[1] Ñoqa Santiagon, Diospa, hinallataq Señor Jesucristoq kamachin kani. Hinan chunka iskayniyoq ch'eqerisqa ayllukunaman, napaykamuykichis.
[2] Wawqe-panallaykuna, imaymana pruebakunapi tarikuspaykichisqa anchatapuni kusikuychis.
[3] Iñiyniykichispa prueban pasiensiakuyta rurusqantaqa yachankichismi.
[4] Ichaqa pasiensiayoq kayniykichispa ruwaynintaq qankunapi tukusqa kachun. Chay hinapin hunt'asqa, hinallataq k'apak kankichis. Manataqmi imapas pisisunkichischu.
[5] Sichus qankunamanta mayqenniykichispas pisi yachayniyoqraq kashan chayqa, Diosmanta mañakuchun. Paymi, mana phiñarikuspan, llapaman ancha askhata qonqa.
[6] Pipas iskayaspa mañakuqmi ichaqa, mama-qochaq phoqchiyninman rikch'akun. Chay phoqchiytaqa, chayniqman, haqayniqmanmi wayra apaykachan. Chayrayku, iñiywanpuni, ama imamantapas iskayaspa mañakuchun.
[7] Chay hina iskayaq runaqa, ama imallatapas Señormanta chaskiyta yuyaykuchunchu.
[8] Iskayta yuyaykuq runaqa, tukuy ruwayninkunapipas manapunin takyanchu.
[9] Huch'uyaykukuq wawqeqa, altoman hoqarisqa kasqanmanta hatunchakuchun.
[10] Qhapaq runataq ichaqa, huch'uyaykuchisqa kasqanmanta hatunchakuchun. Payqa qoraq t'ikan hinan tukukapunqa.
[11] Inti lloqsimuqtinmi, ruphayninwan qorapas naq'epun, t'ikanpas urmapun, munay rikch'ayninpas chinkapun. Chay hinallataqmi qhapaq runapas, qhapaq kayta maskhaspa puriyninpi, t'ika hina chinkapunqa.
[12] Pruebakunata muchuq runaqa, kusisamiyoqmi kanqa. Maypachachus aprobasqa kanqa chayqa, kawsay koronatan chaskinqa. Chay koronatan Señorqa munakuqninkunaman prometirqan.
[13] Pipas wateqasqa kaspaqa ama nichunchu: ‘Diosmi wateqawan,’ nispaqa. Diostaqa, manan pipas mana allin ruwananpaq wateqayta atinmanchu. Manataqmi Diosqa pitapas wateqanchu.
[14] Aswanpas sapanka runan, kikinpa mana allin munapayasqankunawan aysachikuspa, hinallataq hañachikuspan wateqasqa kapun.
[15] Hinaqtinmi, mana allin munapayasqankunaqa, wiksallikuspan huchata wachakun. Huchañataq wiñaspa, wañuyta wachakun.
[16] Munakusqay wawqe-panallaykuna, amapuni pantaychischu.
[17] Tukuy allin qokuypas, hinallataq tukuy chanin kaq qokuypas hanaqmantan uraykamun. K'anchaykunaq Yayanmantan uraykamun. Paypiqa, manan t'ikraypas, nitaq llanthuq kuyuyninpas kanchu.
[18] Paymi munayninmanta cheqaq siminwan nasechiwarqanchis. Kamasqankunamanta, ñawpaq kaq rurunkuna kananchispaqmi, chaytaqa ruwarqan.
[19] Chay hinaqa, munakusqay wawqe-panallaykuna, llapa runa usqhaylla uyariq kachun. Ichaqa ama usqhaylla rimariqchu, nitaq usqhaylla phiñakuqpaschu kachun.
[20] Runa k'arakta phiñakuspaqa, manan Diospa munasqan chanin kaqtachu ruwan.
[21] Chay hina kaqtinqa, tukuy qhelli kaq ruwaykunata, hinallataq llimp'arishaq mana allin kaqkunatapas wikch'upuychis. Llamp'u sonqo kaywantaq Diospa saphichasqan simita chaskiychis. Chay simin almaykichista qespichiyta atin.
[22] Ama uyariqllaqa kaychischu. Uyariqlla kaspaykichisqa, kikiykichistan q'otukushankichis. Aswanpas simiq nisqanta ruwaqpuni kaychis.
[23] Pillapas simita uyariqlla, hinallataq uyarisqantapas mana ruwaqqa kanmanmi. Sichus chay hina kanman chayqa, huk runa imaynachus uyan kasqanta espejopi qhawakuqmanmi rikch'akun.
[24] Payqa, kikinta espejopi qhawakuspanmi, ripun. Chaymantataq, imaynachus uyan kasqanta qonqarapun.
[25] Ichaqa, pillapas kacharichiq k'apak kamachikuy simipi makilla qhawakuq, hinallataq chaypi takyaqpas kanmanmi. Payqa uyarispa mana qonqarapuqmi. Aswanpas imatachus simiq nisqanta ruwaqmi. Payqa ruwasqankunapipas kusisamiyoqmi kanqa.
[26] Pillapas qankunapurapi Diosta yupaychaqman tukuspa, qallunta mana watakuy atiqqa kanmanmi. Sichus chay hina kanman chayqa, chay runaqa kikintan q'otukun. Diosta yupaychayninpas yanqapaqmi.
[27] Dios Yayaq ñawpaqenpi ch'uya kaywan, hinallataq mana qhellichakuspa Diosta yupaychayqa kaykunan: Mana tayta-mamayoq wakcha wawakunaman, hinallataq biudakunamanpas ñak'ariyninkupi watukuymi. Hinallataq kay pachaq mana allin kaqninkunawanpas mana qhellichakuspa waqaychakuypiwanmi.