[1] Cristo Jesuspa preson, ñoqa Pablon, wawqenchis Timoteopiwan, llank'aypi yanapaqniyku, hinallataq munakusqayku Filemón, qanman qelqamuykiku.
[2] Pananchis Apiamanwan, kuska puriq soldadomasiyku Arquipomanwan, wasiykipi kashaq iñiq t'aqamanwanmi qelqamuykiku.
[3] Dios Yayanchispa, hinallataq Señorninchis Jesucristoq allinpaq qokuyninpas, thak kayninpas qankunawanpuni kachun.
[4] Diosman parlayniypi sapa kuti qanmanta yuyarispaymi, Diosniyman grasiasta qoshallanipuni.
[5] Señor Jesuspaq, hinallataq llapan t'aqasqakunapaq munakuyniyki, iñiyniykipiwan kasqantan uyarini.
[6] Chay hinaqa, Cristo Jesuspi iñisqayki allin reqsichikusqapuni kananpaq, hinallataq qankuna llapan allin kaqta reqsinaykichispaqwanmi Diosmanqa parlashallanipuni.
[7] Wawqellay, t'aqasqakunaq sonqonmi qanpa chawpiykita kallpachasqa karqanku. Chayraykun munakuyniykimantaqa, Diosman grasiasta qoshayku, hinallataq sonqochasqa kashayku.
[8] Chayrayku, hinaña Cristopi ancha sonqo churayniy allin kaq ruwayta kamachinaypaq, kapushawaqtinpas manan kamachiykichu.
[9] Ichaqa ñoqa Pablon, kurak runaña kaspay, hinallataq kunanpas Jesucristoq preson kaspay, qanta munakusqayrayku balikuyki.
[10] Waway Onesimomantan balikuyki. Paytaqa, preso kashaspaymi iñiypi churiyarqani.
[11] Payqa, haqay tiempopi mana baleqmi karqasunki. Kunantaqmi ichaqa, qanpaqpas, ñoqapaqpas baleqña kapuwanchis.
[12] Paytan wakmanta kachampushayki. Paytayá ñoqa kikiyta hinapuni sonqomanta chaskiykuy.
[13] Allin willakuyrayku, preso kasqaypi qanpa rantiykita serbiwananpaqmi, ñoqawan qhepakunanta munasharqani.
[14] Mana qanpa simiykimantaqa, manan imatapas ruwayta munarqanichu. Ichaqa, allin kaq ruwayniyki mana qatirisqallachu kananta, aswanpas sonqoykimanta kanantapunin munarqani.
[15] Chayraykupaschá kunanmanta pasaqpaq chaskiykapunaykipaq huk pisi tiempota qanmanta t'aqarikurqan.
[16] Amayá huk kamachita hinañachu, aswanpas kamachimantaqa aswan munasqa wawqeta hinañayá chaskiykunkiqa. Ñoqapaqqa munasqa wawqen, qanpaqchá ichaqa aycha kaqpipas, Señorpipas aswan munasqaraq kanqa.
[17] Chay hinaqa, sichus puriqmasiykita hina qhawariwanki chayqa, ñoqa kikiyta hinapuni paytaqa chaskiykuy.
[18] Hinallataq sichus imapipas phiñachirqasunki, otaq manuykiña chaypas, ñoqaq kuentayman churaykuy.
[19] Ñoqa Pablon makiywanpuni qelqamuyki. Chay manu kasqantaqa, ñoqaña pagapusayki. Ichaqa, qan kikiykipas manuymi kashanki. Chaytaqa manataqmi niytapas munanichu.
[20] Arí wawqey, Señorpi kay balikusqayta uyariykuwanaykitan munani. Chaywanyá Cristopi sonqoyta llanllarichiway.
[21] Qelqamusqaypi nisqaymanta aswantaraq ruwanaykitaqa, yachanin. Chaymi kasukuwanaykipi sonqo churayniyoq kaspay, qelqamuyki.
[22] Chay hinallataqmi, Diosman parlayniykichisrayku qankuna watukuqta Dios kachamuwananta suyakushani. Chayrayku qorpachawanaykipaq wakichikushay.
[23] Cristo Jesusrayku presomasiy Epafrasmi napaykamusunki.
[24] Llank'aypi yanapaqniykuna Markospas, Aristarkopas, Demaspas, hinallataq Lukaspas napaykamullasunkikutaqmi.
[25] Señorninchis Jesucristoq allinpaq qokuynin espirituykichiswan kachun. Ahinapuni kachun.