[1] Chay huk chikan waq'a kayniyta pasiensiaykuwanaykichistan munayman. ¡Cheqapaqpuni pasiensiaykuwaychis!
[2] Ch'uya donsella sipasta hina, Cristoman qayllaykuchinayraykun, ch'ulla qosallawan rimanaykuchirqaykichis. Chaymi Diospa wañukuyninwanraq wañukuykichis.
[3] Ichaqa, mach'aqwaymi, yachaysapa kayninwan Evata q'oturqan. Chay hinata yuyayniykichista, hinallataq Cristopi cheqaq iñiyniykichista imaynapipas waqllichinasunkichismantan manchakuni.
[4] Pipas ñoqaykuq willasqayku Jesusmanta wak Jesusta willaspaqa hamunmanmi. Otaq chaskisqaykichis Espiritumanta huk niraq espirituta chaskichisunkichismanmi. Otaq chaskisqaykichis allin willakuy willasqaykumanta huk niraq willakuyta willasunkichismanmi. Sichus chay hina kanman chayqa, ¿imanaqtintaq qankunari paykunata chaskishawaqchis?
[5] Haqay qankunaq hatunpaq qhawarisqaykichis apostolkunamantaqa mana imapipas aswan pisillachu kasqaytan qhawarikuni.
[6] Rimakuyniypiña mana allinchu kani chaypas, manan yachayniypiwanchu chay hinaqa kani. Aswanmi llapanpi, hinallataq tukuy imaymanakunapi, pichus kasqayta qankunamanqa reqsichikurqani.
[7] Ñoqaqa allin willakuyta yanqallanmi willarqaykichis. Qankuna Diospa hatunchasqan kanaykichispaqmi ñoqaqa huch'uyaykukurqani. ¿Chaykunata ruwaspayri, huchallikurqanichu?
[8] Qankunata qhawanaypaqmi wakin iñiq t'aqakunamanta yanapaytaqa chaskirqani. Chayqa, paykunamanta suwakushaymanpas hinan karqan.
[9] Qankunawan kashaqtiy, imapas pisiwasqantaqa Masedonia probinsiamanta hamuq wawqekunan qowarqanku. Chayraykun mana mayqenniykichistapas gastachirqaykichischu. Chay hinapin, ama pitapas gastachinaypaq tukuypi kuidakurqani, hinallataq kuidakusaqpas.
[10] ¡Cristoq cheqaq kaynin ñoqapi kashasqanhawan, Akaya probinsiaq suyunkunapi hatunchakuyniyqa kashallanqapuni!
[11] ¿Imanaqtintaq chay hinatari rimashani? ¿Qankunata mana munakusqayraykuchu chaytari rimashani? ¡Manapunin! Aswanpas Diosllan qankunata munakusqaytaqa yachan.
[12] Hinan rimaykachaqkunaqa rimaykachasqankupi ñoqanchis hina tarikuyta munanku. Ñoqan ichaqa, imatachus ruwashani, chaytaqa ruwashallasaqpuni. Chay hinapin, chay rimaykachaqkunataqa upallachisaq.
[13] Chay hina runakunaqa, falso apostolkunan kanku. Q'otukuq llank'aqkunan kanku, hinallataq Cristoq apostolninkunaman hinan rikch'akunku.
[14] Kikin Satanaspas, k'anchashaq angel hinan p'achallirukun. Chayrayku chaykunamantaqa, ama muspharisqachu kashasun.
[15] Chay hinaqa, Satanaspa kamachinkunapas chaninpa kamachinkuna hina p'achakuyninkumanta ama musphariychischu. Paykunaq p'uchukayninkuqa ruwasqankuman hinan kanqa.
[16] Huktawanmi nini: ‘Ama pipas waq'ata hinaqa qhawariwachunchu,’ nispay. Ichaqa huk chikachallantapas hatunchari kunaypaq waq'ayasqata hinallapas chaskiykuwaychis.
[17] Kunan nisqaytaqa, sonqo churaywan hatunchakuspaymi nini. Chaytaqa, manan Señorpa rimasqanta hinachu, aswanpas waq'ayasqa hinan nini.
[18] May askhan aychaman hina rimaykachanku. Ñoqapas chay hinallatataqchá hatunchakusaq.
[19] Qankunaqa yuyaysapa kashaspaykichismi, waq'akunatapas sumaqtaraq pasiensiawan chaskiykushankichis.
[20] Pipas kamachipaq hap'isunkichismanmi. Pipas oqoykusunkichismanmi. Pipas qankunaqta munaychakunmanmi. Pipas k'ankaykachaq kanmanmi. Pipas qankunata uyapi ch'aqlasunkichismanmi. Sichus chay hina kanman chayqa, chaykunatapas qankunaqa chaskiykushallankichismi.
[21] Sinchi pisi-kallpayoqpas kaykuman hinan may p'enqakuywan nini. Wakinkunapas rimaykachasqankurayku ñoqapas hatunchakullanitaq. Kaytaqa waq'ayasqa hinan nini.
[22] ¿Hebreo runakunachu kanku? Ñoqapas Hebreo runallataqmi kani. ¿Israel llaqtamantachu kanku? Ñoqapas Israel llaqtallamantataqmi kani. ¿Abrahampa mirayninkunachu kanku? Ñoqapas Abrahampa miraynillantaqmi kani.
[23] ¿Cristoq serbiqninkunachu kanku? Ñoqaqa, aswan serbiqraqmi kani. Chaytaqa, waq'ayasqa hinaraqmi nini. ¡Ñoqaqa, paykunamanta aswantaraqmi llank'arqani! ¡Ñoqaqa paykunamanta aswantaraqmi mana yupay atiy kutita soq'aykusqa karqani! ¡Ñoqaqa, paykunamanta aswantaraqmi karselpi kasharqani! ¡Ñoqaqa, wañuypaq peligrokunapi askha kutitan kasharqani!
[24] Judío runakunamantan, phisqa kutita, kinsa chunka isqonniyoq hasut'ikunata chaskirqani.
[25] Kinsa kutitan k'aspikunawan q'asuykuwarqanku. Huk kutipitaq rumiwan ch'aqewarqanku. Kinsa kutitataqmi unuman t'ikraykukurqani. Huk tuta, huk p'unchaymi mama-qochaq chawpinpipuniña kasharqani.
[26] May askha kutitan chakipi purirqani. Ñoqaqa mayukunamanta peligrokunapi, suwakunamanta peligrokunapi, llaqtamasiykunamanta peligrokunapi, mana-judío runakunamanta peligrokunapi, llaqta runakunamanta peligrokunapi, ch'inniq cheqas peligrokunapi, mama-qocha peligrokunapi, hinallataq mana cheqaq wawqekunamanta peligrokunapin tarikurqani.
[27] Sinchi llank'anapi, sayk'uy llank'anapi, askha tuta mana puñuypi, yarqaypi, ch'akiypi, askha kuti ayunaypi, chiripi hinallataq mana p'achayoq kaypin kasharqani.
[28] Tukuy chaykunamantapas aswantaraqqa, llapan iñiq t'aqakunamanta llakikuymi sapa p'uchay ñit'iykuwan.
[29] ¿Piña pisi-kallpayan chaypas, ñoqaqa manachu pisi kallpayallanitaq? ¿Mayqentaña misk'achiqtinkupas, imaynataq ñoqari mana phiñakuymanchu?
[30] Sichus hatunchakuna kanman chayqa, ñoqapas pisi-kallpa kasqaymantan hatunchakusaq.
[31] Wiñay-wiñaypaq saminchasqa Señor Jesucristoq Yayan Diosmi mana llullakusqaytaqa yachan.
[32] Damasko llaqtapin, rey Aretaspa gobernadornin, hinallataq chay llaqtayoq runakuna, hap'iwanankupaq allintapuni llaqtata kuidasharqanku.
[33] Hinan perqaq bentananta, huk kanastapi warkuykuspa uraykachisqa karqani. Chay hinapin, chay runakunaq makinkumanta ayqekapurqani.