[1] Kunantaq, ñoqa Pablo Cristoq llamp'u kayninwan, hinallataq qoykukuq kayninwan balikuykichis. Cheqapaq qankunawan kashaspayqa huch'uyaykukuqmi kani. ¡Karupi kashaspaytaqmi ichaqa, qankunapaq mana manchakuqllaña kani!
[2] Hayk'aqchus qankunawan kasaq chayqa, wakinniykichiskunawan tupanaypaq allin wakichisqan kashani. Wakinniykichisqa aychaman hina purinaykupaqmi yuyanku. Ama mana manchakuq kayniyta qatiriwanaykichispaqmi qankunata balikuykichis.
[3] Runakuna hinalla purishayku chaypas, manan runakuna hinallachu maqanakuyku.
[4] Maqanakunayku armakunaqa, manan kay pachapi runakunaq armankuna hinallachu kanku. Aswanpas Diospi ancha atiyniyoq armankunan kanku. Chay armakunan, awqanchiskunata hark'aq perqakunataraq thunin.
[5] Hinallataq mana cheqaq yuyaykunataqa chinkachipushaykun. Diosta reqsiypa kontranpi hatunchakuqkunatapas chinkachipushaykun. Chay hinapin, llapa yuyaykunatapas, Cristota kasukunankupaq presochaspa apashayku.
[6] Kasukuyniykichischus hunt'asqapuni kanqa chayqa, llapan mana kasukuqkunata kastiganaykupaqmi wakichisqaña kashayku.
[7] Qankunaqa imakunatapas patallantan qhawankichis. Sichus pipas sonqonpi Cristoqpuni kasqanta yuyaykukun chayqa, pay kikinpi wakmanta yuyaykukuchun. Imaynan paypas Cristoqpuni, chay hinallataqmi ñoqaykupas Cristoqpuni kayku.
[8] Sichus kamachikuyniyoq kasqaykumanta huk chikallantawanpas hatunchakuni chayqa, manan p'enqakunichu. Chay kamachikuyniyoq kasqaykutaqa, manan qankunata chinkachinaykupaqchu, aswanpas qankunata wiñachinaykupaqmi Señorqa qowarqanku.
[9] Qankunaqa, qelqamusqay kartakunawan mancharichinayta yuyaykushawaqchismi. Chaytaqa manan munanichu.
[10] Wakinmi nin: ‘Kartankunapi qelqamuwasqanchis simin- kunaqa sinchi k'arak, hinallataq ancha sut'ipunin. Ichaqa paypa aycha kuerponqa pisi-kallpallayoqmi. Hinallataq rimasqankunapas mana kasunapaq hinallan kanku,’ nispa.
[11] Chay hina runaqa kayta yuyarichunpuni: Imaynan karupi kashaspa kartapi rimamuyku, chay hinallataqmi chaypi kashaspapas ruwayniykupiqa kasaqku.
[12] Wakinkunaqa, kikinkuta rekomiendakuspankun kashanku. Paykunaqa tupunkuwanmi tupukunku, hinallataq paykuna kikinkuwanmi kuskachakunku. Manataqmi allintachu yuyashanku. Ñoqaykun ichaqa, paykunawanqa manapuni yupakuykuchu, nitaq kuskachakuykupaschu.
[13] Ñoqaykun ichaqa, mana sinchinkamachu hatunchakuyku. Aswanpas Diosmi tupunanta qowarqanku. Chay tupunaman hinallan hatunchakuyku. Chay tupuymi, qankunamanpas chayamusunkichis.
[14] Hinan hatunchakuyniykupiqa manapas qankunaman chayamuykumanchu hina, mana sinchinkamachu hatunchakuyku. Aswanpas Cristoq allin willakuyninwanqa qankunakamaraqmi chayamurqayku.
[15] Manan hukkunaq llank'asqankumantachu sinchinkamaqa hatunchakushayku. Aswanpas kay hina suyakuyniykun kapuwanku: Iñiyniykichispi wiñasqaykichiswanmi, tupuyniykuman hina, qankunapurapi llank'anaykuta Diosqa yapanqa.
[16] Qankunamanta aswan wak cheqaskunapi allin willakuyta willanaykutaqa Dios munanqapunichá. Chay hinapin, hukkunaq llank'asqankumanta mana hatunchakushanaykupaq, hukkunaq llank'asqanku cheqasmanqa manapuni haykusaqkuchu.
[17] Ichaqa Qelqapas ninmi: ‘Pipas hatunchakuqqa, Señorpi hatunchakuchun,’ nispa. (Jer. 9:24)
[18] Chay hinaqa, pay kikillanta rekomiendakuqtaqa Señormi mana allinpaqchu qhawarin. Aswanmi Señorqa pay kikinpa rekomiendasqallanta allinpaq qhawarin.