[1] Kunantaq wawqe-panaykuna, Masedonia probinsiapi kashaq iñiq t'aqakunaman Diospa allinpaq qokuynin qosqa kasqanta willamuykiku.
[2] Paykunaqa ñak'ariykunata, hinallataq sinchi pruebakunatan pasarqanku. Ancha kusikuyniyoq, hinalla- taq sinchi wakchakunan karqanku. Chaywanpas ichaqa, qoykukuyninkupin qhapaqllaña karqanku.
[3] Paykunaqa, kikinkuq atisqankuman hinan qorqanku. Chay atisqankumantapas aswantaraqmi qorqanku. Chay kikinkuq munasqankuman hina qosqankumantan willakuni.
[4] Hinallataq t'aqasqakunapaq serbiyninkupi qoykukuy ofrendankuta chaskiykunaykupaqmi paykuna kikinku anchatapuni balikuwarqanku.
[5] Manataqmi suyakusqaykuman hinallachu, aswanpas paykuna kikinkutan Diospa munayninman hina, Señorman hap'iykuchikurqanku. Hinan ñoqaykumanpas hap'iykuchikullarqankutaq.
[6] Titon, ñawpaqta qankunapi llank'anataqa qallarirqan. Hinan kay allinpaq qokuy ofrendata hoqarinanpaq paytaqa kallpanchaykurqayku.
[7] Qankunan ichaqa, tukuy imaymanakunapipas askhayashankichis. Iñiypipas, rimaypipas, yachaypipas, tukuy k'uchi kaypipas, ñoqaykuta munakuypipas anchatapunin askhayashankichis. Chay hinallatapuni chay ofrenda qokuypipas askhayashaychis.
[8] Manan kamachikushaymanpas hinachu rimashani. Aswanpas hukkunaq k'uchi kayninkuwan kuskachaspa, munakuyniykichis cheqaqchus, icha manachus kasqanta yachanaypaqmi chaytaqa rimashani.
[9] Señorninchis Jesucristoq allinpaq qokuynintaqa ñan reqsinkichisña. Payqa, qhapaq kashaspapas, qankunata munakusqasunkichisraykun, wakchaman tukurqan. Hinan chay wakcha kayninwan payqa qhapaqyachirqasunkichis.
[10] Kaytaqa qankunaq allinniykichispaqmi yuyaychaykuykichis: ‘Qayna watamantañan qankunaqa ofrendakuyta, hinallataq ofrendata qoykuy munaytapas ñawpaqta qallarirqankichis.
[11] Kunanqa chay ruwasqaykichista hunt'anaykichiskama ruwashallaychispuni. Chay hinapi, imaynan qoyta munaqllapuni karqankichis, chay hinallataqyá kapusqasunkichisman hina hunt'aqllapuni kaychis.
[12] Sichus ñawpaqta qoykuyta munaqllapuni kankichis chayqa, kapusqasunkichisman hinallan chaskisqa kanqa. Manataqmi mana kapusqasunkichisman hinachu chaskisqa kanqa.’ nispay.
[13] Manan wakinkunaq sonqonta llanllarichinaypaqchu, nitaq qankunata ñak'arichinaypaqchu chaytaqa nini.
[14] Aswanpas qankunapurapi kuskallamanta qhawarinakuy kananpaqmi chaytaqa nini. Kunan tiempopi, qankunaq askha kapusqasunkichiswanmi paykunaq pisichikusqankutaqa yanapaykunkichis. Hinallataqmi, paykunaq askha kapusqankuwan, qankunaq pisichikusqaykichista yanapaykusunkichis. Chay hina kananpaqmi chaytaqa nini. Chay hinapin kuskallamanta qhawarinakuy kanqa.
[15] Qelqataqmi nin: ‘Askhata pallaqpaqa, manan aswan askhachu kapurqan. Hinallataq pisillata pallaqpapas, manan aswan pisichu kapurqan,’ nispa. (Exo. 16:18)
[16] Diosmi, qankunarayku Titoq sonqonman kasqan k'uchi kayllatataq churaykurqan. Payllamanpuni grasiasqa kachun.
[17] Cheqapaqpunin qankunaman hamunanpaq kallpachaykuqtiyku uyakurqan. Ichaqa k'uchi kayninwanmi pay kikillanmanta qankunaman puririmurqan.
[18] Paywan kuskatataqmi, tukuy cheqas iñiq t'aqakunapaq allin willakuypi llank'aq huk ancha reqsisqa wawqeta kachamurqayku.
[19] Manan chayllachu, aswanpas purisqaykupi puriysiwanankupaqmi iñiq t'aqakunapas paytaqa akllarqanku. Ñoqaykuq allinta qhawasqayku chay qokuy ofrendaykichista apamunanpaqmi, paytaqa akllarqanku. Señor hatunchasqa kananpaq, hinallataq qoykukuy munaq kasqaykuta reqsichikunaykupaqmi chay ofrendataqa allinta qhawayku.
[20] Chay hinapi, chay askha qoykukuy ofrendata allinta qhawasqaykumanta, manan pipas pisichawanqakuchu.
[21] Chaykuna ruwasqaykuqa manan Señorpa ñawpaqellanpi allin kanantachu munashayku. Aswanpas runakunaq ñawpaqenpipas allinpuni kanantan munashayku.
[22] Paykunawanmi, huk wawqeykutapas k'uchi kayninta yapa-yapamanta probaspayku kachamurqayku. Kunantaqmi ichaqa, qankunapi ancha sonqo churayniyoq kashaspa, aswan k'uchiraq kashan.
[23] Titomanta rimaspanchisqa, puriqmasiy, hinallataq qankunapaq llank'aqmasiyqa paymi. Wakin wawqenchiskunamanta rimaspanchisqa, iñiq t'aqakunaq willaqninkuna, hinallataq Cristota hatunchaqkunan kanku.
[24] Chayrayku, iñiq t'aqakunaq ñawpaqenpi, imaynachus munakuyniykichis kasqanta, hinallataq qankunamanta hatunchakusqayta paykunaman rikuchiychis.