[1] Chay hinaqa, ñoqanchispan, muyuriqninchispi hatun phuyo hinaraq, willawaqninchiskuna kashan. Chayrayku, tukuy llasawaqninchiskunamantawan, fasilchallata t'eqeykuqninchis huchamantawan t'aqakusunchis. Hinallataq phawananchis phawayta ama qhepaman kutispa phawashallasunchispuni.
[2] Jesusta qhawaspallapuni kashasun. Iñiyta paqarichiqpas, hunt'asqata wiñachiqpas paymi. Qhepa tiempoman kusikuyninta ñawpaqenpi qhawariqpas payllapunitaqmi. Chaymi p'enqay ruwasqa kaytapas mana kasurparispa kruspi ñak'arirqan. Diospa kamachikuq tiyananpa paña ladonpitaqmi tiyaykurqan.
[3] Huchasapakuna pay kikinpa kontranpi hatariqtin, hinallata muchukuqqa Jesusmi. Chayrayku, ama pisipanaykichispaq, nitaq almaykichis sayk'unanpaq allintapuni payta qhawariychis.
[4] Huchaq kontranpi maqanakuspaykichisqa, yawar hich'anaykichiskama manaraqmi qaqatachu sayashankichis.
[5] ¿Wawakunata hina kallpachaykusqanta usqhayllamanchu qonqarqonkichis? Kallpachaspanqa nirqasunkichismi: ‘Wawallay, Señorpa wanachiynintaqa ama pisipaq hap'iychu. Amallataq phiñarisqa kaspaykipas, pisipaychu.
[6] Señorqa, pitachus munakusqantan wanachin. Hinallataq pikunatachus wawanta hina chaskiykusqankunatan hasut'iykunpas,’ nispan. (Pro. 3:11-12)
[7] ¿Mayqen wawataq taytanpa mana wanachisqanri kanman? Chayrayku, sichus wanachiyninta chaskiykukullankichis chayqa, Diosmi wawanta hina rikusunkichis.
[8] Ichaqa sichus llapalla wanachisqa kasqan wanachiywan mana wanachisqachu kankichis chayqa, manan wawankunachu kankichis. Aswanpas q'aqa wawa- kunallan kankichis.
[9] Chaymantapas, wanachiqninchis aycha kaypi tayta-mamanchiskunaqa, kapuwarqanchismi. Hinan paykunataqa, manchakurqanchis. Chay hinaqa, ¿manachu espiritukunaq Yayantaqa, aswan-aswantaraq kasukuspa kawsakusunman?
[10] Taytamamanchiskunaqa yuyaykusqankuman hinallan, pisi p'unchaykunallapaq wanachiwarqanchis. Señormi ichaqa, allinninchispaq wanachiwanchis. Chay hinapin, ch'uya kayninmanta chaskiq kanchis.
[11] Chaywanpas, manan ima wanachiypas kasqan ratuqa kusikunapaq hinaqa kanmanchu, aswanpas llakikunapaqmi. Chaymantañan ichaqa, chay wanachiywanpuni uywasqa kaqkunapaqqa thak kayta, hinallataq chanin kayta, rurun.
[12] Chayrayku sayk'usqa makikunatapas, hinallataq such'uyasqa moqokunatapas kallpachaychis.
[13] Hinallataq ñankunatapas, chakiykichispaqqa siwk hinata ruwapuychis. Chay hinapin, wist'upas ñanmantaqa mana waqllinqachu, aswanpas qhaliyachisqa kapunqa.
[14] Llapawanpas thak kayllapipuni kawsayta munaychis. Hinallataq ch'uya kaytapas munallaychistaq. Mana ch'uya kaywanqa manan pipas Señorta rikunqachu.
[15] Diospa allinpaq qokuyninmanta amapuni mayqellanpas qhepakunaykichispaq allinta qhawakuychis. Amapuni ima phiñakuy saphipas, qankunamanta paqarimuspa, hark'asunkichischu. Chaykunawanmi, askha runakunapas qhellichasqa kankuman.
[16] Ama mayqellanpas qhelli puriypi puriq, otaq Esaú hina, ch'uya kaqta pisinchaq kachunchu. Payqa, ch'ulla p'uku mikhunallamanmi phiwi kayninta bendepurqan.
[17] Wakmantaña saminchata chaskiyta munarqan chaypas, wikch'usqapuniñan kapurqan. Weqenkunawanña maskharqan chaypas, yuyayman kutirikunanpaq tiempotaqa, manapuniñan tarirqanñachu. Chaytaqa ñan yachankichisña.
[18] Qankunaqa, manan llamiykuy atina orqomanchu asuykurqankichis. Chay orqopiqa, ninan yawrasharqan. Nitaq tutayaqmanpaschu, sinchi laqha-tutayaqmanpaschu, sinchi tutuka wayramanpaschu asuykurqankichis.
[19] Nillataq korneta waqaymanpaschu, kunkayoqta rimaykunamanpaschu asuykurqankichis. Chayta uyariqkunataqmi, chay rimamuq amaña aswanta rimamunanpaq balikurqanku.
[20] Kamachikuytaqa, manan muchukuyta atirqankuchu. Chay kamachikuyqa nirqanmi: ‘Sichus huk uywallapas chay orqota tupaykunman chayqa, rumiwan ch'aqesqan kanqa, otaq flechawan wañuchisqan kanqa,’ nispan. (Exo. 19:12-13)
[21] Chay rikhurimuy rikusqankuqa, sinchi manchakuymi karqan. Chaymi Moisesqa nirqan: ‘Sinchi mancharisqa, hinallataq khatatataspan kashani,’ nispan. (Deut. 9:19)
[22] Qankunan ichaqa, Sión orqoman, kawsaq Diospa hatun llaqtanman, hanaq pachamanta kaq Jerusalén llaqtaman, hinallataq wara-waranqa angelkunaq hatun huñunakuyninman asuykurqankichis.
[23] Hinallataq hanaq pachapi qelqasqa kaq phiwi kaqkunaq huñunakuyninman, llapa runakunaq Chaninchaqnin Diosman, k'apakchasqa chanin runakunaq espiritunkuman ima asuykurqankichis.
[24] Chay hinallataq, mosoq rimanakuypi Allipunachiq Jesusman, hinallataq Abelpa yawarninmantaqa aswan allintaraq rimariq ch'aqchusqa yawarmanmi asuykurqankichis.
[25] Rimamuqpa rimamusqanta ama wikch'uyukunaykichispaq allintapuni kuidakuychis. Cheqapaqmi, hallp'a pachapi anyaykuqpa anyaykusqanta wikch'uyukuqkunaqa manapuni ayqekurqankuchu. Hinaqa, sichus ñoqanchis hanaq pachamantapacha anyaykuqmanta t'aqakusunchis chayqa, aswantaraqmi manapuni ayqekusunmanchu.
[26] Chay tiempopin, chay kunkaqa kay pachantintaraq chhaphchirirqan. Kunanpaqtaqmi ichaqa, prometirqan: ‘Huk kutitawanraqmi, hallp'a pachata chhaphchirisaq. Manataqmi hallp'a pachallatachu, aswanpas hanaq pachatawanraqmi chhaphchirisaq,’ nispa. (Hageo. 2:6)
[27] Chay ‘Huk kutitawanraqmi’ niq simiqa, huktawanraq llapallan kamasqa kaqkuna chhaphchirisqa kanqa ninantan sut'itapuni nin. Chay hinapin mana hayk'aq kuyuriq kapunqaku.
[28] Chay hinaqa, ñoqanchismi mana chhaphchirina qhapaq suyuta chaskishanchis. Chayrayku, Diosman grasiasta qospa serbisunchis. Paypa sonqonta kusichispa, manchakuywan, hinallataq Dios sonqo kaywan serbisunchis.
[29] Diosninchisqa, yawrarispa rupharapuq nina hinaraqmi. (Deut. 4:24)