[1] Cheqaqtapunin, hatunchakuyniyqa, manaña imapaqpas baliwanchu. Chaywanpas ichaqa, Señorpa wak rikhuriykunapi rikuchiwasqanmantan rimashallasaqpuni.
[2] Cristopin huk runata reqsini. Paymi yaqa chunka tawayoq wata qhepataña, kinsa kaq hanaq pachakama hoqarisqa karqan. Kuerpopichus hoqarisqa kasqantaqa manan yachanichu. Ichari mana kuerpopichus hoqarisqa kasqantapas manallataqmi yachanichu. Diosllan chaytaqa yachan.
[3] Chay runataqa reqsinin. Ichaqa kuerponpichus, otaq mana kuerponpichus kasqantaqa manan yachanichu. Diosllan chaytaqa yachan.
[4] Paymi Paraisoman hoqarisqa karqan. Hinan mana rimay atinan simikunata uyarirqan. Chay hina rimayta rimananpaq runamanqa manapunin qosqachu karqan.
[5] ¡Chay runamantan hatunchakusaq! Ñoqa kikiymantan ichaqa, mana hatunchakusaqchu. Aswanpas pisi-kallpa kayllaypin hatunchakusaqqa.
[6] Sichus ñoqa hatunchakuyta munayman chayqa, manan mana yuyayniyoqchu kayman. Aswanpas cheqaqllatapunin nishayman. Ichaqa, pipas ñoqapi rikusqanmanta, hinallataq uyarisqanmanta aswan allinraq kanaypaq yuyaykuqqa kanmanmi. Chayrayku ñoqamantaqa manapuni hatunchakusaqchu.
[7] Hatun rikuchiykunata rikuchiwasqanmanta mana hatunchakunaypaqmi, aycha kuerpoypi huk yawriwan t'urpuyqa qosqa kawarqan. Ama sinchita umayta hoqarinaypaqmi, Satanaspa huk willaqnin ch'aqlashawan.
[8] Ñoqamanta chayta qechuwananpaqmi, kinsa kutinkama Señorta balikurqani.
[9] Hinan niwarqan: ‘Pisi-kallpa kayniykipin atiyniyqa k'apakchakun. Chayrayku allinpaq qokuyniywan kusisqalla kay,’ nispan. Chay hinaqa, Cristoq atiynin ñoqapi tiyananpaqmi, pisikallpa kashaspapas sonqoymantaraq hatunchakusaqpuni.
[10] Pisi- kallpa kaspaymi, aswan atiyniyoqqa kani. Chayraykun, pisikallpaña kashaspapas, p'enqay k'amisqaña kashaspapas, pisichikuykunapiña kashaspapas, qatiykachasqaña kashaspapas, Cristota munakusqayrayku llakiq ñit'isqanña kashaspapas, anchatapuni kusikuni.
[11] Ñoqan qankunaq rekomiendasqaykichisqa kanay karqan. Manaña imapaschu kani chaypas, qankunaq hatunpaq qhawarisqaykichis apostolkunamantaqa manan huch'uyllachu kani. Chayrayku hatunchakuspayqa, mana yuyayniyoq hina karqani. Qankunan chay ruwanaypaqqa, tanqawarqankichis.
[12] Cheqapaqpunin tukuy pasiensiawan, qankunapurapi apóstol kay señalkuna ruwasqa karqan. Chaykunaqa, señalkunapiwan, musphana ruwaykunapiwan, atiywan ruwaykunapiwanmi karqan.
[13] ¿Chay hinari, wakin iñiq t'aqakunamantari imapitaq pisi karqankichis? ¿Mana imapi gastachisqaypichu pisiqa karqankichis? ¡Chay hinaqa, chay mana chanin ruwasqaymanta pampachaykuwaychis!
[14] Manan kaqniykichistachu maskhashani, aswanpas qankuna kikiykichistan maskhashaykichis. Manan wawakunachu taytamamankupaq qhapaq kaytaqa huñunku. Aswanpas taytamamakunan wawankupaq qhapaq kaytaqa huñunku. Chayrayku qhawariychis, kinsa kaq kutinpi qankunaman hamunaypaqmi wakichisqaña kashani. Ichaqa manataqmi qankunata gastachinaypaqchu hamusaq.
[15] Chaywanpas, ñoqaqa sonqoymantan kaqniykunata, hinallataq ñoqa kikiytapas almaykichista munakusqayrayku gastakusaq. Qankunata anchataña munakuykichis chaypas, ¿qankunari pisillatachu munakuwankichisman?
[16] Cheqapaqmi qankunataqa mana imapipas gastachirqaykichischu. ¡Ichaqa yuyaysapa kayniywanmi q'otullawan hap'irqorqaykichis!
[17] ¿Qankunaman mayqen kachamusqaypa chawpintapas, q'oturqaykichischu? ¡Manapunin!
[18] Titota balikuspaymi, huk wawqenchista paywan kuskata kachamurqani. ¿Titoqa q'oturqasunkichischu? ¡Manapunin! ¿Manachu kasqan espiritullawan hamurqayku, hinallataq kasqan yupillata qatikurqaykupas?
[19] ¿Qankunaq ñawpaqeykichispi defiendikuspa rimanaykupaqchu yuyaykunkichis? Manan, aswanpas Diospa ñawpaqenpin Cristopi rimashayku. Hinallataq munakusqaykuna, qankunata wiñachinaykupaqmi llapanta rimashayku.
[20] Chayamuspayqa, manapaschá munasqayman hinachu tarisaykichis. Chaymantan manchakushani. Hinallataq manapaschá qankunapas munasqaykichisman hinachu tariwankichis. Chaymantapas manchakushallanitaqmi. Huchatariykunapi wakinniykichisqa kashawaqchismi. Wakinniykichisqa tumpanakuykunapi, phiñanakuykunapi, t'aqanakuykunapi, yanqanmanta tumpaykunapi, simi apaykunapi, anchaykachaykunapi, hinallataq ch'aqwaraykunapi kashallawaqchistaqmi. Chaykunamantan manchakushani.
[21] May askhan ñawpaqqa huchallikurqanku, ichaqa manataqmi chay huchallikusqankumanta yuyayman kutirikurqankuchu. Mana ch'uya kaykunapin huchallikurqanku. Qhelli puriykunapin huchallikurqanku. Hinallataq aycha kuerpo mana watakuykunapipas huchallikullarqankutaqmi. Qankunaman kutimuqtiy, qankunapurapi Dios huch'uyaykachiwananmanta, hinallataq chaykunapi huchallikusqankumanta waqanallaymantan manchakushani.