[1] Chay hinaqa, Diospa yanapakuyninman hina qowasqanku, kay llank'anaqa kapuwankun. Chaymi manapuni pisipaykuchu.
[2] Pakallapi p'enqay ruwaykunatan ichaqa, saqepuyku. Manataqmi yachaysapa kaywan urmachispachu, nitaq Diospa siminta waqllichispachu purishayku. Aswanpas Diospa ñawpaqenpi, llapa runaq konsiensianman, cheqaq kaqta rikuchispaykun reqsichikuyku.
[3] Ichaqa, sichus kay allin willakuyniyku qatasqaraq kashan chayqa, wañuy ñak'ariyman riqkunallapaqmi qatasqaqa kashan.
[4] Hinaqa, kay pachapi kashaq diosmi mana iñiqkunaq yuyayninkutaqa tutayachirqan. Hinan k'ancharishaq Cristoq allin willakuynin mana k'anchaykunanpaq tutayachirqan. Cristoqa, Diospa rikch'ayninpunitaqmi kanpas.
[5] Manan ñoqayku kikiykumantachu willakuyku. Aswanpas Cristo Jesusqa Señorpuni kasqantan willayku. Ñoqaykutataqmi, Jesusrayku qankunaq kamachiykichis kasqaykuta willakuyku.
[6] Diosmi, k'anchayta tutayaq ukhumanta k'ancharimunanpaq kamachirqan. Payllataqmi, Jesucristoq uyanpi Diospa k'anchariyninta reqsinanchispaq sonqonchispipas k'ancharirqan.
[7] Chay tukuywanpas, kay ancha balorniyoq qhapaq kayqa, t'urumanta qerokunapin kapuwanchis. Chay ancha atiyniyoq kayqa, manan ñoqanchismantachu hamun. Aswanpas Diosmantan hamun.
[8] Tukuy imaymanapi ñak'arichisqan kashayku, ichaqa manataqmi ñit'iykusqapunichu kashayku. Llakisqan kashayku, ichaqa manataqmi sinchita llakipakuspachu kashayku.
[9] Qatiykachasqan kashayku, ichaqa manataqmi wikch'urparisqachu kashayku. Maqaykuspa urmachisqan kashayku, ichaqa manataqmi wañuchisqachu kashayku.
[10] Señor Jesuspa wañusqantan aycha kuerpoykupi tukuy cheqasman apashaykupuni. Chay hinapin Jesuspa kawsayninqa aycha kuerpoykupi rikuchikunqa.
[11] Ñoqayku kawsashaqkunapas, Jesusraykun wañuyman hap'ichisqallapuni kashayku. Chay hinapin Jesuspa kawsayninqa wañuq aycha kuerpoykupi rikuchisqa kanqa.
[12] Chay hinapin, ñoqaykupiqa wañuyllapuni llank'aspa kashan. Qankunapitaqmi ichaqa, kawsayllapuni llank'aspa kashan.
[13] Chaywanpas, Qelqaq nisqanman hinaqa, ch'ulla iñiy espiritullan kapuwanchis. Qelqataqmi nin: ‘Kreerqanin, chaymi rimarqani,’ nispan. (Sal. 116:10) Chaymi ñoqaykupas kreeyku. Chayraykutaqmi rimariykupas.
[14] Pichus Señor Jesusta kawsarichimpurqan, payllataqmi ñoqanchistapas Jesuspa chawpinta kawsarichimpuwasunchis. Chaytaqa yachanchismi. Hinaspa qankunawan kuskata paypa ñawpaqenman qayllaykuchiwasunchis.
[15] Llapan kay imaymanakunapas qankunaq allinniykichispaqmi pasashan. Chay hinapi Diospa allinpaq qokuyninqa askha runakunaq chawpinta mast'arikunanpaq, hinallataq Diosqa hatunchasqa kananpaq grasiasta qoypas askhayanqa.
[16] Chay hinaqa, manapunin pisipaykuchu. Aswanmi hinaña aycha kuerpoyku pisi-kallpayapushan chaypas, espirituykuqa p'unchaymanta p'unchaymanmi mosoqyashan.
[17] Ñoqaykuq ñak'ariyniykuqa huk ratullan, hinallataq pisillataqmi kanpas. Chay ñak'ariyniykutaqmi, wiñay k'anchariyta ñoqaykupi rurun. Chay k'anchariytaqmi, ñak'ariyniykumantapas aswan-aswan balorniyoqqa.
[18] Rikusqanchis kaqkunaqa, pisi tiempollapaqmi kanku. Mana rikusqanchis kaqkunataqmi ichaqa, wiñay-wiñaypaqpuni kanku. Chayraykun, ñoqaykuqa rikusqa kaqkunataqa mana qhawaykuchu. Aswanpas mana rikusqa kaqkunallatan qhawayku.