[1] Llapallan hatun umalliq saserdotekunaqa, runakuna ukhumanta akllasqan kanku. Paykunaqa, Diospa ñawpaqenpin runakunata serbinku. Chaymi runakunaq huchallikusqankumanta ofrendakunatapas, sakrifisiokunatapas haywaspa serbiqkuna kanku.
[2] Pay kikinpunitaqmi, pisi-kallpayoq kaywan muyuykusqa kashan. Chaymi payqa, mana yachaqkunamantapas, chinkasqakunamantapas khuyapayaykuyta atin.
[3] Chay pisikallpayoq kasqanhawataqmi payqa, kikinpa huchankunamantapas, hinallataq llaqtaq huchankunamantapas sakrifisiotaqa haywananpuni.
[4] Manataqmi pipas chay allinpaq qhawarisqa kaytaqa, pay kikinchu churakunman. Aswanpas, Aaron hina, Diospa waqyasqanmi kanan.
[5] Chay hinallataqmi, Cristopas hatun umalliq saserdote kananpaqqa, mana pay kikillantaqchu hatunchakurqan. Aswanpas Diosmi payta hatuncharqan. Hinan payta nirqan: ‘Ñoqaq Churiymi qanqa kanki, Kunan p'unchaymi ñoqa churiyarqayki,’ nispa. (Sal. 2:7)
[6] Chay hinaqa, huk cheqas Qelqapipas nillantaqmi: ‘Melkisedekpa t'aqanman hina, qanqa wiñay-wiñaypaq saserdotepunin kanki, nispa. (Sal. 110:4)
[7] Cristoqa, aycha kawsaynin p'unchaykunapin ancha kunkayoq waqyakuywan, hinallataq weqenwan, mañakurqanpas, balikurqanpas. Chay balikuykunataqa, wañuymanta horqoy atiq Diosmanmi ruwarqan. Hinan, Dios sonqo kasqanrayku, Diosqa payta uyarirqan.
[8] Churiña karqan chaypas, ñak'ariykunata pasasqanwanmi kasukuytaqa yacharqan.
[9] K'apakchasqaña kaspantaqmi, llapallan payta kasukuqkunaq wiñaypaq qespikuy qoqnin payqa kapurqan.
[10] Hinallataqmi Melkisedekpa t'aqanman hina, Diosqa hatun umalliq saserdote kananpaq payta sut'incharqan.
[11] Qankunaqa mana uyariy munaqmi kapunkichis. Chayrayku, hinaña sasa sut'inchay kashan chaypas, kaykunamantaqa askhatapuni rimaykunayku kashan.
[12] Unay tiempoñan pasarqon, qankunaqa yachachiqkunañan kanaykichis karqan. Ichaqa, Diospa siminmanta qallariy yachachikuy kaqkunata wakmanta yachachinatan nesesitashankichis. Hinaqa, manan khamuna mikhunataraqchu, aswanpas lechellataraq nesesitaqkunan kapunkichis.
[13] Hayk'an lechellataraq ukyaqkunaqa, ñuñuq wawachallaraqmi kanku. Chayraykun manaraq chanin kaq yachachikuykunata entiendinankupaq hinaraqchu kashanku.
[14] Khamuna mikhunan ichaqa, wiñay tukusqa kaqkunapaqpuni. Paykunaqa, yachasqan kuman hinapunitaqmi, allin kaqtapas, mana allin kaqtapas, reparayta yachankuña.