[1] Kamachikuy Simiqa, hamuq allin kaqkunaq llanthullanmi karqan. Manataqmi kikin allin kaqkunaraqchu karqan. Chaymi watan-watan kasqan sakrifisiokunallawan Diosman qayllaykuqkunataqa, manapuni hayk'aqpas k'apakman tukuchiyta atinchu.
[2] Chay hina sakrifisiota haywakuqkunachus hukpaqkama ch'uyanchasqa kankuman karqan chayqa, manañan konsiensiankupi huchayoqñachu kankuman karqan. Chaymi, sakrifisiota haywayqa manaña nesesarioñachu kanman karqan.
[3] Chaywanpas ichaqa, chay sakrifisiokunapin sapa watalla huchamantaqa yuyarinku.
[4] Torokunaq, hinallataq orqo kabrakunaq yawarninqa, manan huchakunata qechuyta atinmanchu.
[5] Chayraykun Cristoqa, kay pachaman hamuspan nirqan: ‘Sakrifisiotapas, ofrendatapas manan munarqankichu, huk kuerpotan ichaqa, wakichipuwarqanki.
[6] Animalkuna ruphachisqapas, huchata pichanapaq sakrifisiokunapas, manan sonqoykipaq hinachu karqan.
[7] Hinaqtinmi nirqani: “Qhawariy, imaynan qelqa k'uyupi ñoqamanta qelqasqa kashan, chayman hina Diosnillay, munayniykita ruwanaypaqmi kaypi kashani,” nispay,’ nispan. (Sal. 40:6-8)
[8] Ñawpaqtaqa nirqanñan: ‘Sakrifisiotapas, ofrendatapas, animalkuna ruphachisqatapas, hinallataq huchata pichanapaq sakrifisiokunatapas manan munarqankichu. Nitaqmi sonqoykipaq hinapaschu karqan,’ nispa. Chay sakrifisiokunaqa, Kamachikuy Simiman hinan haywana karqan.
[9] Chaymantataqmi nirqan: ‘¡Qhawariy, Diosnillay, munayniykita ruwanaypaq kaypin kashani!’ nispa. Iskay kaqta churananpaqmi, Diosqa ñawpaq kaqta chinkachipun.
[10] Diospa chay munayninpitaqmi, Jesucristoq kuerpon hukpaqkamallaña wiñaypaq ofrendata qosqanpa chawpinta ch'uyanchasqa kashanchis.
[11] Llapan saserdotekunapas, sapa p'uchaymi serbispa, huchata mana hayk'aq qechuyta atiq kasqan sakrifisiokunallatapuni askha kutita haywanku.
[12] Criston ichaqa, huchakunata pampachananpaq ch'ulla sakrifisiollata wiñaywiñaypaq haywarqan. Hinan Diospa paña ladonpi tiyaykurqan.
[13] Chaymanta ñawpaqmantaqmi, awqankuna chakinpa pachanman churasqa kanankama suyakushan.
[14] Ch'ulla ofrendallawanmi Diospa ch'uyanchasqankunataqa wiñay-wiñaypaq k'apakcharqan.
[15] Santo Espiritupunitaqmi chaymantaqa willawanchis.
[16] Hinan ñawpaqtaqa nin: ‘Señorqa ninmi: “Chay p'unchaykuna qhepata paykunawan rimanakuyta ruwanayqa kaymi. Kamachikuy simiykunatan sonqonkuman churasaq. Yuyayninkumantaqmi qelqasaq,” nispan,’ nispa. (Jer. 31:33)
[17] Yapaykullantaqmi: ‘Manataqmi hayk'aqpas huchallikusqankunamantapas, Kamachikuy simita p'akisqankunamantapas yuyarisaqñachu,’ nispa. (Jer. 31:34)
[18] Ichaqa, maypichus chay hucha pampachay kan chayqa, chaypiqa, manan huchamanta ofrendapas kanñachu.
[19] Chay hinaqa wawqe-panaykuna, Jesuspa yawarninpa chawpinta Ch'uya T'aqasqa Cheqasman haykunanchispaq sonqo churayninchisqa kapuwanchismi.
[20] Kortinaq chawpintataqmi, mosoq, hinallataq kawsashaq ñanta kichapuwarqanchis. Huk niypiqa, aycha kuerponpa chawpintan chaytaqa ruwarqan.
[21] Diospa wasinpi kamachikuq, huk hatun saserdoteqa kapuwanchismi.
[22] Hinaqa, cheqaq sonqowan, mana hayk'aq chinkaq iñiywan, sonqonchispas mana allin konsiensiamanta ch'uyanchasqa kaywan, hinallataq aycha kuerponchispas ch'uya unuwan mayllisqa kaywan, Diosman qayllaykusunchis.
[23] Prometiwaqninchisqa hunt'aqpunin. Chayrayku, suyakuymanta willakusqanchispi, ama iskayaspa, qaqatapuni sayashasunchis.
[24] Munakuq kayman, hinallataq allin kaq ruwaykuna kayman, hukkuna-hukkunawan kallpachanakunanchispaq allinpaq qhawarinakusunchis.
[25] Imaynan wakinkuna huñukuyninkuta saqerparillankupuni, chay hinataqa, amapuni huñukuyninchista saqerparisunchischu. Aswanpas haqay p'unchay qayllaykamushasqanta yachaspa, aswantaraq kallpachaykunakusunchis.
[26] Sichus cheqaq kaqta reqsiy chaskikusqanchismanta, qhepaman ñoqanchismantapuni huchallikusunchis chayqa, huchapaq wak sakrifisioqa, manan kanñachu.
[27] Aswanpas manchay-manchay hatun taripayllañan paykunataqa suyashan. Chaypitaqmi Diospa awqankunaqa, nina yawraypi sinchi ruphachisqapuni kanqaku.
[28] Pipas Moisespa Kamachikuy Siminta wikch'uyukuqqa, iskay, otaq kinsa testigokunaq willakusqankuraykun mana khuyapayakuywan wañuchisqapuni karqan.
[29] Chay hinaqa, ¿Diospa Churinta sarunchakuqmantari imaninkichistaq? Payqa, ch'uyanchaq rimanakuy yawartan qhellipaq hap'in. Hinallataq allinpaq qokuy Santo Espiritutapas k'araktan k'amin. Payqa, ¿manachu aswan may hina sinchi ñak'ariytaraq chaskinanpaq hinapuni?
[30] Kay hina niq Señortaqa, reqsinchismi. Paymi nirqan: ‘Bengakuyqa ñoqaqmi. Ñoqañan pagontaqa qopusaq,’ nispa. (Deut. 32:35) Huktawanmi nillantaq: ‘Señorpunin llaqtantaqa chaninchanqa,’ nispa. (Deut. 32:36; Sal. 135:14)
[31] ¡Kawsaq Diospa makinman urmaykuyqa, may hina sinchi manchakuymi!
[32] Pasaq p'unchaykunapi, ña k'anchaykusqa kaspaykichisña, llakikuypi hatun maqanakuyta muchukusqaykichismanta yuyarillaychispuni.
[33] Mayninpiqa, runaq qayllanpi k'amisqa, hinallataq ñak'arichisqan karqankichis. Mayninpitaqmi, chay hina ñak'arichisqa kaqkunawan kuska ñak'ariysikuqmasinku karqankichis.
[34] Hinallataq preso kashaqtiypas, khuyalliykukuwarqankichismi. Kaqniykichiskunata qechuqtinkutaq, hanaq pachapi, aswan allin kaq mana tukukuq erensiayoq kasqaykichista yachasqaykichisrayku, kusikuywan ñak'arirqankichis.
[35] Sonqo churayniykichisqa, hatun premioyoqmi. Chayrayku, chay sonqo churayniykichistaqa amapuni saqepuychischu.
[36] Diospa munayninta ruwaspa, prometisqanman aypanaykichispaqqa, pasiensiallayoqpunin kanaykichis.
[37] Qelqaqa nintaqmi: ‘Huk pisillamanta, huk pisi tiempollamantawanmi, pichus hamunan karqan payqa hamunqa. Manataqmi unaytachu qhepamunqa.
[38] Chanin runan ichaqa, iñiyllawan kawsanqa. Qhepamanchus kutipunqa chaytaqmi ichaqa, almayta mana payqa kusichinqachu,’ nispa. (Hab. 2:3-4)
[39] Ñoqanchisqa manan wañuy ñak'ariyman rinanpaq qhepaman kutipuqkunamantachu kanchis. Aswanpas iñiyniyoq kaspa, almanku waqaychaqkunamantan kanchis.