispuni. Paymi nirqan: ‘Imaynan k'arak phiñakuyniypi hurarqani: “¡Samakuyniymanqa manapunin hayk'aqpas haykunqakuchu!” nispay,’ nispan. (Sal. 95:11) Chaywanpas, Diospa ruwasqankunaqa, kay pacha manaraq kamasqa kashaqtinmi tukusqaña karqan.
[4] Qanchis kaq p'unchaymantapas huk cheqas qelqapiqa kay hinatan nishan: ‘Qanchis kaq p'unchaypitaqmi Diosqa, llapan ruwasqankunamanta samarqan,’ nispa. (Gen. 2:2)
[5] Huktawanmi kasqallantataq nin: ‘¡Samakuyniymanqa, manapunin hayk'aqpas haykunqakuchu!’ nispa. (Sal. 95:11)
[6] Hinaqa, allin willakuyta ñawpaq willasqa kaqkunaqa mana kasukusqankuraykun, mana haykurqankuchu. Chaywanpas, samakuyman haykuqkunaqa kashanraqmi.
[7] Wakmantataqmi Diosqa, Davidpa chawpinta huk p'unchayta señalasqa karqan. Hinan nirqan: ‘Kunan p'unchay,’ nispa. Hinan unay tiempomantaña, Davidpa nisqanman hinapuni señalasqa karqan. Davidqa nirqantaqmi: ‘Sichus kunan p'unchay Diospa kunkanta uyarinkichis chayqa, ama sonqoykichista rumiyachiychischu,’ nispan. (Sal. 95:7-8)
[8] Josuetaqchus paykunaman samakuyta qonmanña karqan chayqa, qhepamanña huk p'unchayta nisqamantaqa, manañan rimakushanmanñachu karqan.
[9] Chay hinaqa, Diospa llaqtanpaqqa, huk sumaq samakuy kashanraqmi.
[10] Imaynan Diospas ruwasqankunamanta samaykurqan, chay hinatan pipas samakuyman haykuqqa, kikinpa ruwayninkunamanta samakapunña.
[11] Chay samakuyman haykunanchispaqyá anchatapuni kallpachakusunchis. Mana hinaqa, mana kasukuqkunaq ejemplonkumanmi urmaykusunman.
[12] Diospa siminqa kawsashaq, hinallataq atiyniyoqpunin. Llapan iskay ladon afilasqa espadamantapas aswan afilasqaraqmi. Almatapas, espiritutapas, moqochukunatapas, chilinakunatapas partinankamaraqmi haykun. Hinallataq sonqoq munasqankunatapas, yuyaykusqankunatapas sut'inchanpunitaqmi kanpas.
[13] Manataqmi Diospa ima kamasqanpas mana rikusqan pakasqaqa kanchu. Aswanqa, pimanchus kuentata qonanchis kashan, paypa ñawinpaqqa llapallanmi q'alarasqa, hinallataq sut'ipuni kashan.
[14] Chay hinaqa, hanaq pachaq hawankamaraq haykuq huk hatun umalliq saserdoten kapuwanchis. Payqa Diospa Churin Jesusmi. Hinaqa willakusqanchis iñiyninchispi qaqata sayasun.
[15] Payqa ñoqanchis hinan tukuypi wateqasqa karqan. Ichaqa manapunin huchallikurqanchu. Chayraykun pisi-kallpa kayninchiskunapi khuyapayakuy atiq hatun umalliq saserdoteqa kapuwanchis.
[16] Hinaqa, sonqo churaywanyá allinpaq qokuy kamachikuq tiyananman qayllaykusunchis. Chay hinapin yanapaykuynintapas chaskisunchis. Hinallataq yanapaykuna tiempopi allinpaq qokuytapas tarisunchis.