[1] Chay hinaqa, munakusqaykuna, chay hina promesayoqña kashaspaqa, aycha kuerponchispipas, espiritunchispipas, lliw qhelli kaqkunamanta ch'uyanchakusunchis. Hinan Diosta manchakuypi, k'apak ch'uya kayman aypasunchis.
[2] Manan pitapas ima mana allintapas ruwarqaykuchu, nitaqmi waqllichirqaykuchu, nillataqmi q'oturqaykupaschu. Chay hinaqa, chaskiykuwaykuyá.
[3] Kuska wañunanchispaqpas, kuska kawsananchispaqpas, sonqoykupiñan kashankichis. Chaytaqa ñawpaqmantañan nirqaykichis. Chaymi mana huchachanaypaqchu chaytaqa nini.
[4] Qankunapin ancha sonqo churayniyqa kapuwan. Qankunamantaqa anchatapunin hatunchakuni. Sonqochasqa kaywanmi hunt'aykusqa kashani. Hinallataq tukuy ñak'arisqaykupipas kusikuywan ancha hunt'aykusqapunin kashani.
[5] Cheqapaqmi, Masedonia probinsiaman hamuqtiykuqa, mana ima samaykuypas aycha kuerpoykupaq karqanchu. Aswanpas tukuypin ñak'ariykuna kawarqanku. Huk niypiqa, hawamantan churanakuykuna kawarqanku. Ukhupitaqmi manchapakuykuna kawarqanku.
[6] Diosmi ichaqa, huch'uyaykukuqkunata sonqochaykun. Hinan Titoq hamusqanpa chawpinta ñoqaykutapas sonqochawarqanku.
[7] Manan Titoq hamusqallanwanchu, aswanpas payta sonqochamusqaykichiswanmi ñoqaykupas sonqochasqallataq karqayku. Rikuykuyta munawasqaykichistapas, ñoqamanta waqasqaykichistapas, llakikuwasqaykichistapas Titon willawarqan. Chaywanmi aswan-aswantaraqqa kusikurqani.
[8] Sichus chay apachimusqay kartawan llakirichirqaykichis chayqa, chaymantan ñawpaqtaqa ñakapakurqani. Ichaqa chay karta pisi tiempollapaq llakirichisqanta reparaspaymi, kunanqa manaña ñakapakunichu.
[9] Kunantaqmi, mana qankunaq llakikuyniykichismantachu kusikuni. Aswanpas chay llakikuyniykichis- wanmi yuyayman kutirikurqankichis. Chaymantan kusikuniqa. Qankunaqa Diospa munasqanman hinan llakichisqa karqankichis. Chaymi mana ñoqaykumantaqa ima mana allintapas chaskirqankichischu.
[10] Diosmanta hamuq llakikuyqa, runakunaq yuyayman kutirikunankupaqmi. Runakunaq yuyayman kutirikuyninkutaqmi qespichisqa kanankupaq karqan. Manataqmi imamantapas ñakapakunankupaq kanchu. Kay pachaq llakichiyninmi ichaqa, runakunaq wañupuyninta apamun.
[11] Imachus pasasqasunkichista qhawariychis. Diospa munayninman hinan, llakichisqaqa karqankichis. ¡Chay llakikuytaqmi, allin kaqta ruwanaykichispaq may hinataraq k'uchi kaytapas, defiendikuq kaytapas, phiñasqa kaytapas, manchaykukuq kaytapas, ruphashaq munakuytapas, wañukuqraq kaytapas, usqhaylla chaninchaytapas rururqan! Ichaqa tukuypi, hinallataq chay pasasqanpi mana huchayoqpunin rikuchikurqankichis.
[12] Chay hinaqa, qelqamurqaykichisña chaypas, manan chay mana chaninta ruwaq runaraykuchu, nitaq chay mana chaninta muchuq runaraykupaschu qelqamurqaykichis. Aswanpas ñoqaykupaq k'uchi kayniykichis, qankunapurapi, hinallataq Diospa ñawpaqenpi rikuchikunanpaqmi qelqamurqaykichis.
[13] Chaymi ñoqaykupas, sonqochayniykichiswan sonqochasqa karqayku. Ichaqa, chaymantapas, Titoq espirituntaqa llapaykichismi kallpacharqankichis, hinan payqa kusikurqan. Chay sonqochasqaykichiswanchus paypas kusikurqan chayqa, ñoqaykupas aswantaraqmi kusikullaykutaq.
[14] Sichus Titoman qankunamanta hatunchakurqani chayqa, manapunin p'enqachisqachu karqani. Aswanmi llapantapas cheqaqtapuni qankunamanqa willarqaykiku. Chay hinallataqmi, Titoman qankunamanta hatunchakuyniykupas cheqaqpuni karqan.
[15] Paymi llapallaykichispa kasukuyniykichista yuyarin. Hinallataq, imaynatachus manchakuywan, khatatataywan, chaskiykusqaykichistapas yuyarin. Chaymi kunanqa paypa munakuynin qankunapaq aswantaraq yapakushan.
[16] Tukuy imamanta qankunapi sonqo churayniyoqmi kashani. Chaymi kusikuni.