[1] Llapan imakunatachus nisqaykunamanta aswan allinninqa kaymi: Hanaq pachakunapi, Hatun Atiywan Kamachikuq tiyanaq paña ladonpi tiyaykuq, huk hatun umalliq saserdoteqa kapuwanchismi.
[2] Payqa, t'aqasqa cheqaspi serbiqmi. Chay cheqasqa, manan runaq hatarichisqanchu. Aswanpas kikin Señorpa ruwasqan cheqaq karpan.
[3] Llapallan hatun umalliq saserdote- kunatan ofrendakunatapas, sakrifisiokunatapas haywananpaq Diosqa churarqan. Chaymi, hanaq pachapi kaq saserdoteqa, imallatapas haywananqa nesesariopuni karqan.
[4] Kamachikuy Simiman hina, hallp'a pachapi ofrendakunata haywaq saserdotekunaqa, ñan kashanña. Chayrayku payqa, hinaña hallp'a pachapi kashanman chaypas, manan saserdotepunichu kashanman karqan.
[5] Chay saserdotekunaq serbisqanku t'aqasqa cheqasqa, hanaq pachapi kaqkunaq rikch'aynin, hinallataq llanthullanmi karqan. Moisés, Diospaq ruwasqa karpata manaraq ruwayta tukushaqtinmi, Diosqa payta allintapuni anyaykurqan: ‘Qhawariy, imaynatachus orqo patapi rimaykuspa qhawarichirqayki, chayman hinapunin llapantapas ruwanki,’ nispan. (Ex. 25:40)
[6] Kunantaq ichaqa, Jesusqa aswan allin saserdoteq llank'ananmanña aypan. Hinallataq, payqa aswan allin rimanakuypi allipunachiqmi. Chay rimanakuyqa, aswan allin promesakunawan ruwasqan karqan.
[7] Sichus chay ñawpaq kaq rimanakuy tukuypi hunt'asqa kanman karqan chayqa, iskay kaq rimanakuyta maskhayqa, manan nesesarioñachu kanman karqan.
[8] Llaqtanta phiñarikuspantaqmi, Diosqa nirqan: ‘Señorqa ninmi, “Qhawariy, p'unchaykunan chayamushan. Chay p'unchaykunapin, Israel wasiwanpas, hinallataq Judá wasiwanpas mosoq rimanakuy ruwayta tukusaq.
[9] Maypachachus taytankuta makinkumanta hap'iykuspay, Egipto suyumanta horqomurqani, chay p'unchaypin, paykunawan rimanakuyta ruwarqani. Kunantaqmi ichaqa, manaña chay hina rimanakuytachu ruwasaq. Paykunaqa, rimanakusqaykutan mana hunt'arqankuchu. Chaymi paykunata qonqapurqani,” nispa.
[10] Señorqa nillantaqmi: ‘Haqay p'unchaykunamantaña Israel wasiwan ruwanaypaq rimanakuyqa kaymi: “Kamachikuy simiykunatan paykunaq yuyayninkuman churasaq. Hinallataq, sonqonkupipas qelqasaq. Hinan ñoqa paykunaq Diosninku kasaq. Paykunataqmi ñoqaq llaqtay kanqaku.
[11] Sullk'amanta kurakkamaraqmi, llapalla reqsiwanqaku. Chayraykun mana pipas runamasinmanpas, nitaq wawqe-pananmanpas yachachinqachu: ‘Señorta reqsikuy,’ nispaqa.
[12] Mana chanin ruwasqankutapas, pampachaykusaqmi. Manataqmi hayk'aqpas huchallikusqankunamantapas, kamachikuy simita mana kasukuspa ruwayninkunamantapas, yuyarisaqñachu,” nispan’ nispa. (Jer. 31:31-34)
[13] Maypachachus chay rimanakuymanta: ‘mosoq rimanakuymi’ nispa nirqan chayqa, ñawpaq kaq rimanakuytan mawk'ayachipurqan. Chay mawk'ayachisqa, hinallataq yanqayachisqa kaq rimanakuytaqmi, chinkapunan patapiña kashan.