[1] Ñoqa kikiytaqmi ichaqa, ama qankunata yapamanta llakichinaypaq manaña hamuyta yuyaykukuni.
[2] Sichus ñoqa llakichiqniykichis kani chayqa, ¿pitaq ñoqaq kusichiqniyri kanqa? ¿Chay llakichisqay runachu kusichiqniyri kanqa?
[3] Qankunaqa ñoqaq kasqan kusikuyniywan llapa kusisqa kasqaykichismantan llapaykichispi sonqo churayniyoq kashani. Chaywanpas, ñoqa chayamuspay, pikunachus kusichiwanankupaq kaqkunamanta, mana llakisqa kashanaypaqmi qankunaman qelqamurqaykichis.
[4] Sinchi ñak'ariypi, hinallataq sonqoypi sinchi llakisqa kaspaymi, askha weqeywan qelqamurqaykichis. Manan qankunata llakichinaypaqchu, aswanpas may hinatachus munakuykichis, chayta yachanaykichispaqmi qelqamurqaykichis.
[5] Ichaqa, sichus pipas ñoqata llakichiwarqan chayqa, manan ñoqallatachu llakichiwarqan. Aswanpas llapaykichistan llakichisunkichis. Chaytaqa, mana yapaykuspallaymi nini.
[6] Chay hina runapaqqa, askha runakunaq anyaykusqanku chayllaña kachun.
[7] Chay hinaña kanman chaypas, ama sinchi llakikuypa ñit'iykusqan kashananpaq, pampachaychis, hinallataq sonqochaykuychis.
[8] Chay runata wakmanta munaykukunaykichispaqmi balikuykichis.
[9] Tukuy imaymanapi kasukuq kasqaykichistan yachayta munarqani. Chayraykun qelqamurqaykichis.
[10] Sichus mayqentapas pampacharqani chayqa, Cristoq ñawpaqenpin qankunarayku pampacharqani. Chayraykun pampachasqaykichis runataqa ñoqapas pampachallanitaq.
[11] Satanaspa yachaysapa kayninwan q'otuq kasqantaqa yachanchismi. Chayraykun, Satanasqa ñawparqospan ama atipawananchispaq pampacharqani.
[12] Troas llaqtamanmi, Cristoq allin willakuyninta willanaypaq chayarqani. Hinan chaypi willanaypaq Señorpa huk punku kicharisqanta tarirqani.
[13] Chaywanpas, wawqey Titota chaypi mana tarispaymi, mana espirituypi thakchu karqani. Hinan paykunamanta despidikuspay, Masedonia probinsiaman puriripurqani.
[14] Ichaqa, Diosmi ñawpaqllamanpuni Cristopi llallichispa pusakuwanchis. Hinallataqmi, Diosta reqsiypa, sumaq q'apaynintapas, ñoqanchispa chawpinchista tukuy cheqasman rikuchin. Chaymantan Diosman grasiasta qoni.
[15] Qespisqa kaqkunapurapipas, hinallataq wañuy ñak'ariyman riqkunapurapipas, Diospaqqa Cristoq sumaq q'apayninmi kanchis.
[16] Wañuy ñak'ariyman riqkunapaqqa wañuypaq wañuy q'apaymi. Qespisqa kaqkunapaqtaqmi ichaqa, kawsaypaq kawsay q'apayllataq kanpas. Hinaqa, ¿pitaq chay imaymanakunata yuyayninpi entiendinanpaq wakichisqari kashan?
[17] Askha runakunan Diospa siminta waqllichispa qhatushanku. Ñoqaykuqa, manan paykuna hinachu kayku. Aswanpas Diospa ñawpaqenpin, hinallataq Diospa kamachinkuna hinapuni, sut'i sonqowan Cristopi rimayku.