[1] Chay Melkisedekmi Salem llaqtaq reynin, hinallataq Ancha Hatunchasqa Diospa saserdoten karqan. Paymi Abrahamman, wak reykunata atipasqanmanta kutimpushaqtin, aypaq lloqsirqan. Hinan Abrahamta samincharqan.
[2] Paymanmi Abrahampas llapan kaqninmanta diezmonta qorqan. Huk niypiqa, Melkisedekpa sutinqa: ‘Chanin kaypa reynin’ ninanta nin. Wak niypitaqmi, payqa Salempa reynin karqan. Chaytaqmi, ‘Thak kaypa reynin’ ninanta nin.
[3] Melkisedekqa, mana taytamamayoq, hinallataq mana machulakunayoqmi karqan. Manan kawsayninpa qallariyninpas, nitaq kawsayninpa p'uchukayninpas karqanchu. Chay hinapin, wiñaypaq saserdote kasqanpi, Diospa Churinmanqa rikch'akun.
[4] Melkisedekmanmi, ñawpa taytanchis Abrahampas maqanakuypi qechumusqanmanta diezmota qorqan. Chayrayku, Melkisedekqa may allinpuni kasqanta qhawariychis.
[5] Levipa wakin mirayninkunapas saserdote kay llank'anataqa, chaskirqankun. Kamachikuy Simiman hinaqa, paykunapas llaqta wawqe-panankunamanta diezmota chaskinankupunin karqan. Hinaña Abrahampa mirayninkuna karqanku chaypas, diezmotaqa chaskinankupunin karqan.
[6] Melkisedekmi ichaqa, mana Levipa mirayninpi yupasqachu karqan. Chaywanpas paymi Abrahammanta diezmota chaskirqan. Hinan promesata chaskiq Abrahamta samincharqan.
[7] Allinpaq qhawarisqa kaqmi, pisipaq qhawarisqa kaqta saminchan. Chaymantaqa, manan churanakuyta atisunmanñachu.
[8] Kaypiqa, wañuq runakunallan diezmota chaskinku. Haqaypin ichaqa, pimantachus kawsasqanta willakunku, pay kikinpuni diezmotaqa chaskin.
[9] Nisunchismanmi, diezmota chaskiq Levipas, Abrahampa chawpintan diezmotaqa churarqan.
[10] Hinan Melkisedekqa, Abrahamman aypaq lloqsimurqan. Chay tiempopin, Leviqa machulan Abrahampa kuerpollanpiraq kasharqan.
[11] Maypachachus Israel llaqta Kamachikuy Simita chaskirqan chayqa, Levipa t'aqan saserdosioq chawpintan chaskirqan. Sichus saserdotekunaq llank'anan k'apak kanman karqan chayqa, manan Melkisedekpa t'aqan wak saserdosio hatarichiyqa nesesarioñachu kanman karqan, riki. Melkisedekqa, manan Aaronpa t'aqanman hinachu karqan.
[12] Chay hinaqa, maypachachus Dios saserdosiota kambiarqan chayqa, Kamachikuy Simitapas kambianallantaqmi karqan.
[13] Pimantachus kaykunata rimashanchis chay Jesusqa, wak ayllumantan karqan. Paypa ayllunmantaqa manapunin pipas altarpiqa serbirqanchu.
[14] Judá ayllumanta Señorninchispa nasesqanqa sut'i reparanapunin kashan. Moisesqa, manataqmi imanispallapas chay ayllu saserdosio kananmantaqa rimarqanchu.
[15] Sitaqchus Melkisedek hina, wak saserdote hatarimunqa chayqa, chayraqtaqmi aswan sut'ipuniqa kanqa.
[16] Chay saserdoteqa, manan aycha miraypi Kamachikuy Simiq kamachikuyninman hina churasqachu karqan. Aswanpas mana tukukuq atiyniyoq kawsayman hina churasqan karqan.
[17] Paymantataqmi kay hina willakuyqa nin: ‘Melkisedekpa t'aqanman hina, qanqa wiñay-wiñaypaq saserdotepunin kanki,’ nispa. (Sal. 110:4)
[18] Huk niypiqa, ñawpaq kaq kamachikuyqa mana atiyniyoq, hinallataq mana baleq kasqanraykun, yanqayachisqa kapun.
[19] Kamachikuy Simiqa, manan imatapas k'apakcharqanchu. Huk niypiqa, huk aswan allin suyakuytan apamusqa karqan. Chay suyakuypa chawpintataqmi Diosmanqa qayllaykukunchis.
[20] Chay saserdoteqa, huramentowan churasqan karqan.
[21] Cheqaqtapunitaqmi wakin saserdotekunaqa, mana huramentowan churasqalla karqanku. Chay saserdoteñataqmi ichaqa, huramentowan churasqa karqan. Paymanmi Diosqa kayta nisqa karqan: ‘Señorqa hurasqanmanta mana ñakapakunanpaqmi hurarqan: “Melkisedekpa t'aqanman hina, qanqa wiñay-wiñaypaq saserdotepunin kanki,” nispan,’ nispa. (Sal. 110:4)
[22] Chay hinallataqmi, Jesusqa huk aswan allin rimanakuypa garantían kapun.
[23] Cheqaqtapunin wakin saserdotekunaqa, wañupuqlla kaspanku chinkaripullarqanku. Chayraykun, askha saserdotekunaqa, churasqa karqanku.
[24] Jesusmi ichaqa, wiñaywiñaypaqpuni takyashan. Chayraykun saserdote kayninqa, manapuni hayk'aqpas t'ikranmanchu.
[25] Chaymi, pikunachus paypa chawpinta Diosman qayllaykuqkunatapas, hunt'asqapi qespichiyta atin. Hinallataq, paykunapaq Diosman parlapayapunanpaq payqa kawsashanpuni kanpas.
[26] Chay hatun umalliq saserdoteqa, t'aqasqapuni, mana ima huchayoqpuni, ch'uyapuni, huchasapakunamanta t'aqasqapuni, hinallataq hanaq pachaq hawankamaraq altoman hoqarisqapunin karqan. Chayraykun chay hatun umalliq saserdoteqa, allinpuni kapuwarqanchis.
[27] Pay kikinmi, ch'ulla kutillata pay kikinta wiñay-wiñaypaq haywakurqan. Chayrayku payqa, mana wakin hatun umalliq saserdotekuna hinachu karqan. Paykunaqa, sapa p'unchaymi, ñawpaqtaqa paykuna kikinkuq huchankumantaraq sakrifisiokunata haywananku karqan. Chaymantataq llaqtaq huchanmanta sakrifisiokunata haywananku kallarqantaq. Payqa, manan chay hina ruwayta nesesitanchu.
[28] Kamachikuy Simiqa, pisi-kallpayoq runakunallatan hatun umalliq saserdotekuna kanankupaq churan. Diosmi ichaqa, Churinta, wiñay-wiñaypaq k'apak hatun umalliq saserdote kananpaq churarqan. Kamachikuy Simimanta qhepamanña kaq huramento simiq chawpintan chaytaqa ruwarqan.