[1] Chay hinaqa, ch'uyanchasqa wawqe-panaykuna, qankunaqa hanaq pacha waqyakuywan waqyasqa kaq masiykunan kankichis. Apóstol, hinallataq hatun umalliq saserdote Jesucristota allinta qhawariychis. Ñoqaykuqa, paymantan willakuyku.
[2] Imaynan Moisespas Diospa wasinpiqa tukuypi hunt'aqpuni karqan, chay hinallataqmi Jesucristopas churaqninman hunt'aqpuni karqan.
[3] Huk wasi ruwaqpas, ruwasqan wasimantaqa, aswan hatunchasqapunin. Chay hinallataqmi Jesucristopas, Moisesmanta aswan hatunchasqaraq karqan.
[4] Llapan wasiqpas perqaqninqa kanmi. Tukuy imaymanaq ruwaqnintaqmi ichaqa, Diospuni.
[5] Moisespas cheqapaq Diospa wasinpiqa kamachi kayninpi hunt'aqpunin karqan. Payqa, imakunachus qhepaman willasqa kananpaqmi hunt'aqpuni karqan.
[6] Cristotaqmi ichaqa, wasinpi Churi kayninpi hunt'aqpuni. Sichus sonqo churayninchis, hinallataq suyakuypi kusikuyninchis p'uchukaykama allin takyasqa kashan chayqa, chay wasiqa, ñoqanchismi kanchis.
[7] Chay hinaqa, imaynan Santo Espirituqa nin: ‘Kunan p'unchay Diospa kunkanta uyariychis.
[8] Amataq, imaynan chay runakunaqa ch'inniqpi wateqay p'unchaypi phiñachiwarqanku, chay hinataqa sonqoykichista rumiyachiychischu.
[9] Machulaykichiskunan haqay p'unchaypi wateqawaspanku pruebawarqanku. Hinan tawa chunka watantin imakunachus ruwasqaykunata rikurqanku.
[10] Chayraykun, chay runa-miraypa kontranpi phiñakuspay nirqani: “Paykunaqa, sonqonkupi waqllisqallapunin purishanku. Manataqmi ñanniykunatapas reqsirqankuchu”, nispay.
[11] Chaymi k'arak phiñakuyniypi hurarqani: “Samakuyniymanqa, manapunin hayk'aqpas haykunqakuchu,” nispay,’ nispan. (Sal. 95:7-11)
[12] Wawqe-panaykuna, amapuni mayqennillaykichispipas millay sonqoyoq kaypas, mana iñiy sonqoyoq kaypas kachunchu. Chay hina sonqoyoq kayqa, kawsaq Diosmantan t'aqasunkichisman. Chayrayku makillapuni qhawakuychis.
[13] Aswanpas ‘kunan p'unchay’ nisqa manaraq tukurukushaqtin, hukkuna-hukkunawan sapa p'unchay kallpanchanakuychis. Chay hinapin, mana mayqenniykichispapas huchaq q'otusqan kaspa sonqoykichisqa rumiyanqachu.
[14] Sichus sonqo churayninchista qallariymantapacha cheqaqtapuni p'uchukaykama takyachisunchis chayqa, Cristowan kuska tupaqninchista chaskiqñan kapunchis.
[15] Qelqaqa ninmi: ‘Kunan p'unchay Diospa kunkanta uyariychis. Amataq sonqoykichista rumiyachiychischu. Chay hinatan chay runakunaqa haqay p'unchaypi phiñachiwarqanku,’ nispa. (Sal. 95:7-8)
[16] ¿Pikunataq Diospa kunkanta uyarishaspa, Diosta phiñachiqkunari karqanku? ¿Manachu Egipto suyumanta Moiseswan llapallan lloqsimuqkuna karqanku?
[17] ¿Pikunawantaq tawa chunka watantin payqa phiñakurqan? Chay huchallikuqkunawanpunin phiñakurqan. Paykunan ch'inniqpi wañupurqanku.
[18] ¿Pikunamantaq samakuyninman mana haykunankupaqri hurarqan? Payta mana kasukuqkunapaqmi hurarqan.
[19] Mana kreesqankuraykutaqmi paykunaqa, mana haykuyta atirqankuchu. Chaytaqa, yachanchistaqmi.